即叫即炸平價韓式炸雞店隱身石門京瑞廣場！GG Chicken 雞吧自選醬汁、製作需時XX分鐘

香港嘅炸雞店數量唔算多，但都有好多隱藏小店值得拍拖兩個人選擇。石門京瑞廣場樓上有一間韓式炸雞外賣店，除咗有即叫即炸嘅炸雞，重有多款醬汁可以自由選擇，套餐最平竟然只係$40！

石門京瑞廣場本身有好多間本土小店可以選擇，但今時今日睇住一間又一間忍唔住結束營業，入口地下週邊變成非本土嘅食店，實在令人唏噓。不過，京瑞廣場樓上其實依然有幾間小店可以選擇，今次前往一間E.A.Two曾經摸過門釘嘅炸雞店，該店為「雞吧 GG Chicken Bro」。

「雞吧 GG Chicken Bro」顧名思議主打係雞，而且係炸雞，點餐後需要等待半小時左右，因為炸雞係即叫即炸。據悉，該店係來自於一群90後年輕人，由幾個年輕人共同開設，而店內當日就只有一個人打理，估計係輪流睇舖。炸雞可以配搭唔同菜式，當中有頗受歡迎嘅炸雞卡巴，一份$55起，可以配搭唔同醬汁，例如自家製沙律醬、牛油果醬、青檸蒜香、墨西哥蕃茄醬、千島醬。醬汁可以蘸埋小食，例如墨西哥脆片$58。店內亦有炸雞飯$55、煙燻黑椒牛肉飯$58，而平日更有超平價飯餐可擇，每份只係$40，CP值頗高！

如果多人用餐，可以直接點外送套餐，沙田區可以免運費，有炸雞、沙律、小食、汽水等，由3至10人都有，適宜Party享用！講到招牌GG炸雞，有3種size，分別有4件、8件、12件，價格為$44、$80、$108，只可配單款口味醬汁。另有炸雞杯$36，只限點醬，而半半炸雞$98／10件、$142／16件，可以揀兩款口味醬汁。而乜醬都有炸雞拼盤$208，就有24件炸雞，所有點醬都有。

就算一至兩個人，都一樣有套餐可擇，包括一人炸雞套餐$56，包含4件炸雞、一款點醬；一人美式炸雞套餐$56，包含2件雞髀炸雞；一人卡巴套餐$64，包含雞肉卡巴；而豐禮二人套餐$159，就有10件炸雞；超值二人餐$108，有8件炸雞，包括兩款點醬或一款淋醬。每一款套餐都有小食，分別有薯條或地瓜球等，亦有汽水。今次E.A.Two點選超值2人餐$108，除咗有8件炸雞、兩款點醬，亦有蘑菇飯或滷肉飯、薯條、汽水。薯條係粗身薯條嚟，簡簡單單，蘑菇飯就同「很得輝」嘅蘑菇飯有好大分別，佢重點係黑椒汁，而非真係蘑菇汁，黑椒味極濃厚，甚至係帶有辛辣味，黑椒味幾乎完全遮蓋其他味道。

至於主角炸雞，呢份套餐係8年炸雞，無得別部位選擇，就係一件又一件雞件，每件都係無骨雞肉，所以可以放心大啖咬入口。炸雞外脆內軟，呢一份感覺似美式炸雞多於韓式炸雞，炸雞色澤金黃，炸得偏乾身，不過食太多都係有啲滯。炸雞用氣炸鍋翻熱後，表皮依然酥脆可口，雞肉則質感軟嫩，雖然外面係乾身，但內裏亦有保留到肉汁。不過，整體似乎無特別醃過，味道係比較淡。大概係因為需要配搭醬汁，所以炸雞唔會太重味。

醬汁選擇不少，分為點醬同淋面。如果係即食，淋醬就無乜所謂，但若然係有一段時間路程，點醬就比較適合，因為用氣炸鍋為焗爐翻熱都會欠缺少少質感。點醬有蜜糖芥末、車打芝士、麻辣蜂蜜、青檸蒜香、港式沙嗲、明太子醬、黑松露蛋黃醬、美式香草牛油、泰式是拉差醬；而淋面就有韓式甜辣、火辣熔岩、蒜香蜂蜜牛油、柚蜜檸檬、黃金鹹蛋、雪山芝士、香辣紫菜。比較受歡迎嘅係甜辣、柚蜜、黑松露蛋黃醬等，或者係因為最穩陣，今次我哋挑選青檸蒜香、美式香草牛油，後者無乜太大驚喜，反而前者就令人忍唔住一啖又一啖食，醬汁香濃，青檸、蒜味唔算太厚，但就可以解去炸雞油膩感。