【曼谷交通】DMK廊曼機場背包客必選！實試全新SRT紅線直達市區、轉線快定BKK機場線方便？

以往香港去曼谷乘搭廉航，只能以BKK機場為目的地，但從2024年4月底起，香港廉航有新航點，拍拖兩個人可以直飛曼谷DMK機場，更省時！此外，現時曼谷更有全新SRT紅線，旅客可從機場直出市區，今次E.A.Two就實測從DMK機場經地鐵接駁BTS出返市區。到底DMK機場定BKK機場更方便呢？

現時由香港直飛曼谷，唔單止可以去BKK機場，亦可以直飛DMK機場。BKK即係「素萬那普機場／蘇凡納布機場」﹐而DMK就係「廊曼國際機場」。一般從BKK機場落機，可以乘搭ARL機鐵線﹐由「Suvarnabhumi站」直達「Phaya Thai站」﹐中途可以於「Makkasan站」轉車，經MRT藍線「Asoke站」前往BTS淺綠線「Asok站」，若要前往市中心，可以經BTS淺綠線前往「Siam站」。

本來要從DMK「廊曼國際機場」係需要於機場入境大廳5號出口乘搭曼谷A1、A2機場巴士，先可以出市區，前往BTS「Mo Chit站」就需要20分鐘車程，車費本身要30泰銖。但現時全新SRT紅線已經開通，所以可以經被稱為曼谷機場快線嘅SRT紅線通往市區，比以往更方便。

DMK「廊曼國際機場」其實早於1914年已經啟用，而BKK「素萬那普機場／蘇凡納布機場」就於2006年起啟用，以大眾嚟講係取代咗舊機場，但舊機場就演變為各地廉航集中地。直到2024年4月底，香港廉航都加入DMK為新航點，機票比BKK平一大截，絕對係背包客福音！

今次E.A.Two於曼谷DMK機場落機，從機場徒步至全新地鐵線SRT紅線，可以直出市區，交通比以往更方便！只要於機場2樓向紅色火車頭logo進發，經內線航廈同美食廣場，穿過空中行人天橋，就可以前往SRT「Don Mueang站」，即可以登上紅線列車。不過，要留意兔仔卡係未能乘搭SRT，換言之必須要用現金買票。

要經SRT紅線出市區，可以走兩條路線，其中一條係經另一條全新MRT粉紅線，再轉往BTS淺綠線；另一條就係經SRT紅線直抵MRT藍線，然後轉往BTS淺綠線。今次以「Victory Monument站」為目的地，試試從DMK機場出發直入市區！

事實上，乘搭SRT紅線於「Don Mueang站」出發，都可以有兩條路線。第一條係直接經SRT紅線到總站，即「Bang Sue站」，需搭7個站。然後轉車至MRT藍線，於「Chatuchak Park站」落車，就可以轉往BTS「Mo Chit站」，此路線可以經人氣十足嘅「恰圖恰市集」，最後先經BTS淺綠線至「Victory Monument站」。SRT紅線到總站所需時間為22分鐘，人均需33泰銖；轉往MRT藍線需8分鐘，人均20泰銖；再轉往BTS淺綠線則需10分鐘，人均40泰銖。

今次E.A.Two選擇走另一條路線，先走SRT紅線，然後轉MRT粉紅色線，再轉往BTS淺綠色線，呢段路線紅線同粉紅色線站數較少，而BTS線站數則較多相對嚟講係用現金散紙買飛較少，而使用兔子卡就較多。今次從DMK機場出發，先乘搭SRT紅線，2個站就可以轉乘MRT粉紅線，車程僅約9分鐘，人均車費為18泰銖；轉乘MRT粉紅線之後，又乘搭1個站，就可以轉往BTS淺綠色線，車程僅約3分鐘，人均21泰銖；最後乘搭BTS淺綠色線，車程約需28分鐘，人均約55泰銖。

簡單嚟講，經SRT紅色線轉MRT粉紅色線，再轉往BTS淺綠色線，車程同BKK啡色機鐵線轉BTS淺綠色線差唔多。DMK兩條路線車程分別約40至50分鐘，而BKK機鐵則為26分鐘，但人流就會較多。至於車費，來往BKK啡色ARL機鐵線就需要45泰銖，計埋BTS淺綠線都唔需要100泰銖。至於發車時間，其實兩者每班車都係大概需要等待10至15分鐘，而列車時間就大概由05:30至00:00。

其實從DMK機場離開，乘搭SRT紅線，再轉乘MRT粉紅線或MRT藍線，最後再轉乘BTS淺綠線，雖要徒步一段路。比如係SRT紅線至MRT粉紅線，需要經行人天橋先可以抵達，所以DMK機場都算係拉喼不宜嘅路線，否則應該會比較麻煩。換個角度睇，正正因為無咁方便走動，所以基本上係無咗拎行李嘅旅客，人流就會比較少，路面亦無咁多人同行李箱。對於背包客嚟講，DMK呢條路線絕對係百利而無一害！