閣麟街搬到威靈頓街！蘭桂坊Wingman雞翼放題Gathering之選！非吃到飽雞翼套餐最平$88！

中環蘭桂坊一帶通常選擇都唔多，想要搵一間本地人餐廳唔容易，除咗「何蘭正」之外，重有間以雞翼放題為主打嘅「Wingman」，既有吃到飽嘅任食放題，亦有非吃到飽嘅雞翼套餐，更加有素食雞翼可以選擇。無論拍拖兩個人前往，抑或係一大班人食飯聚會Gathering，都係好適合。

「Wingman」原先座落閣麟街，近月就搬到威靈頓街樓上舖，一踏出電梯，馬上到達門口，該店招牌即映入眼簾。該店打入亞洲最好雞翼第11位，被旅遊網站Big 7 Travel選為「亞洲最佳雞翼專門店」之一，到底係咪真呢？

雞翼放題限時90分鐘，有3款口味嘅放題同10款口味嘅放題，同時分平日同週末假期嘅價錢，3款口味只係$138至$148，而10款口味就需要$188至$208，加$150可以任飲烈酒、啤酒、紅白酒，可以同時用啤酒配雞翼。而雞翼本身有超過20款口味，都係選用無激素走地雞，飼養時無使用抗生素。店內雞翼口味包含有金雞、水牛城醬、紐奧良香粉、加州風情、死神醬、加勒比海香辣雞、醉雞、咖啡燒烤醬、中式海鮮醬、蜂蜜芥末、黑椒檸檬、蒙古燒烤、田園風味、自家製鹹蛋黃、新加坡辣蟹、自家水牛城醬、四川甜辣醬、印度唐杜里烤雞、泰式甜酸醬。

除咗可以點雞翼放題，亦可以加點小食同飲品放題，人均需要$260至$278。小食有薯條、椰菜花沙律、涼拌椰菜、鹽焗毛豆、黑松露芝士忌廉汁通粉，飲品就有汽水同指定啤酒、檸檬茶。此外，甚至可以加蘸醬，加$10至$25就可以再加蘸醬任蘸雞翼。同朋友聚會時，有可能會遇上堅持素食嘅人，而店內都有素食可以選擇，所以都係歡迎素食人士，包括純素雞翼$88／6隻、素爆谷雞$68／6隻、素雞漢堡$98，重有款西班牙油炸鬼嘅甜點。

E.A.Two今次就無選擇任食吃到飽嘅雞翼放題，中午時段選擇咗只限平日嘅套餐，人均最平只係$88／8隻、$103／10隻，最貴嘅漢堡餐都係$128。不過，餐牌設計加上燈光，真係幾難睇，就算識英文，都覺得好複雜難睇，啲字又細隻，下次記得睇定餐牌先去，或者帶個放大鏡去睇。而今次選擇嘅係8隻雞翼餐$88，重有混亂嘅地方係選擇唔同指定口味嘅雞翼。不過，該店嘅餐牌設計有啲混亂，要睇點配搭嘅時候都幾難搞，一份套餐可以揀兩款雞翼口味，而分別係需要喺兩個column入面各揀一款，或者加$5要特別口味。

兩個人去食點兩款雞翼套餐，每款口味有4隻，合共就有16隻，包含4款口味，其實基本都係夠食，未必一定要食雞翼放題。今次揀咗嘅係水牛城醬、咖啡燒烤醬、自家製鹹蛋黃、新加坡辣蟹，感覺口味無咩太大特別，而且唔係好入味。水牛城醬就係典型辣椒仔整醬汁，而咖啡燒烤醬原來只係表面加上咖啡粉，所以咖啡味其實無乜，不過佢係使用公平貿易咖啡粉。本來期待鹹蛋黃味，但原來同想像中有分別，唔係成隻用鹹蛋黃炸，反而只係表面加上鹹蛋黃碎，自行將鹹蛋黃碎髹滿成隻雞翼就會好啲。呢4款口味竟然比較驚喜嘅係新加坡辣蟹味，可能因為有炸蒜、辣椒、薑、洋蔥味，好似重有茄醬，幾香口，兩個火算係可以接受嘅辣度。