來自中環、一個字﹕辣！德哥廚房鴨脷洲重開轉賣車仔麵！爽脆藤椒魚皮最大驚喜！

中環有間以中餐為主打嘅「德哥廚房」，質素可見一斑，受到唔少該區市民歡迎，今年新年後該店就轉移陣地，搬到鴨脷洲小島內。而鴨脷洲店就以「德哥麵」命名，直接轉型做車仔麵，到底有邊款小食係拍拖兩個人不得不試呢？

該新店位於鴨脷洲邨「西邨街市」內，實際位置就係街市側，而街市鄰近巴士總站，都算交通方便。「德哥麵」固然以車仔麵為主打，車仔麵就係自選粉麵，但最低消費係$36，即係2餸1麵，麵類係$18，車仔餸就分$8、$10、$13，換言之最低消費係一款$8同一款$10再加粉麵。

如果拍拖兩個人去食，E.A.Two另有建議，其實點一碗最低消費嘅2餸車仔麵，然後可以再點一款全場最大碗嘅德哥招牌大盛湯麵$63，包含有蘿蔔、豆卜、豬軟骨、五香牛腩、紅腸、花枝丸、魚蛋、爆汁包心豬肉丸、咖哩豬皮、生菜、雞翼、鮮牛肉、豬紅，合共有13款車仔餸，share返其實會抵過叫兩碗普通車仔麵，又可以sweet住share食。

大碗車仔麵上檯一刻都算霸氣，第一下覺得好似打邊爐，第二下覺得有啲似中式盆菜。而麵條中，比較特別嘅係日本有機蒟蒻粉絲。不過，腸胃較差嘅讀者就要留意，呢款麵條未必係你適合食嘅選擇，因為蒟蒻本身係纖維豐富，亦唔容易消化，腸胃唔係咁好嘅話，好易會引致胃痛。

除咗有腩汁、沙嗲汁、咖哩汁、蒜辣汁，重有靈魂辣汁，可以揀麻酸辣。講咗咁耐，都未提到呢間小店嘅主打，其實佢主打就係一個字﹕辣！而辣汁就係必加嘅選擇。至於車仔餸，比較特別嘅係鮮味芫荽鯪魚丸、炸腐皮墨魚卷、鮮蝦鳳城水餃、潮汕鮮蝦餅、潮汕墨魚餅、招牌秘製五香牛腩、招牌秘製豬軟骨，牛腩質感麻麻，蘿蔔份量唔少同清甜無渣，但豬軟骨就好入味好軟腍。

店內綠色餐牌中，有唔少小食可以選擇，包括招牌炸雞翼$16至$25，3至5隻，感覺不過不失，驚喜不大，另有酥脆炸魚皮$14。不過，最令E.A.Two驚喜嘅係藤椒鮮魚皮$17！以往食過呢款小食，有啲係整到軟身，好容易中伏，今次食完該店嘅藤椒魚皮，先知道原來好食嘅藤椒魚皮係可以去到呢個地步。

藤椒鮮魚皮上檯可以見到上面鋪滿橙紅色辣椒同醬汁，一夾起魚皮，質感係實淨，而唔係淋身。魚皮入口超爽脆，同時滲出辛香辣味，麻中有辣，而辣度係適中，唔係死辣。咬開魚皮，辣度慢慢向上，而去到最頂嘅辣度又係大眾可以接受嘅程度，唔會辣度好過份。點車仔麵嘅時候，點紙包飲品就唔使加錢，而另一款比較特別嘅係菊花麥冬桂花金羅漢果茶，只係加$6，入口清甜，菊花味比較搶，都算係適合配搭辣嘅小食同湯底。