【澳門景點】打卡童話風粉紅城堡／葡式花磚！加思欄花園、葡文學校毗鄰新舊葡京酒店

澳門嘅葡萄牙建築一向吸引唔少遊客，除咗知名景點大三巴、龍環葡韻等，其實市內重有好多隱藏葡式建築物，值得拍拖兩個人去參觀及打卡。其中﹐新舊葡京酒店附近就有僅存葡國學校，另一端更有充滿童話風格嘅粉紅城堡，馬上睇睇打卡位置！

新葡京酒店 vs 葡京酒店

喺澳門亞馬喇前地交通交匯處對面，同時見到兩間酒店，兩間都有娛樂場，大門口同樣寫有「葡京」二字，到底有咩分別？事實上，一間寫住「葡京酒店」，另一間則寫有「新葡京酒店」。

相信各位年輕人對「新葡京酒店」比較熟悉，以荷花狀為主題設計，外形就似足火炬，甚至有尖刀、金錢、變色蛋等裝飾。而「新葡京娛樂場」其實比酒店早一年落成，賭場內有角子機、賭檯。酒店則於2008年方才開業，設有431間客房。兩者同樣座落澳門半島南面，交通便捷，酒店大樓係全澳門第二高建築物，僅次於「澳門旅遊塔」。

至於毗連「新葡京」嘅「澳門葡京酒店」，就係歷史較悠久嘅酒店，皆因酒店建於1970年，目前依然有老澳門時代風格，陳舊裝潢中散發淡淡歷史韻味，依然係澳門重要地標。酒店外觀係比較懷舊，以鳥籠為主題，具有中葡建築風格，包含有水晶吊粒、馬賽克裝飾，舊有「葡京酒店」嘅文化色彩比「新葡京」其實還要濃烈。除咗鳥籠造型，內裏亦有鐮刀、天花壁畫裝飾。

該酒店設有926間客房，原來比「新葡京」嘅房間多1倍！澳門酒店通常都設有娛樂場，「葡京酒店」亦唔例外，本身就設有4間賭場、1個角子機娛樂場，而外牆同樣有變色燈飾，而賭場就較澳門其他賭場傳統，屬老牌賭場。據悉，「葡京酒店」於初建時，商場環形迴廊曾經有唔少妓女企街招攬生意，吸引唔少賭客圍觀，部份更會落注。情況就好似馬匹同馬迷嘅關係一樣，所以呢一帶曾經被稱為「葡京沙圈」，直到2015年澳門掃黃行動後，「沙圈」先至轍底瓦解。

澳門葡式建築（1）﹕澳門葡文學校

澳門有好多葡式建築物，毗連「新葡京酒店」嘅「澳門葡文學校」就係重要葡萄牙建築，因為呢間學校係目前澳門唯一依然保留葡萄牙教育制度同語言嘅學校。學校其實係由幾間學校合併而成，包括利宵中學、鮑思高學校、葡文小學、商業學校，屬非牟利私立學校。不過，遊人一般係唔可以進入學校範圍，只能夠從外觀察，唔少遊人都被學校外牆嘅葡式花磚吸引，紛紛到門前打卡。

澳門葡式建築（2）﹕加思欄花園／南灣花園

距離「澳門葡文學校」、「新葡京酒店」、「葡京酒店」不遠，另外重有一個隱藏級打卡景點！雖然只係一個小公園，但其中就有一座宛如童話風嘅粉紅城堡，打卡必到！

呢個「葡京」背後嘅小公園﹐叫做「加思欄花園」，又名「南灣花園」，處於東望洋新街以下、兵營斜巷側。公園地方唔算大，但都有超過6000平方米，附近曾經有前身為「聖方濟各修道院」嘅「加思欄兵營」，故此旁邊嘅小公園就直接叫做「加思欄花園」，目前已獲得澳門政府評定歷史價值。

「加思欄花園」於葡萄牙文中叫「Jardim de S. Francisco」，中文譯名主要來自「Francisco」，主要係由於清代時有個略懂中文嘅「聖方濟各修道院」葡萄牙神父，同中方人嘅誤解，神父將葡文名稱讀出，中文譯為「法欄思加」﹐但由於當時西方同中方書寫方式唔同，一個左至右，另一個就係右至左，而最後又有人將「法」字刪走，最後就變成「加思欄」。

呢個公園早於1860年代建成，係澳門第一座花園，花園以歐陸式風格設計，大致上係呈長方形。本身花園可以遠眺南灣海景，但現時已被樹木及建築物遮擋，故變成自成一角嘅花園角落。「加思欄花園」由DR. Mario Soares／Matias Soare（蘇雅士）設計，上下分成三層，中間設有一個噴泉，由東望洋新街可穿過花園下行至南灣大馬路。

整個花園以桃紅外牆及欄杆圍繞，上面高處中間更有粉紅色圓塔小樓建築，宛如葡式花園內嘅一座粉紅城堡，pink pink建築相當搶眼，少女心爆發，各位雌性物體不妨停低打卡！純粉紅色嘅建築物呈圓柱形設計，樓高兩層，週邊都設有圓拱形門窗，牆上唔單止有皇冠裝飾，重有獨特花紋。原來呢座建築物前身係歐戰紀念館，紀念一戰嘅陣亡葡軍士兵。不過，現時該大樓屬「開心樂園協會」會址，亦即係澳門傷殘人士協會，遊人係唔准進入。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭巴士6A、6B、17、28C、H1至「加思欄花園站」或2A、6A、8、8A、9、9A、12、28B、H1、H2至「八角亭」即達。

❷ 加思欄花園圓塔並無對外開放。

❸ 葡京酒店、新葡京酒店都設有「發財車」，可以免費乘搭，但舊葡京酒店車只係來往外港客運碼頭、海立方。

❹ 乘搭巴士路線2A、3A、3AX、3X、6B、7、8A、9、9A、10X、11、21A、22、23、25、25AX、25B、26A、28A、32、33、39、50、50B、52、71、73、101X、H1、MT1、MT2、MT5、N1A、N1B、N2、N3、N5至「亞馬喇前地站」，對面就係葡京酒店及新葡京酒店。