近油麻地廟街街頭！紅伶飯店逾50年潮州菜老店？打冷麻甩味重、有無可取之處？

潮州菜館以鑊氣小炒、打冷菜式為主﹐多數都係麻甩味濃嘅地方，其中有一間香港老字號嘅潮州菜館，由佐敦搬到油麻地，開業有超過50年，歷史悠久，曾經係唔少男男女女拍拖兩個人打冷嘅地方，但亦曾一度面臨結業，即睇目前水準如何！

目前，「紅伶飯店」座落近油麻地廟街街頭，樓高2層，地方唔算細。該店近年先重開，保留返舊時大排檔潮州打冷風味，適合一班朋友吹水食飯。呢間潮州菜館近年於油麻地重開，已經由第二代接手，繼續提供上一代嘅招牌作，例如係滷水鵝、芥辣墨魚片、蒜蓉炒蔔薯苗、生醃賴尿蝦、蠔餅等。

就算唔堂食，該店都有特價外賣飯盒選擇，例如滷水鵝飯$56、滷水雜錦飯$56、潮州鹹茶門鱔飯$49、韭菜豬紅飯$46、支竹羊腩飯$95等，價格都算合理。而店內嘅打冷菜式眾多，例如潮州反沙芋、潮州凍蟹、潮州薄殼、椒鹽水九肚魚、紅燒乳鴿、黃金雞軟骨、石窩馬拉盞通菜等，都係潮州打冷菜式、鑊氣小炒為主。

其實「紅伶飯店」整體係標準潮州菜，但就唔係特別高分嘅選擇，就只係正常打冷之選。據悉，該店嘅滷水汁係來自於陳年滷水膽，一份馳名滷水鵝$139，滷水汁的確將表皮滷得有光潭，就似焦糖色一樣，但滷水汁入口並唔算濃郁，比較淡口，未能夠完全滲入鵝肉。該店嘅滷水鵝份量並唔多，下層皆為滷豆腐，不過滷水鵝肉質感就好嫩，而且肥瘦適中。

冰鎮芥辣墨魚片$119 係該店頗受歡迎嘅選擇，堂食會比較冰爽，外賣係缺少冰涼感，但質感其實無乜太大分別。墨魚片就似平常刺身，只係輕輕灼熟之後就拎去急凍，切功唔差，唔會太薄身，亦唔會過厚，入口係新鮮同爽口。外賣墨魚片感覺同冰鎮無乜太大分別，唔似會突然高咗一個level。反而配菜潮州甜酸菜就稍有驚喜。墨魚片配搭芥末同醬油，芥末唔辣，而醬油內就只係加入麻油，所以墨魚片除咗芥末味，重有少少麻油香。

蠔餅係潮州菜為人熟悉嘅選擇，其中店內嘅馳名煎蠔餅賣$89，不過外賣蠔餅凍咗質感必然有變，所以我哋並無冒呢個風險。所以最後只係點選蠔仔肉碎粥，小份$42、中份$82、大份$108，原來係最穩陣嘅選擇。蠔仔粥份量十足，外賣飯同湯分開上，大概係以免飯粒吸晒湯汁。粥內有蠔仔同香蔥，蠔仔量適中，有鮮味，唔會好腥，鮮甜可口，湯底有啲似芫荽湯。