承豐道隱藏漩渦形純白觀景台！公園毗鄰啟德體育園／Airside！清靜海濱長廊180度瞰港九東西維港景！一條路線穿梭空中花園＋郵輪碼頭公園！

近年，啟德一帶吸引唔少人流，「啟德體育園」就係人流聚集嘅地方，而最近其實重有一個隱藏「啟德體育園」同「啟德郵輪碼頭」之間嘅賞景觀景台。該觀景台設計既似一個漩渦，亦可以連接「啟德空中花園」走道、可以180度眺望港九東西維多利亞港景色同煙花景嘅「啟德海濱長廊」，甚至一條路線直達「啟德郵輪碼頭」，人流稀少，沿途環境清靜，適合拍拖兩個人散吓步。

Airside／啟德體育園

九龍城啟德一帶係來自於舊「啟德機場」，時而勢易，大幅土地已經搖身變成大型體育設施。「啟德體育園」目前已經正式啟用，唔單止設有50000座席嘅主場館，更設有「啟德體藝館」、「啟德零售館」。由「Airside」商場出發，穿過啟德車站廣場，徒步可以抵達多用途體育場館，一隅亦有一個「美食海灣」，連接700米長嘅「啟德體育大道」。比較搞笑嘅係「啟德青年運動場」，夜晚11點後入場跑步係需要收費。

場館內有唔少美食可以選擇，但值得去嘅小店並唔多，以「啟德體藝館」為例，入面嘅小店就只有「真章魚無雙x TEA BASARA」，而「啟德零售館」則有「兩姊妹涼皮×株式會社」、「牛角J」、「和平飯店」。

承豐道公園

「啟德體育園」地標建築明顯，該主場館建築物旁邊原來有一個全新開放嘅隱藏賞景觀景台，公園更可以連接「啟德海濱長廊」，甚至「啟德碼頭公園」。該公園為「承豐道公園」，顧名思議就係座落承豐道內，位置都係來自於舊「啟德機場跑道」，即係啟德東岸最北端。

啟德「承豐道公園」於最近先正式開放，座落啟德河畔、啟德體育園，佔地有超過1.5萬平方米，而公園都係依啟德河水流而建，採多功能設計。雖然公園旁邊嘅啟德河係來自於明渠進口道，但據悉整個公園設計概念曾獲得一個本地設計大獎，真係乜都有可能發生。

該公園最大特色應該係甫踏入公園入口就見到嘅觀景台，整座觀景台樓高3層，以純白色設計，係一個大型漩渦形層層疊觀景台。從「啟德體育園」前往，依承豐道下行，即達「承豐道公園」內嘅觀景台。從觀景台俯視，可以180度瞰東區方向風景，包括鯉魚門海岸線、土瓜灣避風塘，甚至遠眺啟德舊機場跑道景色，視野亦算開揚，適宜觀賞日出、日落，甚至夜景，不過目前就未能走上最高一層。

沿旋渦形觀景台向下行，轉瞬就能抵達公園地面，原來觀景台唔容許單車進入，但下面公園長廊就係單車路。「承豐道公園」既有行人路，亦有單車路，人流並唔多，最多嘅就係釣魚客。一隅有一條殘舊小橋，呢道橋大概就係啟德一帶罕有保留嘅地方，其他大部份都已經拆晒。河畔步道並唔算好長，大概只係有320米長，對岸就九龍灣，可以眺望舊九展、Magabox商場等。

啟德空中花園

如果去「承豐道公園」，其實可以上行至「啟德空中花園」，不過當日公園盡頭就未有開放，所以被逼行出馬路，去到「啟德海灣」先可以返入行人路。「啟德空中花園」係依「承豐道」而建，一直由「承豐道公園」延伸至「啟德郵輪碼頭」，連綿有約1.3公里。空中花園雖然中後段可以俯視「維多利亞港」景色，但中段就可以直接下行至「啟德海濱長廊」，可以沿海旁散步。

雖然呢段路叫做「空中花園」，但左右兩邊都係波浪形隔音屏障，而且樓宇密密麻麻，就好似兩幕屏風牆，感覺侷促。呢一段路其實無乜特別，只係用作穿梭「承豐道公園」至「啟德海濱長廊」同「啟德郵輪碼頭」。整段路比較特別係頭尾有「13」同「31」字樣，象徵舊啟德機場嘅一三跑道同三一跑道。

最特別之處，係近末端位置有個紅白格仔嘅建築物，呢座建築物原來大有來頭，亦係舊「啟德機場」罕見完整保留嘅建築物。呢幢建築物樓高兩至三層，係舊機場消防局，但目前就以圍欄包圍，所以係唔可以進入參觀。而空中花園盡頭，就係曾經用作隔離營嘅啟德方倉，目前係空置當中，不過又仍然未有拆卸。

啟德海濱長廊

「啟德空中花園」中途可以下行至「啟德海濱長廊」，全長大概只係500至600米，背後多幢私樓。「啟德海濱花園」可以180度賞「維多利亞港」景色，由東至西風景一覽無遺，由土瓜灣避風塘到鯉魚門海岸，甚至能夠眺望筲箕灣、小西灣方向。而中區CBD等地方亦清晰可見，中環、金鐘、灣仔、銅鑼灣等建築物亦能夠一覽無遺，估計重可以觀賞煙花！

海濱長廊人流唔多，環境清靜，岸邊有木櫈，可以靜靜哋睇「維多利亞港」風景，飽覽維港東面至維港西面景緻。不過，盡頭位置就未有開放，亦唔可以直接走到「啟德碼頭公園」方向。所以中途必須原路折返「啟德空中花園」，依步道繼續前往「啟德碼頭公園」。

啟德郵輪碼頭跑道公園

呢條路線最終點就係「啟德郵輪碼頭」跑道公園，原先呢個位置有大片草地同1:1飛機，更加係拍拖兩個人野餐好地方。但目前依然有大座啟德方倉，所以依然未有大草坪，只可以上行至巴士總站上蓋嘅「啟德郵輪碼頭」頂層平台花園。

「啟德郵輪碼頭」目前已經好少有郵輪停泊，頂層平台被打造成跑道公園﹐只係剩返好少草地畀人野餐。而平台盡頭就係舊「啟德機場」跑道，昔日飛機就於此處起飛。盡頭可以遠眺將軍澳、鯉魚門、茶果嶺，亦可以眺望筲箕灣、柴灣、小西灣方向。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭巴士路線20A、22D，於「承豐道公園站」落車，徒步1分鐘即達公園。

❷ 該「承豐道公園」其實毗鄰「啟德體育園」主場館，但就唔可以直接從主場館或「啟德體藝館」穿過去，一定要兜大街道先去到，經承啟道先可以轉到入承豐道。

❸ 「承豐道公園」可以連接「啟德空中花園」同「啟德海濱長廊」，盡頭可以去到「啟德遊輪碼頭」。

❹ 單車路有飲水機，沿途可以斟水。

❺ 目前「啟德海濱長廊」唔可以連接「啟德碼頭公園」，中途必須上返「啟德空中花園」。而「承豐道公園」單車路原來有條斜路可以直上空中花園。

❻ 「啟德碼頭公園」有巴士路線折返市區，20A、22、22M分別可以來往九龍灣、土瓜灣等市區。

❼ 「承豐道公園」頂樓目前上唔到，只係可以去到中層。