【曼谷美食】粉紅色VS綠色！曼谷必食米芝蓮級水門雞飯水門市場間間50Baht點分辨？

曼谷水門市場以水門雞飯最為人熟悉，水門街一帶有大量水門雞飯店，唔少人都會以顏色分辨，但到底粉紅色定綠色有咩分別、邊間係總店、邊間係米芝蓮級數呢？香港平常見慣見熟嘅都係綠色水門雞飯，同粉紅色水門雞飯又有咩分別？水門市場內無論咩顏色，好多都係50Baht一份水門雞飯，拍拖兩個人去時你又會揀邊間？

綠色水門雞飯

位於水門市場（Palladium Square）嘅綠色水門雞飯，為「廣興海南雞飯」。如果從BTS「Chit Lom」站出發，必然會先經過綠色水門雞飯，先會去到粉紅色水門雞飯。

其實「廣興海南雞飯」於1932年創立，至今有逾80年歷史，其實歷史比較悠久，但有同比較受歡迎嘅總店有不一樣口味。綠色水門雞飯有泰文、英文、中文餐牌，最特別之處係價錢相近，但分店眾多，而且營業時間較長，據悉部份會24小時營業，適宜早餐或宵夜。

舖天蓋地嘅「廣興海南雞飯」，以綠色覆蓋水門街，店員都係穿上綠色制服。雞飯最大分別係有水煮雞、炸油雞可以選擇，另外重有雞雜、苦瓜排骨湯等。正常一碟水門雞飯賣50泰銖，而淨雞肉則分大中小份量，價錢由60、100至150泰銖不等，半隻及1隻雞則分別賣350及700泰銖。

水門雞飯一碟為50泰銖，雞湯並無好重胡椒味，反而雞飯泰式香料較總店重，雞肉未夠總店嫩滑。而蘸醬則無辣椒口感，相對嚟講係無咁辣，味道溫和，容易入口。而泰式冰紅茶一杯為30泰銖，入口偏甜，同總店一樣都係不過不失。

綠色水門雞飯菜式眾多，同粉紅色水門雞飯唔一樣，餐牌上並非只有雞飯可擇，包括有沙嗲串燒、鮮春卷、魚肚湯，甚至係蒸麵包、多士、泰式茶飲。

粉紅色水門雞飯

雖然水門街有好多水門雞飯專門店，但總店只有1間，最簡單就係憑顏色分辨。總店嘅水門雞飯係呈粉紅色（其實偏桃紅），據悉現時於近Big C嘅The Market商場都有分店。

粉紅色水門雞飯名為「紅大哥水門雞飯」，既係總店，亦係唯一獲得《米芝蓮指南》必比登（Bib Gourmand）星級推介嘅水門街雞飯，該店由2018年起已連續多年獲獎。除咗顏色，最大分別應該係營業時間較短，而人流卻比較多。總店既吸引遊客，亦有唔少當地客人，上次粉紅色水門雞飯太多人﹐編輯只能退而求其次食綠色水門雞飯，今次醒目地避開繁忙時間，傍晚6點前已經抵達，果然人流較少，直入無需排隊等候。

「紅大哥水門雞飯」於1960年已經創立，屹今有63年歷史，全店一直以粉紅色制服為標記。總店並無冷氣，只有少量風扇提供，如果要搭檯，環境可能會更逼。

店內既有招牌海南雞飯，亦有其他菜式，包括雞血、雞內臟，甚至豬肉飯、雞骨湯、雞腳湯、燉老鴨等，餐牌包含有泰、英、中文翻譯，加上圖片，點餐基本上零障礙。而海南雞飯最平為50泰銖，即使係《米芝蓮》級數，價格亦保持低廉。如果兩個人食，不妨點70至140泰銖份量，雞肉量明顯會較多。

海南雞飯套餐包含有清雞湯、油飯、雞肉、獨門醬料，其中清雞湯入口偏辛辣，含有大量胡椒粉作底，比綠色水門雞飯明顯重辛辣味，有興趣可以加點帶骨雞湯。泰式奶茶、菊花茶各25泰銖，兩者都屬不過不失，但碎冰量較多。

油飯採用泰國香米，即絲苗米，飯米細長而清爽，質感偏硬，粒粒分明。飯粒沾上雞油，特別香口，相比香港好多雞飯店都要加上黃薑先有香味，泰國雞飯單靠雞油就已經夠香口。而雞件已去骨，底部有幾片解膩嘅青瓜，而雞皮偏薄，雞肉入口滑嫩，即使係雞胸肉都依舊軟腍。

醬料內加入薑、青辣椒，所以醬汁於鹹香中係帶有辛辣口感，但將雞肉蘸上特製濃稠沾醬，更鮮美。不過，粉紅色水門雞飯嘅雞肉同綠色水門雞飯一樣，都係稍為欠缺雞味。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 紅大哥水門雞飯先係總店，位於水門市場近The Market商場附近。

❷ 水門市場週邊都綠色水門雞飯，部份24小時營業，但只有1間以粉紅色為主調嘅先係總店。

❸ 乘搭BTS至「Chit Lom」站，徒步約15分鐘即達水門市場一帶。於Google地圖打上「Kuang Heng 水門雞飯」都可以搵到地埗。

❹ 綠色水門雞飯相對較少人排隊，而粉紅色水門雞飯就會比較多人排隊，所以最好避免繁忙時間去。