【曼谷美食】耀華力路唐人街夜市9大親民價小食推介！隱藏爆餡麵包／米芝蓮炭烤油條／粿汁！魚翅低至350泰銖！打卡龍頭咖啡！

曼谷唐人街絕對係拍拖兩個人入夜後必訪嘅China Town夜市之一，當中有大量大排檔及車仔檔。十幾年前去泰國曼谷唐人街，食嘅係魚翅燕窩，而家去曼谷唐人街，原來依然係食緊魚翅燕窩，最平只係350泰銖，人均100內有交易！不過，除咗平食名貴食品，現時重有唔少「米芝蓮」級數嘅小吃及甜品，重有啲係曼谷人喜愛嘅小食，即睇E.A.Two去唐人街夜市嘅所見所聞，同時為大家搜羅唐人街受歡迎嘅小食，豐儉由人！

唐人街夜市／China town night market

「曼谷唐人街」位於耀華力路（Thanon Yaowarat），係當地唐人集居地，有超過200年歷史，有「曼谷中國城」之稱，最早可追塑至1782年。大街小巷充斥華人，重點在於三聘街、耀華力路、石龍軍路三條路，亦有唔少曼谷人喜愛前往搵食，皆因當中有一個唐人美食夜市，夜晚尤其熱鬧，唔少攤販前都大排長龍，係當地人及旅客嘅美食天堂。

街道上，最搶眼嘅係多間中式建築商店排屋，以及入夜後嘅霓虹燈招牌，包括密集金行招牌，以及美食夜市上空嘅魚翅燕窩招牌。其中，夜市內燈火通明，五光十色，以小食攤販上嘅「中國城」及「銀都魚翅燕窩」最顯而易見，亦係標誌之作，真正50年不變。

沙維油條／Pa Tong Go Savoey／ปาท่องโก๋เสวย

「中國城」曼谷唐人街雖然以大量街邊攤販為主，但其實當中有好多間獲得「米芝蓮」認證嘅餐廳隱身其中。有一間不時大排長龍嘅小攤檔，只賣「沙維油條」就能吸引好多人大排長龍！

「沙維油條」於傍晚起開始營業，即叫即做，每份50泰銖，可以選擇2款醬汁，早於2018至2019年已經獲得「米芝蓮」星級推介，卻依然價廉物美。全店大概有6款口味，包含有人氣十足嘅斑蘭椰漿及煉奶，亦有草莓醬、巧克力、焦糖、橘子醬，另有一款係賣60泰銖嘅香脆肉鬆與泰式辣醬口味混合嘅油條。

所謂「沙維油條」其實即係油炸鬼，簡單嚟講就係將油條放上炭爐上慢烤，令油條變得外脆內軟。等同將攤凍之後嘅油條重新再整嘅好最佳方法，令油條入口依舊熱焫焫。

炭烤油條之後，油條變成金黃色，然後夾出油條濾油，再切成小塊，放於小盒子內。最後，淋上唔同醬汁即成。E.A.Two挑選斑蘭椰漿及煉奶，一份50泰銖基本上有大概2條平常香港粥店嘅油條，切成8塊，每邊各淋上述2款醬汁。油條表面脆卜卜，內裏卻依然軟熟，但油條嘅油份已於炭烤期間被逼出嚟。大部份醬汁都係偏甜，斑蘭椰漿與煉奶帶有香甜味，為乾身油條帶上點睛之筆。

好吃炭烤麵包／Yaowarat Toast／ขนมปังเจ้าอร่อยเด็ดเยาวราช

全店只有泰文字嘅「好吃炭烤麵包」，只係靠自己強行翻譯，意思係好吃的麵包，不過餐牌上都有英文字翻譯，圖像與英文名稱亦一定能理解。雖然小攤檔未有獲得「米芝蓮」推介，但偏偏人龍不絕，而且大部份都係當地曼谷人。沒料到原來簡單一間炭烤麵包店，原來先至係泰國人最喜愛嘅一間！

據悉，該小攤檔有超過40年歷史，一直只係售賣炭烤麵包，每晚都係曼谷唐人街人氣最旺嘅排隊美食，連外地雜認都以「Yaowarat Toast」推介過。小攤檔只售賣即叫即烤麵包，只需要用紙筆剔上想要嘅口味就得。

目前，炭烤麵包有11款口味，包含有泰式奶茶、牛油砂糖、牛奶、草莓、巧克力、蛋漿、辣醬、橘子醬、鳳梨、咖啡、果仁口味，選擇眾多，以牛油砂糖最受當地人歡迎。每個麵包賣25泰銖，可以揀1款醬料。麵包經過炭烤後，表皮瞬間變得香脆可口，而內裏𠝹一刀後，則加入喜愛醬汁作餡。而醬料份量極多，顏色搶眼，亦屬海量級，打卡必備！

今次選擇2個麵包，分別置入泰式奶茶及草莓果醬，草莓果醬係比較穩陣之選，而泰式奶茶則為獨特嘅選擇。麵包爆餡，一咬入口，醬料溢出，瞬間令整個麵包都沾滿醬料。

陳億粿條／Nai Ek Roll Noodle／ร้านก๋วยจั๊บนายเอ็ก

曼谷唐人街有好多粿條或粿汁店，好幾間都係人氣之選。其中一間就係「陳億粿條」，不僅係當地人選擇，而且由2018年至2023年均獲得「米芝蓮」星級推介，連旅客都喜愛。

「陳億粿條」以嫩滑粿條為主打，入口Q軟，加上胡椒香氣十足嘅湯頭，令人垂涎。粿汁即係豬肉與豬雜混合嘅湯頭，加入豬肉嘅肉香，再溝埋大量胡椒，既無內臟異味，亦帶有肉嘅鮮味。另外，小攤檔亦有豬血湯、燒肉、豬腳等售賣，而粿汁湯分70、100、150泰銖唔同size可以選擇，價格實惠。

紅燒魚翅／XIE SHARK FIN／เซี้ย หูฉลาม เยาวราช

由舊時到現在，一直於曼谷唐人街屹立不倒嘅餐廳必然係紅燒魚翅及燕窩。其中，「謝XIE SHARK FIN」就係最為人熟悉嘅一間魚翅專門店，同時亦係曼谷市內平民魚翅店，不讓高檔魚翅店專美。路邊攤檔都係可品嚐魚翅，而且最平350泰銖就有一碗魚翅羹！

店內魚翅羹分成多款選擇，包括有大魚翅羹、人蔘魚翅羹、魚翅羹、海鮮羹麵、魚鰾羹、鮑魚羹、竹蟶羹、魚翅軟骨羹、魚鰾羹等，甚至炒魚翅、炒魚鰾，魚翅載浮載沉，街邊檔仍然價廉物美，始終都係似回味舊時去曼谷旅遊嘅味道，但若然想堅持環保，不妨揀魚鰾羹。

每份魚翅羹都會同時送上一碟芽菜、大蔥、芫荽伴碟食用，一煲魚翅份量唔多，550泰銖嘅魚翅羹只係最小一煲嘅double份量，剛好係小食多滋味。魚翅原煲上檯，有如港式煲仔飯，小鍋內湯汁滾得㷫烚烚，將魚翅炆得軟腍，滑溜而絲絲有咬口﹐湯汁調味融合魚翅內。將配料再加入湯汁，每魚翅羹更有層次感，香氣四溢，食到最後依舊熱焫焫。

炭烤魷魚／Jay Keng／เจ๊เข่งหมึกย่าง

曼谷唐人街內有好多炭烤小攤，炭烤魷魚嶺係受歡迎之選，每份約40泰銖。而小攤檔內有多款魷魚部位可以選擇，除咗墨魚、魷魚，更有分成墨魚口、魷魚肉、魷魚蛋、魷魚腱等。魷魚經過炭烤後，呈現金黃色，變得更乾身，調味亦特別香口，但入口就偏辣。如果想要一隻大墨魚或大魷魚，價格大概200至400泰銖。

金冠蝦球／หอยจ๊อปูทอง

全店只有泰文字嘅「金冠蝦球」，既係當地老字號，亦曾經被邀請登上曼谷電視美食節目嘅人氣唐人街美食。雖然只係路邊小攤，主打烤蟹蝦球，但就一直屹立不搖。

將螃蟹與河蝦肉拆殼，然後製作成長形肉捲，再掉入鍋內，最後炸度金黃色肉球。每320泰銖有8件，重量大概有300g，份量上亦算足料。另外，餐牌上有顯示多款唔同蟹肉部位，例如係蟹腳肉、蟹鉗肉，都係比較熱門之選，兩者都係賣180泰銖，每180g有8件。經過油炸嘅香脆肉球，蘸上酸甜梅子醬汁後，每口都令人更開胃。

胖老闆下水粿條／Guay Jub Ouan Pochana／ก๋วยจั๊บอ้วนโภชนา

泰式粿條係曼谷唐人街一款回頭率甚高嘅街頭小食，而「胖老闆下水粿條」就係經常大排長龍嘅攤檔。該店擁有逾50年歷史，同時係由2019年至2023年連續獲得「米芝蓮」星級推薦嘅當地人氣店。

有人會稱為泰式粿條，亦有人稱為泰式板條，其實都係同一樣嘢。粿條入口煙韌有咬口，湯汁內有豬肉及內臟，包含有心、肝、肺、胗等，等同台灣夜市見過嘅下水湯。粿條加入胡椒調味，香辣醒胃，可能會比較嗆鼻癢喉。目前，一般小碗粿條賣60泰銖，而大碗粿條則賣100泰銖。

亞綠粿汁／Kway Chap Nai Lek Uan／ก๋วยจั๊บน้ำใสนายเล็ก

曼谷唐人街有好多間受歡近粿汁店，而「亞綠粿汁」亦係三甲之一。「亞綠粿汁」同上述嘅粿汁或粿條店一樣，都係以豬肉、內臟等材料製作粿湯，粉條Q軟，充滿咬口。

店內基本有4款菜式可以選擇，第一種係乜都有嘅粿汁，即係燒肉、豬雜、麵條皆有，賣60泰銖；第二種係同第一款幾乎相同，有燒肉、有麵條，但就無豬雜，同樣賣60泰銖；而第三款就係燒肉加麵條，賣60泰銖；至於第四款就係只有燒肉，賣100泰銖，大概有100g燒肉。有少少唔明，第二同第三其實有咩分別，睇落似差唔多。

湯汁不僅有豬肉香，亦同時有豬雜墊底，再加上胡椒味點綴調味，令湯頭一方面帶上鮮甜味，另一方面亦香濃開胃。不過，湯汁胡椒味極為濃烈，入口辛辣度亦會特別高，最好有心理準備。

龍頭咖啡／Lhong Tou Cafe／หลงโถว

提到曼谷唐人街餐廳，最後不得不提嘅必然係人氣十足嘅打卡店「龍頭咖啡」！E.A.Two編輯早於2019年探索，當時未有被大量旅客發現，只有當地人及少數遊客得悉，但已經需要排隊進入。而龍頭咖啡現時有分店，但唐人街店為總店，分店位於市中心The Market 商場。

由老宅翻新改建而成嘅「龍頭咖啡」，近年搖身一變成為唐人街中薄有名氣嘅打卡cafe。店內外都充滿中式風格，不僅有中式彩繪圖案，亦有霓虹燈牌，更有金屬與木元素混合。不過，最特別之處係當中有一排雙層階梯座位，雖然窄小，上下層木製檯櫈有如樓上有層閣樓，打卡必到！而呢種雙層階梯座位，近一年於香港深水埗西九龍中心頂樓都可以見到。

咖啡店並非只係主打泰式咖啡及奶茶，反而係各款中式清粥小菜、花茶，以及港式點心、各式甜點等，亦算係中式與泰式兼具嘅餐廳。食物及飲品上檯後，擺盤及賣相極為精緻，適合喜愛相機食先及呃Like嘅朋友。不過，想要醫吓肚嘅朋友就可能未必適合，因為價錢比較高，而份量其實唔多。

招牌之選有龍頭炸餛飩 69泰銖、龍頭炸燒賣 69泰銖、黃金炸蝦 79泰銖、鮮蝦春卷59泰銖、蛋黃流心包 29泰銖、馬來西亞炸雞 79泰銖、冬菇麵包 59泰銖、鮮蝦餛飩湯 59泰銖、迷你叉燒包 49泰銖，另有一款中式點心set，一份129泰銖。甜點方面，有榴槤流心包59泰銖、栗子撻135泰銖、中式香橙蛋糕 80泰銖、泰式茶葉蛋糕 50泰銖／2件、檸檬茶蛋糕 80泰銖等。