捷運內湖站出發走碧山巖行山路線！270度高空賞台北景、眺台北101！打卡白石湖吊橋／同心池／夫妻樹／圓覺瀑布！一條路線走大溝溪步道治水園區！

去台北旅遊，好多人拍拖兩個人來來去去都係去嗰啲景點，今次E.A.Two就帶大家去行山，而且遠離遊客區，走到新北內湖區。內湖近郊係一條非常容易穿梭嘅行山路線，山頂位置有一個隱藏賞景位，可270度從高空環瞰台北風景，直接遠眺知名地標台北101。然後，再打卡吊橋、瀑布等，走過治水園區，大多數都係下行路段，係一段初級路線，新手適宜！

E.A.Two路線﹕

捷運內湖站＞碧山巖＞白石湖吊橋＞同心池＞夫妻樹＞圓覺瀑布＞大溝溪溪畔步道＞大溝溪生態治水園區＞捷運大湖公園站

碧山巖

從捷運內湖站出發，可以轉乘公車路線直達公車上嘅「碧山巖站」，落車就係「碧山巖牌樓」，然後徒步約3分鐘即達「碧山巖開漳聖王廟」，沿途稍有上斜路段，因為係向山上走。「碧山巖牌坊」上有李登輝親題嘅「義烈垂範」匾，穿過牌坊就可以上行至寺廟。據悉，櫻花季前往更可以觀賞及打卡粉紅櫻花階梯，在地人話恍如穿越櫻花隧道呢！

「碧山巖」其實係一座寺廟，座落碧山尖峰山上，被群山環繞，由唐末起有過百年歷史，既係內湖區大廟，亦係全台最大嘅聖王公廟。寺廟內有好多浮雕、壁畫、樑畫，供奉住開漳聖王陳元光，當時曾經係漳州人守護神﹐屹今一直香火鼎盛，開漳聖王銅像威武莊嚴，而週邊都係各石像，包括岳母精忠報國刺字、桃園三結義、慈母園等。

寺廟三面環山，背靠忠勇山，前臨鯉魚山，遠眺淡水河，俯視梯田、金龍寺。「碧山巖」一隅可270度賞景，既可眺望「台北101」大樓，亦可俯瞰「松山機場」、「圓山大飯店」、「南港」，以及台北東區一帶景色，無論日光定夜色時份，台北萬家燈火風景盡收眼底。

台北嘅寺廟入面竟然有間咖啡店，該咖啡店位置為地下室，名為「碧山巖藝文休閒中心」，由2017年建成至今。可以坐低飲杯咖啡，靜心欣賞山下台北風景，名副其實觀景咖啡亭。更特別嘅地方，係該地下室咖啡店並無餐牌，亦無指定收費，反而係一杯自由定價嘅咖啡，畀客人自行入錢落錢箱。雖然話自由定價，但大部份台灣人每杯咖啡都係入TWD100起落錢箱，入面滿滿紅噹噹嘅台幣。

「碧山巖」側邊有石室小廟，唔單止吸引民眾爭相膜拜，係內湖人嘅信仰中心。寺廟週邊亦有唔少步道。既可以通往「忠勇山」，亦可以下行至「白石湖吊橋」、「鯉魚山」、「圓覺寺」等，路線都係唔少在地民眾喜愛散步嘅地方。

白石湖吊橋

從「碧山巖」寺廟折返原路，下行不足300米路程，就會抵違內湖打卡必到嘅「白石湖吊橋」。穿過吊橋，更可以前往草莓園，採摘草莓，品嚐草莓，適合情侶或一家人前往旅遊散心。

沿途基本上並非複雜山路，只要依循瀝青路走，就可以抵達「白石湖吊橋」，路段都係馬路嚟，車輛可以抵達。該吊橋於2010年先正式開放通行，吊橋前後路線全程都係一星山路，新手適宜。

「白石湖吊橋」全長其實只有116米，被髹成紫羅蘭色，呢種紫色極其搶眼，令吊橋更吸睛。吊橋有「台北天梯」之稱，係台北市首座跨距吊橋，恍如天空步道。吊橋以直路式設計，無懸吊高塔，但穿過時唔會晃動，同一般吊橋稍有分別。事實上，吊橋座落龍穴之上，側邊睇落似一條飛龍，就似一條紫色巨龍，難怪在地人曾稱為「龍骨吊橋」。

不過，有指「白石湖吊橋」於2024年底暫時封閉，所以有可能未能前往參觀。如果想走呢條路線，依碧山路走同樣可以前往草莓園、「同心湖」等地方。

同心湖、夫妻樹

穿過「白石湖吊橋」，經穿秋步道前行約270米，會到達「同心湖」、「後湖濕地」。週邊有唔少草莓農莊同草莓園，比如係「碧山草莓園」、「內湖草莓園」、「白石湖觀光果園」，屆時可以採摘草莓，亦可試試草莓下午茶，以及參與DIY活動。若然冬季上山，12月至5月期間走過呢段山路，更可以一嘗草莓園嘅香甜草莓。「同心湖」旁邊有一座「永結亭」，象徵住戀愛永結同心，情侶必到！

「同心湖」週邊都係田園風景，橋台下就係小湖景，從上而下觀望會發現呢個湖係一個心形，而心形就係以一朵又一朵花朵組成。由「同心湖」再向前走，200米左右距離就會見到「夫妻樹」。

事實上，「夫妻樹」只係有兩棵相對而立嘅大樹，兩棵好似相連咁，在地人認為好似一對相敬如賓嘅夫妻，恩愛依偎住對方，互補不足，幸福滿瀉！「夫妻樹」位置鄰近「同心池」，都係情侶、夫妻二人打卡必到嘅地方。

圓覺瀑布

從「夫妻樹」折返碧山路，轉入「圓覺寺步道」，可以前往下一個景點「圓覺瀑布」。路段其實只係一直向下行，簡單易行，但就需要小心留意有無車輛駛過。「圓覺寺步道」之間可以見到「福德祠」、「峰碧山圓覺寺」，寺廟依山而建，面朝「鯉魚山」，背靠「圓覺尖」，沿途亦可以俯視內湖山下風景。

步道內隱藏一道「圓覺瀑布」，距離「圓覺寺」不遠，同時座落於大溝溪上游位置，旁邊有瀑布涼亭，日治時期曾經係內湖八景之一。瀑布有30米高左右，係硬岩雙條型細絲瀑布，下面有唔少巨石，唔算特別守偉，但環境清靜。整座瀑布恍如白簾般，涓涓而下，走過瀑布時，可見瀑布一直洗滌巨石，就似洗滌身心靈一樣。

山林中嘅瀑布清爽舒適，令人心曠神怡，如果夏天前往呢段健行步道，瀑布就令人有消暑感覺，所以內湖區呢條行山路線春夏秋冬四季皆宜。

大溝溪生態治水園區

由「圓覺瀑布」下行，依「大溝溪溪畔步道」走，大約30分鐘就可以抵達「大溝溪生態治水園區」。整個園區地方唔算太大，大概只係得705平方米，遍佈草原盆景，畫面一片綠油油，就似天然草毯。「大溝溪生態治水園區」生態豐富，情侶或一家大小都可以去親近大自然。

由上游徒步到下游，自然會到達「大溝溪生態治水園區」，沿路大致上就係簡單山路，並唔複雜。留意中段落到近下游時，會有分岔路走向河流左右兩端，但其實兩邊都係一樣，同樣可以折返園區出入口。

治水園區路段就係依溪畔而走，水質清澈，綠而盎然，流水潺潺，徒步週邊可以漫步散心，係踏青好去處，係內湖後花園。旅行就要有不一樣經歷，唔一定要走過知名景點，或者只係去台灣夜市。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭捷運啡色動物園至南港展覽館線，至「內湖站」落車，於2號出口出站，徒步至金湖路，轉乘公車「小2含區」路線，可以直達內湖「碧山巖」，人均車費只需TWD7，車程僅需10分鐘。

❷ 建議下載公車app，既可以睇到時刻表，亦可以睇到公車幾時抵達。該路線有指定出車時間，平日同假日時間並唔一樣。

❸ 據悉，目前「白石湖吊橋」有可能暫時封閉，如果想行呢條路線嘅話，可以依循車路徒步前往，基本上整條路都係走「碧山巖」下面嘅「碧行路」行就得。路線同樣可以經「圓覺瀑布」、「大溝溪」，終點為「大湖公園站」。

❹ 呢個方向係先搭車後行山，另一個方向係從捷運「大湖公園站」出發，然後經「大溝溪」徒步上行，最後到「碧山巖」。不過呢個方向就比較辛苦，所以建議直接搭車上「碧山巖」，再下行落山路。