【曼谷美食】Siam市中心遊客必到建興酒家？泰式料理乜菜式都有｜Somboon Seafood

講到曼谷最為香港人熟悉嘅泰國菜館，必然係「建興酒家 Somboon Seafood」，而「Siam Square One」就有分店，該商場亦係拍拖兩個人去泰國必去嘅地標。店內最出名係抵食夾大件，而且交通便捷，搵食方便，分店自然人流特別多。以下係編輯多年前嘅入場經驗。

步入遊客必到嘅餐廳，自然要有心理準備，一係人流會好多，二係價錢會唔平，三係份量未必多，四係好少見到當地客人。位於Siam Square One嘅「建興酒家 Somboon Seafood」就係其中之一，雖然曾經有冒牌貨以「建興好」冒充，但無損該店嘅人流。

「建興酒家」雖然一度有唔少好評，被大讚大件夾抵食，但其實理想與現實往往都有一段距離。編輯於2019年入座，已經覺得水平未如評價般好。遊客多、價錢高、份量少、味道一般、無當地客，完全中晒平常香港嘅遊客店特徵，猶如食緊香港嘅遊客店。

據了解，「建興酒家」最值得一試嘅係招牌菜咖喱炒蟹，即Fried Curry Crab，一碟賣420泰銖。上碟時，咖喱炒蟹已拆去蟹殼，方便客人進食，表面有一堆肉碎醬汁遮蓋蟹殼及蟹肉，其實都唔太睇得清隻蟹。咖喱炒蟹係不俗，醬汁係濃稠偏杰身同重味，內有甜味及微微辛辣味，當中亦有黃咖喱、椰奶、蛋等，但似乎醬汁及配料多過蟹，而且醬汁並無浸透蟹肉內，只係淋於蟹肉表面，甚至其中紅油令整碟過於油膩。雖然係小份，但賣420泰銖，會唔會太少蟹肉？到底係邊個KOL第一個吹噓呢間食肆呢？

另外，一小煲冬蔭功Tom Yam Goong就賣320泰銖，貴過水上市場，份量亦較水上市場少。當中，除咗少量蝦肉，亦有茅、青檸葉、蘑菇、辣椒、洋蔥等配料，配搭椰漿、高湯，以及魚露、糖、檸檬汁等，味道最多僅屬正常發揮，無乜大驚喜。炒通菜Morning Glory則賣180披泰銖，即四、五十蚊一碟菜；而最平可能係Rice Cup即「靚仔」白飯，賣30泰銖。