上山下海路線！西貢萬宜水庫東壩直闖破邊洲暢遊童話風白腊村兼寧靜沙灘

西貢行山路線繁多，適逢盛夏尾巴至初秋時份，今次帶大家輕鬆遊走西貢東壩至白腊灣沙灘，登上破邊洲，地質步道附近有一條路線可以同時包含上山下海，適合拍拖兩個人閒遊一下。

天然美景向來予人感覺鬼斧神工，當中西頁萬宜水庫係港英時代用作儲水嘅產物，而東壩向來以有如管風琴嘅大規模天然火山岩柱、防波堤、海蝕洞聞名，屬於香港聯合國教科文組織世界地質公園地標，內有一道足足有1.4公里長嘅步道。由步道可觀賞經火山活動形成嘅六角岩柱群，地質奇觀相當宏偉浩瀚，同時亦可放眼海洋兼遠觀破邊洲，甚至向下而走觀賞曾一度經大浪侵蝕嘅海蝕洞穴。而步道旁邊嘅防波堤亦係聞名於世嘅打卡點，工字形石墩用作抵禦海水沖蝕地基建築，遠處俯視巨大錨形石，有如一粒粒玩具積木。不過，由於西貢東壩內容實在係一個人所共知嘅地方，而且被寫得爛過爛攤子，所以編輯亦無意思詳細再講。

由西貢東壩入口起步，可見右邊有一道小樓梯，路線已經明顯翻新，而且初段有圍欄。沿樓梯直上可以輕鬆步行上標高柱小平地，有一個十字架狀石塊，位置可俯視東壩全景。而繼續步行上山坳，位置為花山，路段遍佈碎石、木梯級、石梯級。循上山路線而走，可以直闖破邊洲、檢豬灣，上山又落山，落山又上山，山路明顯，再於分岔路口往海旁方向走，走到盡頭即可見到破邊洲風景。

而破邊洲前亦係一個十字架狀石塊，位置可以最近距離觀賞一個切割而成嘅小島，切割面明顯，以來自火山爆發嘅六角岩柱奇觀聞名。破邊洲離花山非常接近，位置為懸崖，花山與破邊洲之間只為狹窄水道，遊走破邊洲一定要步步為營。

由破邊洲折返檢豬灣，不難發現山峽當中另一個知名景點，被稱為「香港之心」嘅山峽，形狀尤如一個心心。然後只需原路折返西貢東壩人造藍色錨形石，即可沿麥理浩徑1段萬宜路步行至白腊營地，沿途可見大量牛隻出沒，前行即可到白腊村路口，再步行約15分鐘下行路段，即可到達白腊村、白腊灣沙灘。

白腊村以色彩繽紛嘅歐陸式村屋同草地鬱金香聞名，不過鬱金香於3月先會開花，而且佔地唔多，其實無乜特別好睇，反而目前無花海，人流極少，有如無人之境，更加可以享受陽光與海灘。而白腊村其實係一條容家村落，有逾300年歷史。

甫踏入白腊灣沙灘，即可見到一幅大型手繪彩色地圖同露天茶座，內有士多，前行至沙灘可見遊船河嘅西式船隻，亦有少數獨木舟人士，甚至有露營之人。沙灘唔算太大，但風平浪靜，一旁有白腊灣碼頭，於沙灘上閒置，陣陣海風吹拂，清涼而舒適，即使天氣仍然炎熱，於樹下乘涼仍可感受陣陣天然涼意，的確係一個消暑勝地。

白腊灣沙灘曾一度被稱為港版馬爾代夫，但沙粒其實唔算太幻細，近海沙粒會比較舒適，而白腊位處西貢海，海水亦算清澈，只係雜物較多，尤其離遊船河船隻極接近，海上飄來唔少洗頭水、沐浴露到沙灘岸邊，水質被受污染，可見現時部份玩船P之人基本上毫無保護海洋之意識。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 由西貢市中心進入西貢東壩可以步行，需時約2小時，而乘搭小巴9A號或的士前往，不過小巴一般只於假日行駛，而且只有下晝15:00至18:00服務，每班次約20至25分鐘。而乘搭的士進入東壩，每程則需要$120，車程約20至30分鐘，回程時最好Call定電召的士。

❷ 如果想預先查看東壩相關生態知識，可以於西貢巴士總站旁邊火山探知館瀏覽一下，位置於海濱公園內，無需要入場費，於星期二、四、六、日開放。

❸ 由於沿途基本上無補給點，謹記要準備充足糧水。

❹ 整條上山路線為無遮無掩山路，必須做足防曬措施，而且要量力而為，稍有不適亦唔好強行繼續上山，最好有有經驗人士陪同。

❺ 西貢萬宜路為禁區位置，出入需要禁區紙，所以一般情況下只能乘搭的士或小巴進入。

❻ 前往破邊洲嘅山路明顯，唔少地方都已經被行山友踩出平地，不過路段仍然碎石繁多，而且不時上山又落山，破邊洲終點更位處懸崖邊，必須要打醒十二分精神，安全至上。

❼ 雖然由東壩盡頭跨越鐵絲網係可以從捷徑前往破邊洲路線，但絕對唔適合新手行走，編輯並唔建議走此路，除咗要跨越防波堤，亦需要攀爬懸崖峭壁，路段較為陡峭，甚為危險，最安全都係折返上路，從正常樓梯前往。

❽ 如果要從萬宜路乘的士離開，平日一般係車等人，而假日則為人等車，下晝會較多行山人士，所以要預早充足時間等車。

❾ 破邊洲路段浮沙碎石繁多，建議穿著長袖衫褲同合適行山鞋，而走檢豬灣就最好有行山手套，不過新手其實不宜前往。

❿ 謹記自己垃圾自己帶走，於白腊村打於記得要保持安靜，唔好騷擾居民生活。

❿ 白腊灣沙灘旁邊設有士多，既有基本食物、飲品，亦可以租借各項水上用品，價錢稍為昂貴。士多更有沖身地方同洗手間，不過沖身就需辰付$10，士多17:00至18:00左右會關門。

❿ 雖然萬宜路沿途都遍佈牛隻，但無需擔心，因為牛隻都好乖巧，一般唔會襲擊途人，只會食草同屙屎，大家謹記唔好餵食牛隻。

❿ 破邊洲部份路段係收唔到電訊公司訊號，所以要特別留意。

❿ 白腊村離白腊灣沙灘只係3分鐘步程。