南丫島僅淨2間！食完麵包飲杯嘢！咖啡譜近國度84、主打音樂咖啡？

南丫島向來係一個令人感覺放鬆同chill嘅香港離島，呢個小島本來有好多間值得拍拖兩個人支持嘅香港小店。不過，今時今日已經執完一間又一間，榕樹灣大街內勉強就只剩低兩間小店，而且唔係咩主食餐廳。

南丫島原先有好多間小店，包括「LaLa mama’s」、「龍江川粵菜館」、「農舍」、「南島書蟲」、「搽茶居」、「南丫部落」，但今時今日已經全部結業，只係淨返「國度84」，以及當初喺「南丫部落」門前開咖啡檔嘅「咖啡譜」。走入榕樹灣大街，一直行到近盡頭位置，自然會搵到淨返嘅南丫島小店。

E.A.Two已經不只一次食過「Corner 84／國度84」，呢間小店主要係賣麵包，本身其實重有茶飲，店內有個小角落可以容許少少客人即刻食。除咗$6起嘅大細牛角包，亦有菠蘿包$10、菠蘿油$15，菠菜酥$20、玉桂卷$19等等。今次就發現有款之前未見過嘅burger，感覺同快餐店嘅包裝相近。當中有牛肉漢堡$28、魚柳漢堡$25，亦有薯餅$8可以選擇，真係似足某某連鎖快餐店。

當日購買burger嘅時候已經近中午，所以整個麵包都係已經凍咗。對於小店，我哋唔會咁harsh，例如呢個時間唔係新鮮出爐，burger自然會凍晒。不過，之後食個burger，發現唔單止麵包極厚，餡料亦足料。當中，魚柳bell質感絕對好過某某連鎖快餐店，而沙律醬亦唔會太多太膩。至於牛肉burger就更驚喜，質感恍如手打牛肉餡，有厚度，而入口軟腍無筋，重有少少牛味。

食完個burger，今次就走到1分鐘步程距離嘅「咖啡譜」，中途會經過被列為三級歷史建築物嘅「榕樹灣天后古廟」。該咖啡店固然有咖啡，亦有輕食，不過就只有Tiramisu、cheese bagel、牛角包，每個$40至80，好似有少少貴。

店內地方不大，咖啡就由$20至80不等，包括黑白咖啡、亦有椰青咖啡，而虹吸咖啡係最貴，一杯賣$80，一般咖啡就$40至$50。後來睇返入面嘅咖啡儀器，睇嚟咖啡係值得一試。不過當日食完個burger，唔係好想飲咖啡，反而想飲non coffee，所以就只係挑選兩款非咖啡飲品。

例如有matcha latte$40至$50，亦有茶類，又或者係伯爵茶$40、super fruit$35，後者個名好似幾好聽，其實只係茶包沖泡，有少少失望。店內座位雖然唔多，但牆上面嘅壁畫就非常搶眼，因為係一幅出賣年齡嘅康樂棋畫，似足「文具佬」賣嘅康樂棋細節，畫功不俗，畫得好仔細，公仔同咖啡、音樂完全融合，據悉係來自於老細嘅朋友。