【東京溫泉】東新宿3間當地人傳統溫泉靜中帶旺！萬年湯／東寶湯／金澤浴場人均僅500円！

香港人去日本旅遊少不免會去浸溫泉減減壓，舒緩疲勞，東京有唔少溫泉好去處，其中新宿就係旅遊熱點。今次編輯就前往距離新宿有一小段距離嘅東新宿，位置靜中帶旺，找尋3間當地人喜愛到嘅傳統溫泉店，難得係人均都只係500円，價錢親民，折合港幣只需約30元，性價比高！

東新宿溫泉﹕萬年湯

東新宿離新宿不遠，靜中帶旺，當中「萬年湯」就係東京一間特色澡堂，環境有昭和懷舊風格。人均收費只需500円，為新派錢湯之一，連《日本winwin企画》都有介紹過，紋身者亦可以進入溫泉浴場內泡湯！

「萬年湯」為一間老店，有近40年歷史，位置毗鄰新大久保，附近日韓美食點眾多，入口則處於小巷內，但已經係3間當中比較光猛。進入浴場前，先將鞋履放於儲物櫃內鎖好，然後就可以買票進入浴場內，價格上算係平價中嘅高級版錢湯。

室內設計似工業風，既有古早時期風格，同時帶有幾分時尚感。溫泉浴場為傳統大眾浴場之一，分男女湯，都為裸湯，每人每次收費500円，可以浸1.5小時。浴場內有4種溫泉可以選擇，包含有あつ湯、藥湯、水風呂、大水風呂。水溫方面，有熱湯、冷水池及按摩浴池，場內有毛巾、沐浴露及洗頭水可供借用。

東新宿溫泉﹕東寶湯

同樣位於新宿大久保中野地區嘅「東寶湯」，係一間比上述「萬年湯」更傳統嘅日式澡堂。室內有唔少當地街坊客，反而未有見到遊客，畢竟此處亦唔算係咩遊客熱門區。

「東寶湯」室內外都係比較陳舊，亦有昭和時代風格，但Google評分偏偏有4分，分數不低，人均收費亦為500円，更令人好奇進入。溫泉浴場位置旁邊有洗衣房，距離「東新宿駅」只有約3分鐘步程，交通便捷，其實比「萬年湯」更方便。

浴場位於階梯之下，光線不多，外連煙囪，室內地方不大，入內先除鞋，並放置儲物櫃，然後買票就可以入內。整個空間比較似一個澡堂，內有高溫風呂、低溫風呂等，更有藥湯，浴場內有沐浴露及洗頭手可供借用，毛巾需付費使用。而每日都會有獨特藥浴，比如當日係備長炭，水溫適中，水質滑溜。不過，街坊澡堂同外面嘅溫泉浴場有少少分別，唔能夠有太大期望。

東新宿溫泉﹕金澤浴場

第三個位於東新宿一帶嘅浴場為「金澤浴場」，同上述「萬年湯」及「東寶湯」一樣，都係錢湯之一，而「金澤浴場」同「東寶湯」亦同樣係比較傳統陳舊嘅日式澡堂。

相對於上述兩間溫泉浴場，呢間「金澤浴場」位置更為偏僻，只係離遠會見到好大支煙囪，需要拐多幾個彎先會到達。浴場旁邊設有洗衣房，進入浴場後，同樣先於門口除鞋，並將鞋履放入儲物櫃內，先進入買票。

據悉，「金澤浴場」於1964年已經營業，為昭和時代公共浴場之。每次人均價格為500円，澡堂內地方不算大，乾淨程度還算不俗。浴場內有高溫浴池、小型按摩浴池、中型浴池，冷熱水都有，水溫頗高，但水質亦醇，浴場內有沐浴露及洗頭水可供借用。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ JR山手線至「新大久保駅」／「新宿駅」、中央総武線至「大久保駅」、或メトロ副都心線／大江戸線至「東新宿駅」，徒步5至15分鐘即達萬年湯。

❷ 都営大江戸線至「東新宿駅」，徒步約3分鐘即達東寶湯。

❸ 都営大江戸線至「東新宿駅」，徒步約5分鐘即達金澤浴場。

❹ 留意萬年湯最後入場時間為營業結束前30分鐘，付款方式只接受現金。