大時代／爸爸取景地！土瓜灣甘露甜品被糖水耽誤小食店！傳統糖水舖點解會失望？

香港電視劇同電影一度受到唔少外地人歡迎，連取景地亦往往成為打卡點，今次E.A.Two去嘅一間甜品店就係知名電視劇同電影嘅取景地，亦係該區街坊嘅食店，拍拖兩個人行過不妨試一試。雖然叫甜品店，但原來係一間被耽誤嘅小食店，到底點解？

座落土瓜灣馬頭圍舊區一帶嘅「甘露甜品」，唔單止曾經係知名電視劇《大時代》取景地，劇中李麗珍同邵仲衡就有去過食，亦係近年香港電影《爸爸》取景地，兩者都係由劉青雲領銜主演。該店由1983年開業，屹今有超過40年歷史，店內都貼有兩套戲嘅劇照，連《正義迴廊》導演都曾經去食過。

甜品招牌作應該係合桃糊$28、芝麻糊$23、薑湯麻蓉湯圓$25，多數以中式糖水為主，重有馬來亞喳咋$23、蕃薯糖水$23、椰汁西米露$23等。今次選擇咗芝麻糊，不過就覺得都算係最難食嘅芝麻糊，色調偏灰，無乜芝麻香，入面有啲好似粉皮嘅物體。

雖然甜品係好失望，但小食又幾有驚喜。小食有小攤車做，而且配合自家製沙嗲醬，每款$9，3款就$23，包含有豬紅、蘿蔔、豬皮、魷魚、東風螺、牛柏葉、牛雜、牛肚、陳皮魚蛋、燒賣、粉果、牛肉、腸粉、糯米雞。重有車仔麵，可以一餸一麵$25，配上油菜，唔使隔離要兩三餸車仔麵。

另外，亦有小食店必有嘅生菜鯪魚肉、紫菜鯪魚肉$22至$25，更有鮮蝦雲吞或水餃$30至$32。鯪魚肉配紫菜或生菜都係香港特色，鯪魚肉質非常軟腍，淋到意想不到，而且完全無骨。事實上，土瓜灣向來係舊區，有唔少年紀較大嘅街坊，唔知啲小食係咪為附近年老街坊而設嘅呢？

店內嘅醬汁類似沙嗲醬嘅醬汁，都係適合配搭港式串燒，入面無花生醬或花生味，但就明顯有中式菜式必加嘅薑蔥蒜味，如果我哋嘅舌頭無錯，應該呢三款配料都有齊。

牛雜、牛肚、牛柏葉、魷魚都係經典選擇，豬紅、蘿蔔、豬皮亦都係小食店同車仔麵店常見選擇，每一樣都係好軟腍，但就有保持少少爽鮮感。最特別係東風螺串燒，東風螺熟透而軟腍，同其他串燒一樣配搭醬汁都適宜。咁多款小食當中，最意外嘅就係豬皮，質感軟腍得難以想像，因為係淋到好似煮到軟爛入味嘅牛筋，從來無諗過豬皮可以軟到呢個地埗。

與其叫「甘露甜品」畀啲網民踩，不如直接叫「甘露小食」啦，反正都係諧音「金撈」！