【曼谷咖啡店】IG網美摩洛哥風Cafe！打卡粉紅階梯／仙人掌水池／沙漠造景！徒步可達、經麥當勞叔叔／Mario主角雕塑像！｜FO SHO BRO

平常好多網媒或Foodie都會推介唔少曼谷打卡咖啡店，講到IG網美必到，拍拖兩個人好容易去之類，但其實大多數都係交通不便嘅地方。E.A.Two絕對唔建議去曼谷call車出入，如果BTS唔到嘅打卡點，一律唔建議前往，除非搵到比較安全嘅導賞團。今次E.A.Two前往一間勉強可以經BTS抵達嘅網美咖啡館，以摩洛哥風格設計，現場到底係咩情況呢？

如果以Siam為市中心起步點，「FO SHO BRO Cafe」都算係偏遠嘅咖啡店，單單乘搭BTS都要至少20至25分鐘，再經BTS天橋下行至小路前往咖啡店，步程亦要15至20分鐘，其實BTS「Udom Suk站」或BTS「Bang Na站」都可以前往咖啡店，但時間上值唔值得就由讀者自行決定。

今次E.A.Two於BTS「Udom Suk站」落車，回程時返回BTS「Bang Na站」，發覺咖啡店位置剛好位於兩個站之間，但從天橋來往咖啡店嘅話，後者就比前者更接近。無論從邊個站出發，落天橋之後都係要經過「23 Soi Sanphawut 2 Alley」呢道小巷，該路段係馬路嚟，有機會有大車，所以要小心出入。

沿途會見到一個童趣美食廣場，入面唔單止有麥當勞叔叔雕塑像，亦有比較罕見嘅Mario主角雕塑像，打卡必到！然後徒步至「Sukhumvik 68」路口，轉左入小巷，徒步約200米就會見到「FO SHO BRO」網紅咖啡店！留意入口唔太明顯，前面會先見到一個停車場，後面先係正式入口，門口不時會見到當地人係坐電單車出入，幾個人坐一架車其實都幾危險。

曼谷「FO SHO BRO」近年轉瞬成為網美必到打卡咖啡廳，好多前往該店嘅女士們，都係影相比飲咖啡重要。今次E.A.Two前往該店，發覺地方顯然不大，就只係似平頂洋房，但分隔成唔同空間，中間係主要室內點餐同用餐地方，前面係入口，而室內空間前後都係造景打卡位，擺設頗多。

甫踏入「FO SHO BRO」門口，映入眼簾嘅就係一個階梯式小水池，一旁有，藤椅、刺繡毯等，週邊都係斑駁粉紅磚牆，大概由外到內都係貫徹摩洛哥風格，門前有草地、石階，入面有棕櫚樹、仙人掌、綠植盆栽等，加上沙漠風格幾特別。該店將沙漠造景同咖啡館結合，裝潢獨特，雖然感覺唔算複雜，現場感覺有啲殘舊，甚至有啲蒼涼，但影相的確幾有視覺效果，絕對要日光時份前往，如果黃昏時面向昏黃光線，畫面會更優美！

只要推門進入，就可以到櫃檯點餐，室內同樣有各式石造建築設計及仙人掌等綠植裝飾物，加上圓弧線條、馬賽克磚牆等，分別在於有冷氣開放，戶外就只有風扇。室內造景雖然不失摩洛哥風格，但感覺較偏向藝術風格，皆因有唔少藝術畫作。

店內基本上以咖啡為主，只有極少量輕食，都係蛋糕，包括自家製檸檬芝士撻、藍莓芝士撻、蘋果金寶，同埋最受歡迎嘅自家製拖肥批。今次挑選一杯Beach Babe、一杯Peach Mojito，前者係椰子咖啡，後者就係加入果肉嘅蜜桃咖啡，每杯都係180泰銖。椰子咖啡好順滑，有少少椰子肉，咖啡唔會太苦澀，但相對上次連鎖店嘅層層分別嘅椰子咖啡就爭少少，呢杯真係咖啡，而嗰杯唔覺似一杯咖啡。至於蜜桃咖啡入口就比較香甜，入面所謂嘅果肉就係罐頭蜜桃果肉，如果唔太鍾意咖啡苦澀味，可以揀加入蜜桃味，帶有香甜味會比較容易入口。

走到餐廳另一端，沿途會發現每個空間都係座位區，顯然平常人流不少，盡頭位置更有一大張檯，似搞聚會活動專用。旁邊更有粉紅磚牆樓梯，可以登上2樓，頂端係真正盡頭位置同咖啡店最高點！上方可從較高位置觀賞外面市景同日落景，金黃色光線灑落時畫面更美，就好似從沙漠中找尋水源一樣。而階梯另一邊就係剛才入口嘅小水池，就似沙漠中見到嘅海市蜃樓一樣，見唔到又觸摸唔到。