【東京美食】倒茶即開花！新大久保全新樓上咖啡店人氣極高！韓國城最美蘋果花茶打卡必備！

東京打卡美食眾多，近月有一間受到日本網紅歡迎嘅咖啡店，原來只係上年中先開業，E.A.Two於今年初前往，亦只係剛剛好可以入座，室內客人一個接一個。單單一杯心思十足嘅蘋果花茶，就值得拍拖兩個人朝聖，甫斟入熱茶，一片片蘋果片竟然恍如花朵般綻放，IG打卡必備！

日本東京新大久保一帶向來被稱為「韓國城」，一向係潮流美食集中地，週邊滿滿韓國菜，唔少日本人都喜愛去歎韓式美食。由JR「新大久保駅」出發，徒步5分鐘就可以抵達咖啡店；而地下鐵「東新宿駅」徒步約7分鐘，亦可以去到呢條小巷。

近月，新大久保內就有一間2024年7月先開業嘅咖啡店，室內以淡蘋色設計，加上木系裝潢，質感樸實，係樓梯比較狹窄。店內唔單止有咖啡、蛋糕甜點，更有一款識得開花嘅新鮮蘋果茶，話題度極高，令人驚艷。

該咖啡店位於韓國城小巷內，名為「Oyoppi Coffee／オヨッピコーヒー」，旁邊係本格和牛燒肉店「仁川家」，咖啡店入口雖然位於地下，但就需要上行樓梯，點餐處同座位全部都位於2樓。據悉，平時有機會需要排隊入座，但當日E.A.Two就剛好遇上唔使等候，更好彩有窗口位。

一杯Cafe Mocha 650円，咖啡有凍有熱可擇，其他咖啡都係差唔多價錢，咖啡水準不俗，建議配搭芝士蛋糕等甜點，留意到好多客人都會點巴斯克芝士蛋糕。另外，一杯Fresh Apple Black Tea 850円，只有熱飲，呢款係人氣最高嘅飲品。

店員會清楚講明將熱茶倒入去就會開花，新鮮蘋果茶分開上檯，一邊係片片堆疊好嘅薄切蘋果，另一邊就係一壺熱焫焫紅茶。將熱茶緩緩注入茶杯中時，一片片蘋果就好似花朵開花一樣逐漸自然綻放，視覺效果令人驚喜，畫面非常療癒！

呢款新鮮蘋果茶真係好有誠意嘅心思作，生蘋果片切得超薄，一開始切成花瓣狀，貼得好實，但當熱茶喺中間慢慢倒入花瓣內時，蘋果片就神奇地展開成一個花形。難得係紅茶本身都好有茶香，配合新鮮蘋果就滲出陣陣果香，又唔會好甜膩，質感天然。一壺熱茶大概可以斟到兩至三杯蘋果茶，都算份量適中。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

❶ 乘搭JR至「新大久保駅」，徒步約5分鐘即達，而乘搭地鐵至「東新宿駅」，徒步約7分鐘亦可到達。

❷ 人均預算大概1000円至2000円就得。

❸ 咖啡店無得預約，所以只能先到先得入座。

❹ 該店接受現金或信用卡付款。

EATWO

Miss A