【澳門景點】輕軌站出發！逾400年聖地牙哥炮台古堡搖身變酒店！探索媽閣炮台／聖雅各伯小堂！海事博物館近月重開免費參觀！

澳門最西點嘅就係輕軌媽閣站，甫出站就係西灣湖景大馬路堤圍，徒步即達一間古堡酒店，呢個位置竟然隱藏咗一個炮台同一間小教堂。而附近固然有媽閣廟，而同一個地方就有一座近月先正式重開嘅海車博物館，拍拖兩個人無需入場費，可以免費進入參觀！

媽閣景點（1）﹕聖地牙哥炮台古堡

由澳門輕軌「媽閣站」出發，徒步至迴旋處，1分鐘後就可以去到「澳門聖地牙哥炮台古堡」。事實上，呢座建築物現時係一間可以預訂入住嘅五星級酒店，毗連澳門西灣民國大馬路，據悉入面只係得12間套房提供。

酒店入口正對迴旋處，建築設計係採用葡萄牙風格，連大門口都保留咗昔日嘅葡式拱門，以及小徑迴廊，酒店建於1629年，其實係改建自昔日嘅炮台古堡，係由當時葡萄牙國王興建嘅澳門軍事防衛系統。事實上，呢座建築物於80年代先正式改為酒店用途，而2004年曾翻新擴建，並於2007年重新開業。而酒店目前就有一間頗古樸味濃嘅餐廳「Os Gatos」，如果需要用餐先可以進入教堂，可以飲杯咖啡。

舊炮台古堡正對西灣湖，17世紀嘅舊城堡變成酒店，有超過400年歷史，單單入場時就見到有舊式石牆同花紋拱門，隧道又有一幅幅壁畫，一磚一瓦都滲出復古味，而上層就有異國風庭院，好似古堡花園，恍如穿越歐洲。

媽閣景點（2）﹕媽閣炮台

而進入酒店之前就會見到一座「媽閣炮台」，皆因「聖地牙哥古堡酒店」本身就係來自於一個軍事防衛系統。呢座炮台又叫做「聖地牙哥炮台」，座落「媽閣上街」內，又叫做「西灣炮台」或「媽閣炮台」，係當地文物建築之一。舊古堡嘅歷史可追溯至1629年，來自於澳葡政府，當時唔單止有堅固圍牆作軍事防線，亦曾經有16門大炮對住個海。現時，炮台正對西灣湖，地下前行可以見到「澳門旅遊塔」同「西灣大橋」，甚至眺望澳門「內港」同「珠江」海域。

據悉，炮台城牆原先長約110米，闊有40米，平台比海面高約3米，更設有碉堡，為內港提供一個防禦用途。其實以前中間重有個蓄水池，以及畀約70個官兵所居嘅營房，下層更有有軍械糧食貯藏庫。

地理位置上，炮台座落澳門半島南端，位於媽閣山之下，炮台依山而建，目前炮台對出其實係填海而嚟。最早期可以追溯至1622年，本身只係一座小型炮台，直到1629年先建成呢座「聖地牙哥炮台」。本身呢度係軍事禁區，直到葡萄牙駐軍於1976年正式撤離。炮台於葡萄牙駐軍離開兩年後，先準備修復，並改為古蹟酒店用途。現時酒店門口旁邊依然有炮台遺跡，

媽閣景點（3）﹕聖雅各伯小堂

而於「聖地牙哥古堡炮台」內，更隱藏一座神秘小教堂！原來呢座小型教堂就隱身於現時酒店範圍內，名為「聖雅各伯小堂」。如果想要參觀該教堂，必須要走入酒店內，而且要穿梭上層餐廳，先可以走入去教堂。教堂以紅色屋頂配白牆，加上黑色木門，簡約而樸實。

「聖雅各伯小堂」於1740年已經建成，教堂對比炮台未有咁耐，但都有285年歷史。事實上，教堂本身就係畀居於炮台內嘅官兵祈禱朝拜嘅宗教場所，入面奉祀嘅係聖雅各伯，即係聖地牙哥，佢係葡萄牙嘅「戰神」，簡單啲就係一座天主教堂，供奉住天主教嘅聖人。想要免費進入參觀，可以於每年7月25日前往，皆因呢個日子會開放教堂畀信徒朝拜。

細心會發現教堂入面供奉嘅聖雅各伯穿上葡國軍服，佢手上就拎住把長劍同鐵盾，皆因呢個地方始終係一個軍事重地。除咗聖雅各伯雕像，亦有花地瑪聖母、伊莎貝皇向嘅瓷磚圖像。小教堂地方細小，但感覺精緻，古樸典雅，而且有幾分神秘色彩。

媽閣景點（4）﹕澳門海事博物館

隨後，可以從「聖地牙哥古堡炮台」徒步至「媽閣廟前地」，一隅自然會見到「澳門海事博物館」。而呢座博物館於2025年4月底先重新開放，目前容許公眾免費進入參觀，可以了解中葡海事歷史。「澳門海事博物館」於1986年建成，翌年開放，曾經閉館，最近期就係今年4月底重開。博物館係一座展覽大樓，入面展覽廳有大量珍藏品。

呢座博物館於1919年曾經係海事及漁業博物館，後來二戰閉館，最後於1987年建成呢座海事博物館，建築物本身依然滲出葡萄牙特色，但90年代搬遷到現時地址之後，建築物就似簇新建築，變成無咩特色。