九龍灣街坊Me Time Cafe隱身工業區大大份牛扒平過對面茶餐廳！

本身Cafe係指咖啡店，亦即係一種給予客人拍拖兩個人放鬆及放空嘅喘息空間。但生活於香港，Cafe一詞變成熱門之後，已逐漸等同於餐廳，連街坊餐廳都叫Cafe。以隱身於九龍灣工業區內嘅餐廳為例，係該區街坊喜愛到嘅餐廳，價錢比對面茶餐廳更平，水準亦更好。

九龍灣工業區一帶選擇唔多，以「Me Time Cafe」命名嘅餐廳，平常食飯時間會唔覺意拉人龍，所以提早少少前往，時間上會比較化算。店內以歐陸式裝潢設計，但實際上只係似一間街坊餐廳，檯櫈密密麻麻如茶餐廳。由早餐到午餐，下午茶到晚餐應有盡有，包含有All Day Breakfast、意粉、扒類、便當等，並非如同一般Cafe只有咖啡或輕食可以選擇。

小店正對知名嘅「大渣哥茶記」，隱身於一幢工商廈內，扶手電梯即可抵達，毗連一間酒樓。當一間茶餐廳賣緊60至90蚊一個餐，甚至過百蚊一份扒餐時；呢間自稱Cafe嘅小型餐廳，亦只係賣緊60至80蚊一個午市套餐，飲品半價，人均埋單只係90蚊。

店內餐牌有西式及日式可以選擇，並非刻意想比較，但茶記港式鐵板餐僅有薄薄牛扒，售價過百，但呢間小店一份相撲手牛扒配燒汁，大大塊牛扒厚切，份量不少。而且牛扒屬肉眼扒，熱焫焫而留有肉汁及肉味，牛扒軟腍唔黐牙，只係賣$78。客人可以自選3成、5成、7成或全熟，同樣可自選珍珠飯、意粉或薯菜，甚至份量多少，附送西湯，亦可自由加上一杯飲品。