松屋8月終登港！總公司直營插旗佐敦還原牛肉飯實試3點與日本分店有別！

等候多時，香港區「松屋」千呼萬喚始出來！由日本總公司直營嘅「松屋（Matsuya）」於8月中正式登陸香港，並選址佐敦區，對視日本為鄉下嘅香港人絕對係恩物，就算情侶拍拖兩個人唔係成日可以飛去日本，都可以食到日本版嘅燒牛丼啦！即刻睇吓E.A.Two實試「松屋」香港店，雖然大致上係還原日本「松屋」，但原來都有3點係同日本分店有分別呢！

被譽庶「牛丼御三家」之一嘅「松屋（Matsuya）」，由1996年成立後﹐轉瞬間已經成為日本著名連鎖牛肉飯快餐店，價廉物美，深受丼飯迷歡迎。早幾個月官方就宣佈會於今年夏天登港，並會由總公司直接營運，以維持「松屋」牛肉飯水平，同日本分店睇齊！

同日本店一樣，香港「松屋」都係採用自助點餐及取餐模式，食完都係由客人自己將餐盤歸還至「返卻口」。不過，香港人同日本人始終有分別，香港「松屋」之所以經常大排長龍，並唔係因為真係極多人，而係因為香港人自助點餐實在太緩慢，大部份人都係行到去點餐機先至慢慢逐項睇同諗食乜好！細心留意一下，其實入面係有多餘座位，只係點餐嘅人進度緩慢。

香港店內牛肉飯同日本店大致相同，但就多咗一款$35「最完美的牛肉飯」，價格相宜，相信有機會變成糧尾之選。除咗牛肉飯、泡菜牛肉飯、泡菜燒牛五花飯、咖喱飯，亦有早晨定食可擇，不過當中編輯最鍾意嘅都係「松屋」嘅燒肉定食！

燒牛肉定食$59至84、生薑燒牛肉定食$69至94﹐「M」字即係「Mega」份量，畀多廿蚊左右，肉量多兩倍，兩者都無燒牛肉飯套餐，有沙律、味噌湯，加$15重可以將味噌湯換做豬肉味噌湯，味噌湯肉味濃郁，更有蔬菜甜味，絕對係昇華版味噌湯。

燒牛肉上檯後，第一時間就係將醬汁倒下，令燒牛肉片更惹味！而生薑燒燒牛肉就無須要落醬汁，皆因本身已經有濃稠醬汁。片片燒牛肉油香四溢，肉質軟嫩，充滿肉汁，的確恍如喺日本食「松屋」嘅感覺。由日本團隊打理真係寧舍不同，只要香港「松屋」唔係好似香港「Sukiya」咁變港式頹飯，唔係改為香港團隊做，我哋自然會繼續去食！