深水埗Cafe界元祖店Cafe Sausalito！咖啡杯杯濃郁、11月限定滿$300送扭蛋、扭出掛耳咖啡包？

深水埗近十幾年一直係非常為人熟悉嘅咖啡小區，但時而勢易，一間又一間Cafe已經消失得無影無蹤，有部份Cafe甚至被評為搵笨同混水摸魚。如果想要去深水埗歎咖啡，拍拖兩個人的確要小心選擇。大南街有間堪稱深水埗Cafe元祖店之一，至今11週年依然尚存，滿$300更有扭蛋玩，隨時獲得掛耳咖啡包！

位於深水埗大南街嘅「Cafe Sausalito」，以開放式設計，似歐美風同頹廢風混合，牆身好raw。門口設有寵物友善座位，而室內亦有適合怕狗人士嘅座位，細細間舖都能夠做到真正嘅共融，啟德「Airside」商場真係要學吓咩叫「共融」！因為「共融」唔係只係只照顧其中一邊嘅客人，而係所有人同所有動物都能夠喺同一個空間生活，而又互相尊重。

呢間咖啡店目前已經開業11年，來自80後年輕人，2025年11月剛好有限定週年優惠，只要食滿$300，就有一個代幣附送，可以憑代幣玩一次扭蛋。Cashier旁邊有部可愛扭蛋機，每隻蛋入面有一張紙，是次E.A.Two就扭出一包該店自行出產嘅掛耳咖啡包。不過，細心發現其實有機會所有蛋都係掛耳咖啡包，因為牆上面無咩其他選擇，感覺呢個只係一個非常有儀式感嘅推廣方法。換言之，滿$300就會送出一包價值$20嘅掛耳咖啡包。

望落幾特別嘅有由bagel製作嘅芝士牛肉麵包圈$86、牛油果煙三文魚忌廉芝士麵包圈$89，而自家製Tiramisu或是日蛋糕就賣$60。難得係咖啡店都有主食可以選擇，今次就揀咗秘製蕃茄醬炸蝦意粉$112、慢煮八爪魚蒜香緹魚意粉$138。意粉份量唔算多，只係擺盤擺得幾靚幾有心思。慢煮八爪魚蒜香緹魚意粉不過不失，意粉爽滑彈牙，醬汁濃稠而不膩。而秘製蕃茄醬炸蝦意粉就更驚喜，雖然大蝦係雪藏蝦，但係靚嘅雪藏蝦，而意粉同樣爽滑彈牙，蕃茄醬汁酸甜中帶有微微辣味，似蕃茄加車厘茄，除咗蕃茄蓉，亦有洋蔥，入口甚至有少少類似黑椒嘅調味料。

店內有2款cocktail，包括very dirty、tipsy sandia，一款係朱古力咖啡版嘅酒，另一款係水果版嘅酒，每杯$98。而咖啡就以espresso為主，寫明有唔同咖啡豆，每杯$50至90，透明度好高，可以自選適合自己嘅口味，包括哥倫比亞、秘魯、巴西、埃塞俄比亞，可以選擇fruity定nutty。至於special coffee，就有4至5款，雖然未試到sober sandia$55，只有coffee tonic$50、cold brew$60、西柚凍釀咖啡$50、nostalgia鹹檸咖啡$50。今次挑選鹹檸咖啡，只有凍飲選擇，感覺好特別，既有乾檸檬，亦有乾鹹檸檬，難得依然保留咖啡香，同時有梳打感，入口有酸甜味，感覺酸爽。就算係一杯普通mocha$42至$48，同樣唔係省油的燈，因為朱古力味好濃郁，同咖啡香亦好平衡，兩樣都好香，咖啡豆味原始，唔會有苦澀味，濃郁之餘，入口自然舒服，咖啡真心有水準。