韓國釜山Oppa直營Outdark人氣炸雞店！即時減$50＋生日有驚喜？芝士炒雞／5款炸雞／泡菜煎餅／肋骨鍋

韓國菜餐廳係E.A.Two比較少選擇類別，今次就一嘗來自韓國釜山Oppa來港嘅知名人氣炸雞店「Outdark」。該店係韓國直營店，而唔係平時啲特許經營店，而且係我哋香港人小店，加上店內韓式炸雞嘅水準，係值得拍拖兩個人去支持。

據了解，Outdark於韓國有54間分店，老細於2014年起於海外開設分店，而香港店就係韓國直營店，而非特許經營店，所以係可以放心選擇嘅韓式餐廳。該店選址旺角一個人流唔多嘅商業中心商場樓上舖，入面重有個情侶鎖鐵網，而室內整體燈光係比較昏暗，因為滿佈星星吊燈，所以係幾適合情侶前往。

「Outdark」固然係以向來最受歡迎嘅韓式炸雞為招牌作，另外重有芝士炒雞、海鮮煎餅、泡菜煎餅、蕃薯芝士條、芝士肋骨鍋、串串魚糕湯、炸蝦飯糰、海鮮炒粉絲、五花肉炒年糕等等。值得留意係有生日驚喜，如果當月有朋友生日，可以事前講聲，但蛋糕就要自備。店員送上蛋糕嘅時候，會同時拎埋隻熊啤啤生日公仔同一個IG打卡框，重會為大家曬張相，然後放喺一個Birthday Card度，張卡可以帶走。

炸雞以無骨雞肉配搭醃蘿蔔同幾款醬，當日就只有3款醬，都係偏酸甜口味。而炸雞就有5款口味，包括原味、醬油、甜辣、香蒜蜜糖、辛辣，每款$188至$198，雙拼炸雞$208、半份炸雞$138，入面有薯條、芝士波、腸仔年糕等小食。事實上，如果人少少，半份炸雞份量已經好足夠，因為已經有半打，食得太多加埋其他菜式會好滯。

今次炸雞選擇香蒜蜜糖口味，其實都係原味炸雞上面加上唔同醬料，呢款就係有微微蒜味同蜜糖味，所以係比較有香甜味，炸雞本身無咩辣味。炸雞香口，感覺唔係好油膩，表皮脆卜卜，內裏依然嫩滑，而且雞肉有肉汁。而炸雞旁邊嘅配料都唔少，但就以薯條、薯角最多。

芝士王國係芝士炒雞$328，據悉選用雞腿肉，旁邊配搭辣椒醬、芝士，旁邊有飯糰、燒菠蘿、粟米芝士、泡菜、蛋餅。上檯時，仍然要等到芝士煮到溶，然後店員會幫手炒勻。進食嘅時候，用筷子夾起雞肉，然後用叉將芝士捲喺嚿雞度，有啲儀式感，懶人表示直接一隻叉吉落去再捲少少芝士算數。

呢款芝士炒雞都算係邪惡之選，雞肉配搭芝士就係終極邪惡嘅口味，鹹香味十足，只不過食得太多就自然好膩好滯，已經不能夠再食其他嘢。熱焫焫嘅芝士同雞肉炒勻之後，熱度充足，可以輕易有拉絲效果，感覺似水牛芝士，但唔建議捲太多芝士，因為真係好膩。雞肉配搭韓式辛辣醬汁係特別濃味，捲入芝士就更重味，入面都係嫩滑。不過，當中嘅韓式年糕反而更大驚喜，好適合配搭甜辣醬汁同芝士，入口係無雞肉咁辣。

老老實實，單單炸雞同芝士炒雞，就非常膩，呢個都係韓式嘅做法，炸雞係以醬汁為主。故此，建議加$20要碟蔬菜盤，可以解解膩，入面包含生菜、蒜片、辣椒片、包飯醬，適合配上肉類。至於飲品，多數都係$48，梳打水感覺唔太抵飲，同乳酪同價，所以就選擇咗草莓味、藍莓味嘅乳酪，上面可以自行選擇要唔要cream。飲酒嘅話可以試糯米釀嘅米酒，但一杯要$108至$158，有6%酒精含量，入面有鮮果冰花。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 最後下單時間為14:30（午餐）、22:30（晚餐）。

❷ 付款方式接受Visa、Master、現金、八達通、AE、銀聯、JCB、Apple Pay、Google Pay、PayMe、EPS。店內有加一服務費。

❸ 生日事前講低會有驚喜慶祝，當月生日重有張birthday gift，係半份炸雞，但要下次同月幫襯先用得。

❹ 即時登記做會員可以有$50優惠，而且係可以當日即時使用。