荃灣罕見真地踎大排檔！食得喜小廚正對三棟屋博物館！椒鹽鮮魷／滷水鵝／酥炸蠔餅／小炒皇

以前食大排檔係因為價錢平，但今時今日食大排檔無幾百一千都難以埋單，恍惚係一種由低消費變成高消費嘅文化。拍拖兩個人去食大排檔其實一直都唔係好抵，份量多而菜式選擇少，平均價格就好高，所以大排檔係一大班朋友聚會先至比較適合。如果有朋友想食大排檔，不妨揀荃灣呢間老牌地踎大排檔，位置正對三棟屋博物館，起碼仍然有得揀。

位於荃昌中心地下一隅嘅「食得喜小廚」，座落「三棟屋博物館」對面，由2011年開業至今僅有約14至15年，唔算係老牌大排檔，只係舊時曾經因為電視效應而為人熟悉，其實一直都係街坊食堂。只不過至少係香港人僅存嘅地踎大排檔，所以要留意夜晚踏入某個時間就會特別多客人排隊入座。

該店係以大排檔式小炒為主打，份量夠大，鑊氣十足，所以情侶前往未必好好。大排檔必須要多人夾單先會抵食，份量有得share，價錢又有得share，更加可以食到多款小炒。

入得大排檔，飲嘅當然係本地啤酒，例如藍妹啤酒$36、森堡啤酒$24、hoegaarden$43、百威啤酒$32、青島啤酒$23、健力士啤酒$35，大大支啤酒夠霸氣又夠飲。如果唔飲酒，可以選擇汽水，但略嫌無支裝汽水，只有罐裝汽水，所以索性飲鹹檸七$28，對於大排檔嘅油膩菜式嚟講係更有解膩作用。

店內菜式選擇眾多，例如椒鹽鮮魷$138、椒鹽九肚魚$108、豉椒鵝腸$118、椒鹽蝦$118、客家蛋卷煲$118、魚肚浸勝瓜$138、豉油雞$138半隻、沙拉骨$108、小炒皇$108、滷水鵝例牌$108、香蒸馬友$188、生煎鹽香馬友$188、台式炸蚵仔$118、花雕浸鵝肝$98、紅燒乳鴿$48、孜然寸骨$128、酥炸蠔餅$108、西蘭花炒龍躉球$188、椒鹽白飯魚$128、啫啫時菜煲$118、啫啫雞煲$98、豉汁蒸大鱔$148，重有古法秘製羊腩煲、四川麻辣雞煲、打邊爐等等。

本來想食潮州蠔餅，但原來店內嘅蠔餅係一款獨特嘅酥炸蠔餅。大大碟蠔餅用脆炸方式炮製，顯得上檯更有氣勢。不過係有啲失望，蠔仔量唔算好多，最多算正常，可以接受。但脆皮份量佔多﹐將麵粉同蠔仔炸物一齊，麵粉將油吸晒，所以特別油膩，好快已經食到好滯，類似魚露嘅醬汁好似都無乜大作用。反而，椒鹽鮮魷真係非常驚喜，金黃色薄薄脆皮只係黏住魷魚，而魷魚量亦多，件件都有一定厚度，椒鹽唔會好鹹，味道適中，加上微酸醬汁更加可以解膩。

去大排檔係會想食平常難以食到嘅菜式，例如有個煲字嘅乜煲物煲。今次就選擇咗啫啫雞煲，上檯時就有啫啫聲，但好快就消失晒，好似唔夠熱。雞肉量唔算好多，唔知點解我哋嗰煲特別多雞轉彎，即雞翼轉角位，恍惚雞膶量比雞肉更多。不過，食得到雞肉真係嫩滑同入味嘅，而精華就去晒菇同乾蔥度。至於豉汁蒸大鱔就比較平凡，屬於標準水平，份量同味道同「濃姐茶餐廳」碟頭飯相近。