澳門限定Sanrio Characters 夢幻花園登陸北區！走勻4個地方、打卡6大角色！係值得定中伏？

Sanrio迷召喚！喜愛Sanrio Characters嘅朋友，今次要拍拖兩個人去澳門打卡啦！皆因最近Sanrio同澳門聯乘，喺澳門北區設置多個卡通打卡裝置，只要走勻4個地方，就可以影晒6大Sanrio角色，到底呢次澳門限定嘅「Sanrio Characters 夢幻花園」係搶鏡定係中伏呢？等E.A.Two又再為大家直擊報道！（記得碌到最底睇真心話！）

最近，Sanrio同澳門當地經濟及科技發展局、澳門北區工商聯會聯乘，令「Sanrio Characters 夢幻花園」正式登陸澳門北區，當中有2組大型打卡裝置，分別位於2個地方，另外亦有連綿百幾米嘅打卡牆同關口公仔。今次經澳門巴士101X前往，先抵達青洲大馬路，再徒步至附近嘅青洲坊蓮花廣場，然後去旁邊嘅李寶椿街盡頭青茂口岸澳門邊檢大樓出入口，最後再去到祐漢街市公園，就可以去晒4個主要地方﹐打卡6大Sanrio角色。各Sanrio Characters包括有Hello Kitty、My Melody（My Sweet Piano）、Cinnamoroll（玉桂狗）、Kuromi、Hangyodon（水怪）、Gudetama（蛋黃哥）唔單止有大型打卡裝置，亦有攤位遊戲、舞蹈表演，更有快閃見面會、消費抽奬、主題巴士等。

當日就唔見有任何Hello Kitty主題巴士，只能夠走過4個打卡裝置。於「台山街市站」或「青洲/嘉應花園站」落車，即抵達連綿約百米嘅Sanrio Characters海報牆。建議巴士抵達「青洲/嘉應花園站」時，準備定拍片，就可以影到呢段百米Sanrio Characters海報牆，然後於「台山街市站」落車，折返原路就會返轉頭。

然後向「青洲坊蓮花廣場」方向走，即達其中一個大型Sanrio Characters打卡裝置。今次活動展覽大致上分成兩邊，呢邊以Hello Kitty、My Melody、Kuromi為主，只有呢3個角色嘅打卡裝置。當中3位角色嘅巨型雕塑像都係企定定喺度畀大家合照打卡！不過，呢3個角色基本上都只係得一個大型雕塑像，無乜特別，感覺同澳門當地係毫無關係。比如Hello Kitty隔離只係一架鋪滿花卉嘅木頭車，My Melody背後就係粉紅巚樹，而Kuromi後面就係一個有唔少花朵嘅噴泉，似乎只係同花有關係。由於時間太早，所以連攤位遊戲都未開放公眾參與。

接下來可以向青茂口岸澳門邊檢大樓方向走，轉個彎就會見到另一個打卡位。位置係李寶椿街盡頭，抬頭就會見到一個Hello Kitty大頭，公仔喺出入口扶手電梯上面，而條橋玻璃就貼有Sanrio角色，其實呢個位都真係無乜特別可取之處，行過剛才Hello Kitty、My Melody、Kuromi打卡裝置，咪轉個彎睇埋囉。

最後，只要繼續前往「祐漢街市公園」，就會搵到另外幾個Sanrio Characters嘅打卡裝置，位置就係「祐漢街市」旁邊。呢邊就係玉桂狗、水怪、蛋黃哥，同樣因為時間太早，攤位遊戲未到下晝都唔會開放，所以基本上只可以影吓角色雕塑像。從展覽可見，主辦單位係比較重視玉桂狗、水怪、蛋黃哥，因為呢3個明顯地同澳門主題有關係，而且雕塑像有嘢互動吓，唔係單單得一個雕塑像企喺度畀人打卡。比如玉桂狗就係同澳門葡撻有關係，變成一個焗葡撻嘅地方，個人可以企入去打卡；而蛋黃哥就有一條隧道，而隧道另一邊就有一幕雞蛋牆，同澳門雞蛋仔有啲關係；至於水怪，就有各式杏仁餅之類手信，都係同澳門當地受歡迎嘅特色美食有一定關係。

簡單嚟講，對於鍾意玉桂狗、蛋黃哥、水怪嘅朋友﹐或者都算可以一去；但對於鍾意Hello Kitty、My Melody、Kuromi嘅朋友嚟講，唔好專登去啦，反正主辦單位都唔多重視呢幾個角色。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 祐漢街市公園、青洲坊蓮花廣場遊戲攤位裝置開放日子為4月5至6日、12至13日、18至21日、26至27日，即週六至週日，時間則為14:00至18:00。目前加開幾日，4月18日、4月21日、 5月2日、 5月5日、6月2日、 10月1至2日、 10月7日都有遊戲攤位及禮品換領。於4月19至20日、 5月3日、5月4日及5月31日、10月1日、10月2日、 10月7日，祐漢街市公園16:30至17:00有舞蹈表演。於青洲坊蓮花廣場就有快閃見面會，到時會見到Hello Kitty、玉桂狗、Kuromi，免費入場。4月18日有玉桂狗，6月1日有水怪，7月6日有玉桂狗，8月3日有Kuromi，9月7日有水怪，10月5日就有Hello Kitty，屆時必須要預早30分鐘攞入場證進入，先到先得，派完即止，1張證可以畀4個人合照。

❷ 打卡位置全部都位於澳門北區，當中有青洲大馬路、青洲坊蓮花廣場、李寶椿街、祐漢街市公園，建議順序走。

❸ 祐漢街市公園位於澳門巿場街，主要係打卡Cinnamoroll玉桂狗、蛋黃哥、Hangyodon水怪，而青洲坊蓮花廣場就係主要打卡Hello Kitty、My Melody、Kuromi。

❹ 至於Hello Kitty主題巴士於2025年4月底先有5月1日先開始有得預約乘搭，至於幾時有就要睇緣份，架車會經過6個地方，比如係青茂口岸、近關閘口岸嘅菜園新街、東方明珠、祐漢街市公園、逸園、東方海岸。