梅窩冰室靠港女下午茶上位？招牌之作到底係乜東東？

梅窩街市有一間本地冰室，曾經以一款超特別模式嘅港女3層架下午茶吸引大眾目光，一度成為焦點，唔少人都專程前往試試本土版港女下午茶，但其實冰室招牌之作並非3層架下午茶，到底係咩呢？編輯本來唔知道呢間係同路人，因為一直未有紀錄，而事實上都只係當初仍然能夠堂食時，與另一間梅窩本土店嘅老闆娘閒聊，先知道邊幾間餐廳可以支持。

位處梅窩街市旁邊小巷嘅麥生記冰室，由約1954年開業至今有約70年，純白磚牆上有五隻紅噹噹大字寫有店名，門口亦如舊式冰室拉門設計，有歷史悠久，係一間老字號冰室，據悉冰室傳人已經係第4代。麥生記冰室本來就有唔少梅窩街坊打躉，自從小店推出一款港女3層架下午茶$148 之後，遊客增加，每個週末皆可見門口大排長龍，人人躍躍欲試，一間冰室集合大叔大嬸與港女，拍拖情侶亦兩個人苦苦等候入座，晴天、雨天、陰天風雨不改，到底該款下午茶系列有乜特別呢？

編輯無打算點選3層架下午茶，只係單靠餐牌介紹得知食物款式，當中包含最底第1層嘅皇牌公司三文治作鹹點，取代西式下午茶必有嘅鬆餅，中間第2層嘅炸蝦餅、春卷、咖哩角、薯條，重有最頂端第3層嘅特式甜品，貌似係啫喱、奶凍等，再額外加上3杯飲品，簡單嚟講，就係港式小食放上層架之上。無可否認，將港式小食與近年受到歡迎嘅港女式下午茶融合，於懷舊冰室卡位內歎下午茶，的確係相當有Gimmick，鍾意打卡嘅人自然會專程前來，對於愛好新鮮感嘅香港人嚟講，自然會想一試，但至於$148到底值唔值，就有客人自行決定。

反而，店內招牌之作似乎被3層架下午茶完全蓋過，據了解，店內除咗三文治、多士、麵食，最特別嘅款式應該係豬扒包、牛腩湯麵。其他下午茶餐價錢更低廉，比如西多士加魚片米$37 包熱飲，呢個價錢嘅西多士就只有平常嘅一半份量，即4件變2件，西多士底層黏有糖漿，表面預先放上牛油，麵包炸成金黃色，亦算鬆脆香口，糖漿、牛油份量都算適中。

港式奶茶或茶走都係必點飲品之一，另有比較少見嘅傳統滾水蛋、忌廉溝鮮奶，至於奶茶茶膽有茶香，就係傳統絲襪奶茶嘅拉茶方式沖泡出嚟嘅紅茶，難怪冰室座位頂頭有一張小型廣告牌特別提到港式奶茶。

牛腩湯蝦子麵$46 係其中一款冰室本來嘅招牌作品，採用秘方炮製牛腩湯麵，而且全日供應。蝦子麵估計唔會係冰室自己手打，但該麵廠出品亦算不俗，麵質爽口，啖啖有蝦子味，於水中灼燙亦唔會變淡。牛腩肉質亦算腍身而入味，只係含有筋位，有少少韌度，而湯底則係精粹所在，湯頭呈褐色，偏向Coconut brown色澤，湯內腩汁並非單單有牛味，亦有甘香口感，而暗暗藏有陣陣獨特陳皮香，難道湯底係加咗陳皮之類作香料？