【東京景點】日暮里7大好去處！夕陽之階隱身谷中銀座商店街樓梯！諏方神社／谷中堂貓衛門／貓町打卡！長明寺＋谷中靈園＋天王寺五層塔賞櫻勝地

東京知名景點不少，香港人最鍾意去嘅地方莫過於新宿、池袋、秋葉原、淺草、東京鐵塔等等，而由成田機場出發，必然經過「日暮里駅」。今次E.A.Two就逛一逛日暮里一帶，而其實呢個車站週邊有唔少值得拍拖兩個人逛逛嘅景點，到底除咗「日暮里纖維街」，呢一帶重有咩地方呢？

E.A.Two曾經走過「日暮里駅」徒步可達嘅「日暮里纖維街」，呢條街全長有1公里，聚集咗約90間紡織品店舖，一直有大量布料售賣，價格低廉，係一眾DIY人必到掃貨嘅目的地！詳情請留意之前關於「日暮里纖維街」嘅報道。

而「日暮里駅」另一邊其實重有更多景點可以前往，例如徒步約3分鐘即達嘅「諏訪大社」。呢個神社係比較少遊客前往嘅地方，週邊清靜，門口都唔係朱紅色鳥居，而係一座古老神社模樣。據悉，呢座神社入面有四社，主要係祭建御名方神、八坂刀賣神，簡單嚟講係水神同風神。該神社係全國「諏訪大社」嘅總本社，亦係日本歷史最悠久嘅神社。

接下來，可以徒步至「谷中銀座商店街」，無論當地人定外國人都能夠感受當中熱鬧氣氛。前往商店街之前，會先見到「経王寺」﹐呢個地方最為人熟悉嘅就係有種植紫藤花。

進入商店街之前，會見到一條小階梯，從Google地圖會見到呢個位置係叫做「夕陽漸漸」或「夕陽之階」，亦叫做「夕陽階梯」，其實就只係一條商店街斜坡。呢個位置可以俯視商店街，街景一覽無遺，甚至可以遠眺「日暮里」一帶市區風景。若然黃昏時份前往，更加可以欣賞絕美日落景色。

「谷中銀座商店街」係一條觀光必到嘅景點之一，當中充滿下町風情。其中，「ZAKURO Lamp House」為頗受遊客歡迎嘅店舖，主要係售賣土耳其燈飾；重有創於明治41年嘅「竹工藝」，入面有唔少竹製產品裝飾。而其他店舖亦多數以歷史老店為主，包括約70間商店，例如雜貨店、餐廳、咖啡店等。

商店街入口處附近有一間「長明寺」，櫻花季時會見到當中有棵盛開櫻花，櫻花垂落，一枝枝垂櫻隨風飄搖，風景優美。雖然只有一棵櫻花樹，但櫻花景象唔輸蝕於之後前往嘅櫻花勝地。而商店街同時係唔少日本當地著名日劇或電影嘅拍攝場地，當日我哋就見到有團隊進行拍攝工作。

「日暮里」一帶有一個獨有特色，就係「貓」，又叫「東京貓街」！細心啲就會發現當中有唔少貓嘅裝飾，除咗商店街有以貓為主打嘅商店，另外以貓為主嘅餐廳就有「谷中堂」、「貓衛門」，以及附近街道，重有間叫「貓町」嘅店舖，但後者當日去到就乜都見唔到。

去「日暮里」一帶觀光，必然要去賞櫻勝地「谷中靈園」，呢個地方同時係「天王寺五層塔」遺址。大街上左右兩旁明顯種植咗一棵又一棵櫻花樹，可以想像樓花完全盛放時，畫面會非常壯觀，難怪係賞櫻名所！雖然係欣賞櫻花嘅好地方，但其實原本係一個墓地，入面包含有日本知名政治家同文人長眠嘅墓園，所以週邊環境都係比較清靜。