【楓葉預告】大帽山出發！荃錦營地輕鬆登蓮花山大欖郊野公園石龍拱小徑遍佈楓葉

踏入秋冬，意味準備步入賞楓季節，香港觀賞楓葉嘅地方有好多，拍拖兩個人可以走勻各個楓葉好去處，熱門賞楓景點咁多人，今次編輯就帶大家走過大欖郊野公園至蓮花山一道楓葉徑，目前楓葉正準備從綠轉紅，相信未來兩星期應該會娛成紅葉小徑。

最近既係踏入賞楓季節，同時亦係到咗露熱門時候，而漁農自然護理署所管理嘅41個郊野公園露營場亦已經完全開放，唔少人都已經急不及待執起行裝去露營。當中荃錦營地嘅營位需要預約，而唔少露營人更投訴根本難以預約，官方既唔俾即場執雞，亦唔會理預約咗嘅人放飛機，導致出現有位無人去嘅情況。

想要前往大欖郊野公園楓葉徑，可以從大帽山荃錦公路起步，2分鐘就會到達荃錦營地入口，即係麥理浩徑第9段入口。經過荃錦營地，就係接駁麥理浩徑第9段嘅捷徑。基本上，營地被林木包圍，環境清靜，連接多條山徑，營地內亦有基本設備，包括燒烤爐、煮食爐、平台、枱櫈，亦有旱廁、水源。雖然從網站圖片所見，營地每個營位好狹窄，但實際上每個營位都算有足夠空間，可以接受。

走出荃錦營地另一端，可以直接到達麥理浩徑第9段，上行約15分鐘，就會到達荃灣市區瞭望處。位置既可眺望大帽山山頂，亦可俯視荃灣一帶市景，包括川龍方向。

繼續前行約10分鐘，就會到達麥理浩徑第9段、蓮花山分岔路口，想要去今次嘅楓葉小徑，就要走蓮花山路線，否則就要轉向右邊去元荃古道，前往大棠燒烤場。大概再走10分鐘步程，就會到達另一個路口，由瀝青路轉向小山路。

走呢段路線係經過蓮花山，而呢座蓮花山同大嶼山梅窩至東涌之間嘅蓮花山唔一樣，海拔高度較低，嗰座有766米高，而荃灣至大欖呢座就大概只係578米，最高點係蓮心頂，其實同剛才嘅起步點相若。荃灣至大欖嘅蓮花山就位於大帽山西南面，附近可見上花山、下花山、石龍拱等山頭。

走過15分鐘嘅小山路，就會到達50年代建立、80年代停辦嘅蓮花山公立學校，到達學校之後，就代表你離楓葉小徑不遠，因為楓葉係位處大欖郊野公園石龍拱段。廢校向來係打卡影相熱點，而蓮花山公立學校亦係其一，學校名稱仍然清晰可見。校舍旁邊亦可見滿佈草牆嘅圖書館同舊式廁所，舊式水泥滑梯雖然屹立不搖，但整間學校已經殘破不堪。

向荃灣柴灣角方向前行，經過大欖郊野公園石龍拱段，10分鐘左右就會到達一個極佳賞景位，背後山頭景色更開揚，最高點有約474米。石龍拱段能環瞰荃灣至青衣、馬灣一帶市景，更可以觀賞整條汀九橋同青馬大橋，遠近景色皆清晰可見，180度靚景一覽無遺。

到達石龍拱涼亭山頭賞景位之前，其實你已經經過楓葉小徑！楓香由麥理浩徑第9段一直延伸至元荃古道石龍拱段，麥理浩徑第9段嘅楓香比較疏落，但元荃古道石龍拱段就比較密集，基本上集中於蓮花山公立學校至元荃古道石龍拱段涼亭嘅小山徑，低調而充滿秋意。

石龍拱楓香樹基本上種植於斜坡上，只係喺山路旁邊，形態獨特，似向經過嘅途人招手，一直依循元荃古道石龍拱段走，就會經過呢段楓葉徑。

石龍拱涼亭位置其實就係接駁返元荃古道，有唔少分支，穿過山頭賞景位，直行就可以折返荃灣柴灣角方向，30分鐘就會下行至山腳荃景圍，對面就係香港港安醫院。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 荃錦營地預約網址﹕https://www.camping.gov.hk/tc/index.php 。

❷ 巴士路線51號可以直達大帽山郊野公園，落車後向後面方向折返，就會到達荃錦營地入口。

❸ 相對荃灣出發登大欖郊野公園石龍拱段，由大帽山起步，經荃錦營地、麥理浩徑第9段到蓮花山，就比較多落斜，少見上斜，路段較長，但就輕鬆啲。

❹ 呢條路線下行返回荃灣港安醫院嘅話，一樣要走下斜坡路段，其實都係會腳攰。

❺ 學校一帶比較多蚊蟲，記得做足防蚊措施。

❻ 夜晚走過元荃古道一帶時，小心有惡犬。

❼ 愛護環境，記得自己垃圾自己帶走。

EATWO

Miss A

【區區有小店2025】炮台山7間尚存本土餐廳美食！自家製蕎麥麵／海景自助餐／爆餡菠蘿包

兩個人旅吓行

專題

E.A.Tips :

荃錦營地

蓮花山公立學校

石龍拱三角測量站