【東京自由行】東京行李置物櫃通常喺邊？全自助行李櫃使用指南｜附大中小櫃租借費用

去東京旅遊，航班時間與酒店check in時間未必配合，但拍拖兩個人又唔想浪費一分一秒。事實上，東京街頭有好多行李置物櫃可供租借，非常方便，放低行李就可以開始行程。今次就講吓行李置物櫃嘅位置，同自助租借方法、費用，即刻睇睇有咩需要注意！

行李置物櫃對於遊客嚟講係一個重要之物，大小通常分為大型、中型及小型，尺寸任君選擇。到東京旅遊，就要知道邊度有行李置物櫃，其實大多數地下鐵車站都有行李置物櫃，不過人流高嘅車站大多好快就無晒位。當日亦見到有遊客唔識用行李置物櫃，今次編輯就一次過講吓行李置物櫃如何使用，以及各項租借費用。

一般來說，新宿駅、東京駅、淺草駅等都係旅客暫存行李嘅熱門車站，就算該車站嘅置物櫃數量較多，通常都會被塞得滿滿。所以想要有空置嘅行李置物櫃，最好預早時間，一大清早會比較穩陣，否則前往其他車站置物櫃擺放厚重行李會較好。

今次編輯以上野駅為例，基本上同樣有分大、中、小嘅尺寸，價格上分別為400円、500円同700円，紅燈表示已有置物，而綠燈則表示可以使用。小型置物櫃基本上只可以擺放小袋，大小大概係以前中學生用嘅儲物櫃。

如果要擺放行李喼，應該只可以用大型置物櫃，而中型置物櫃則擺放背囊之類大小之物，或者勉強可放極小型行李喼，至於廿幾吋行李喼，則少不免要放大型置物櫃。以上野駅行李置物櫃為例，大型置物櫃有大概120個，所有置物櫃合計其實都有逾300個。

首先將行李放入所選置物櫃，於精算機上確認要擺放嘅行李置物櫃編號，擺放行李時要於系統上點選存放。關上櫃門後，再於精算機上確認所選編號及付款，系統會將置物櫃鎖上，最後取出票券作證明。取出行李時，只要使用票券上嘅QR code即可，或者用同一張支付嘅電子卡取行李，所以謹記要收好票券同電子卡，以及留底，以免最行拎唔返行李。