西九文化區新開幕分店！素年海景Cafe寵物友善、全素餐牌、主食飲品配Gelato雪糕！

西九文化區aka藝術公園已經成為近年嘅尖沙嘴西面嘅知名地標，一直以來都有唔少小店進駐海邊，但執完一間又一間。最近，就有一間素食店於西九海旁開設分店，拍拖兩個人可以享受一間海景素食店。

「素年」係一間來自深水埗嘅素食店，由2019年開業至今，一直係本土純素品牌。最近，該店就於尖沙嘴西九文化區海旁開設分店「Play with Years」，成為該品牌一間海景素食店。該店位置本身係「侘寂咖啡」，但現時只剩觀塘店，而西九文化區一帶本來有唔少小店，呢個舖位旁邊本來有間熱狗店「Hooman by the sea」，但近日發現已經結束營業，實在可惜。

該店固然係只賣素食，當中以西式為主，就似一間西式素食Cafe，包括蔬果式全日早餐、鷹嘴豆泥烤野菜碗配酸種麵包多士、鮮果奇亞籽穀麥燕麥碗、墨西哥煙燻肉醬飯、芫荽芝士漢堡等等，重有素食小食，主食就有6款。店內甚至有純素版有Gelato意大利雪糕，價格為$48至$68，分別有兩球至三球雪糕，雪糕有7款口味，包括開心果、黑芝麻、港式奶茶、黑朱古力、雲呢嗱、士多啤梨、芒果熱情果雪葩，重有酒飲。

墨西哥煙燻不可能肉醬飯碗$138 包含有素版辣肉醬、椰菜花、西蘭花、粟米莎莎、波椒、墨西哥脆片，整體做得真係似葷食版本，帶有微微辛辣感。芫荽青醬不可能芝士漢堡$138 包含有不可能肉、紫洋蔥、芫荽、純素芝士、酸青瓜、薯條或沙律，最黑仔係咩？就係自己叫嘅時候未整好芫荽青醬，而個包都係核突啲，但之後食完見到隔離權叫同一樣嘢，入面就有芫荽青醬，而個包都係飽滿啲挺身啲，不過隔離檯最後無食到芫荽青醬。

本身主食配有一杯京都宇治玄米茶或斯里蘭卡伯爵茶，其他飲品正價減$12。今次選擇咗荔枝檸檬梳打$48、抺茶士多啤梨燕麥奶$58，連牛奶都係改為燕麥奶。不過，點完餐先見到有款綠牛係$68，多十蚊就多一球開心果雪糕，慳咗十蚊但蝕咗！

今次想講多少少﹐講吓寵物友善嘅問題，其實西九海濱長廊一帶並唔係一個完全可以放開狗繩嘅地方，側邊係設有一個寵物公園，該位置可以放開狗繩。而海濱長廊一帶係容許寵物行走，但就需要牽上狗繩。近月，因為啟德Airside商場，出現愛狗同驚狗爭拗，甚至有帶出「共融」問題。事實上，好多人誤解咗「共融」兩個字，所謂嘅「共融」，唔係只係企喺其中一邊去睇，唔係只共融狗隻同狗主，而係宏觀地、全面地睇。

「共融」指嘅唔係純粹共融動物，而係共融所有人同所有動物，所有人喺同一個空間生活，而又互相尊重。類比去睇，就等如2012年電視劇《天與地》入面嘅對白，「和諧」唔係一百萬人講同一句說話，而係一百萬人講一百萬句說話，而又互相尊重。所以，「共融」唔係為達目的趕走某一部份客人，而係同時fulfill兩邊客人。你問商戶想賺邊一邊嘅錢，我敢保證，佢哋一定係想賺晒兩邊嘅錢，而唔係只賺一邊嘅錢。

事實上，西九文化區喺「共融」上係做得唔錯，但牽狗繩指引就唔清晰。只不過，至少呢一帶餐廳係設有戶外同室內座位，令愛狗同驚狗嘅人都可以入座進食，而唔係完全趕走其中一邊客人，情況等同吸煙者同非吸煙者均設有戶外座位同室內座位。