【曼谷機場】點只Magic Garden！DMK廊曼機場設2大美食廣場！SRT地鐵路線中途超平價Food Court！

有留意E.A.Two嘅朋友應該知道我哋曾經介紹過曼谷BKK機場嘅24小時美食廣場，今次於曼谷另一邊嘅DMK機場，其實同樣有能夠拍拖兩個人前往嘅平價美食廣場可以選擇。而DMK機場並非只有一個Food Court，機場內竟然有兩個Food Court！

DMK「廊曼國際機場」同BKK「素曼那普機場」無異，同樣於機場一隅設有美食廣場，本身都係員工餐廳，只係可以容許旅客用餐。雖然前者嘅Food Court並非如後者一樣24小時營業，但最特別之處就係一個機場內竟然有兩個Food Court。

BKK機場嘅美食廣場叫「Magic Food Point」，叫做「機場奇跡美食街」；而DMK機場亦有一個美食廣場叫「Magic Garden」，同樣叫「Airport Street Food 機場奇跡美食街」。兩個機場嘅美食廣場消費方式如一，都係要先到「THAI Street Food」櫃檯購買一張現金卡，然後再到想去嘅餐廳消費。至於儲值幾多錢，就自行決定，如果你想要消費500泰銖，就直接同櫃檯職員講500泰銖嘅現金卡，就算只係消費100泰銖都無問題。是日只係試咗99泰銖嘅芒果糯米飯，入咗100泰銖，淨返1泰銖就無退卡啦！不過，機場美食廣場嘅芒果糯米飯﹐真係同其他地方嘅差天共地。

「Magic Garden」餐廳選擇數量頗多，由連鎖店到當地美食應有盡有，包括KFC、Burger King、Subway、Pepper Lunch、Chester’s、Potato’s Corner，亦有地道菜式食店，例如羅勒為主題嘅食店，亦有冬蔭功麵、泰式豬肉、打拋豬肉飯、芒果糯米飯、泰式船麵、雞肉飯、豬手麵、泰式沙律，甚至有粥、日本菜、韓國菜、中式點心、兩餸飯、西式Cafe、素食等。而Food Court座位都有好多，基本上唔需要擔心無位坐，亦有足夠空間擺放行李，唔使怕行李箱阻住條路。美食廣場近入境大堂一隅，會見到「Sleep Box」嘅地方，其實就係一個俾旅客休息嘅地方。

然後下行至入境大堂，向SRT紅線方向走，可以通往停車場方向，經過停車場後會穿過一條隧道，中途會見到DMK機場另一個價格更低廉嘅美食廣場！呢個Food Court叫「Magic Food Park」，地方較小，只有十零間選擇，但幾乎每一間都係地道泰國菜式，而且價格真係低得難以置信！如果離開曼谷前經DMK機場，身上淨返嘅泰銖又唔多，建議前往呢個美食廣場，可以臨上機前作最後衝刺，又可以歎到地道泰式美食！

「Magic Food Park」其實只有13間食店，每一間都係以泰文為主，同樣係地道菜式，並無連鎖店可言。餐廳包括有售賣果汁、泰式甜品、兩餸飯、雞肉飯、米粉湯、木瓜沙律、泰式船麵、泰式豬頸肉、雞肉湯、叉燒飯、泰式炒河、泰式炒飯等。基本上，人均60至70泰銖就有一大碟飯，或者係一碗湯麵。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 近機場入境大堂嗰邊嘅food court選擇較多，地方較大；但近SRT紅線嗰邊嘅food court地方較小，但價格就較低。

❷ 留意DMK food court並非24小時營業，購買現金卡只限當天使用。

❸ 美食廣場同BKK嗰邊嘅food court一樣，都係需要先去櫃檯買卡，先可以去想去嘅餐廳買嘢食。

❹ 張卡可以退返錢，但建議先計好自己要用幾多，然後直接入幾多錢落張卡度﹐避免又要等一輪做退卡手續。