沙田手工意粉店Y Pasta有6款麵條可擇！套餐人均約$150、全場最驚喜竟然係呢樣？

沙田區原先有好多適合拍拖兩個人嘅餐廳選擇，現時已經愈來愈少，尤其係市區一帶，連歷史悠久嘅酒樓都需要結業。今次E.A.Two就前往一間自選手工意粉店，外觀就似適合家庭客嘅咖啡店，意粉都有6款選擇。

「Y Pasta」位於沙田好運中心範圍，靠近新城市廣場，而店舖就唔係喺商場內，而係喺商場外面一條叫做潮人巷子度。不過，E.A.Two就唔係好明有幾潮。該店其實於2015年已經起家，最初店舖設於銅鑼灣鬧市，都係主打手工意粉同pizza，現時就進駐沙田市區，地方都唔細，座位都多，感覺好似一間適合家庭客嘅餐廳。

套餐係自選，餐湯、飲品、意粉醬、意粉類別、配料，最特別大概係手工意粉，竟然有6款意粉，包括幼帶麵、戒指粉、絲帶麵、波浪粉、螺絲粉、飲管粉。大部份意粉款式都曾經食過，唯獨飲管粉比較少見，原來係一條粗條意粉，中間有飲管狀嘅窿，夾起好似編織中嘅頸巾。

醬汁都有6款，包括黃金鹹蛋黃醬、羅勒松子香草醬、咖喱masala醬、蒜香墨魚汁、意式芝士白醬、意式羅勒蕃茄醬，最底係$88起。意粉配料有香煎北海道帆立貝3隻$88、香草焗原條魷魚$78、流心布袋芝士$78、酥炸軟殼蟹$68、香煎鳳尾虎蝦4隻$68、煙肉蘑菇菠菜$58、慢煮雞肉$48、烤雜菜燈$38。

本身E.A.Two選擇嘅係比較配合嘅茄醬同鳳尾蝦，但貪得意選咗軟殼蟹。意粉同醬汁本身都幾好，唯獨軟殼蟹就比較失望，配返鳳尾蝦應該好配合。軟殼蟹呢個炸法真係唔得，炸油有其他炸物嘅味，可以推斷同一兜油炸所有炸物，而炸粉好厚，感覺似街頭椒鹽鮮魷嘅炸法，放落軟殼蟹就變得油膩。咁樣炸嘅話，如果換咗做多春魚，反而可能幾配合，而多春魚食材會平啲，價格都會平啲。

除咗意粉，都有pizza、沙律、炸魚薯條、豬肋骨之類，例如黑松露蜜糖prama ham pizza $158。pizza係薄批，而非麵包式厚批，不過不失，都係一種適合家庭share嘅選擇。

小食有香草雞翼2隻$18、鼠尾草雞軟骨肉太3粒$18、自家製甜品$25。飲品有咖啡或茶，或者加$10至$28加特飲、果汁或酒類，凍檸茶係自己加糖水，同美式咖啡一樣都係麻麻哋，比較水，靠檸檬同糖水味。是日甜品係咖啡味巴斯克蛋糕，的確係有咖啡香，但同想像中嘅巴斯克有啲分別，質感比較軟綿，似mousee。

食過套餐之後，E.A.Two覺得全場最出色嘅地方，應該係餐湯部份！套餐可以配香濃野菌湯，而忌廉龍蝦湯、忌廉黑松露野菌湯就加$10，而法式芝士浮台洋蔥湯就加$20，再加多酥皮就加$15。唔使加錢嘅蘑菇湯都好creamy，質感濃稠，蘑菇打成溶，有淡淡都有忌廉同蘑菇香。

而法式芝士浮台洋蔥湯就更加吸引，頂端有塊芝士法式麵包，浸入湯內其實都好快淋晒，底下有唔少洋蔥，味道都好濃郁。最特別之處應該係另上嘅一支白蘭地，原先法式洋蔥湯應該係差唔多做起嘅時候就會落白蘭地，酒精逐漸揮發之後會留低果香，亦會將洋蔥精華更加同湯融合。呢度將白蘭地額外分開上檯，感覺純粹係多咗儀式感，要趁洋蔥湯仍然有熱度嘅時候落幾滴酒就會更好。