九龍寨城舊區半日遊！市建局即將拆卸重建窺探二戰後舊式建築物賈炳達道休息站處處

九龍城最出名嘅地方係九龍寨城，該地曾經係一個「三不管」地帶，唔少人到九龍城一日遊就只會前往九龍寨城公園認識歷史，但其實區內大部份街道都佈滿舊有歷史建築痕跡，包含一幢幢戰後建築物，實際畫面比一塊塊展板內容更豐富。走進九龍城區街道內，即可拍拖兩個人切身處地認識歷史，不過市政局於近月已經扑鎚宣佈即將會將九龍城區拆卸重建，建立全新綜合政府大樓，舊有歷史痕跡隨時會被清零。

據市建局資料顯示，九龍城舊區將會拆卸重建，當中九龍城廣場旁邊嘅賈炳達道公園部份用地都係重建地方，即將會變成全新嘅綜合政府大樓。至於公園對面嘅李基紀念醫局，亦需要配合市建局重建方針，相信只有新建嘅九龍城廣場能逃過重建拆卸宿命。資料亦顯示，全新大樓會包含更多社區設施，包含社區會堂、公共休憩及綠化空間、社區福利會堂、觀景平台等，甚至連接賈炳達道公園，新大樓預料比現時九龍城街市樓上市政大廈有更多空間。

事實上，毗鄰九龍城獅子會健康院嘅李基紀念醫局，由1952年至今係一幢足足有70年歷史嘅建築物，健康院亦有62年歷史，醫局一度經歷19世紀末戰後歷史發展。不過，醫局建築設計簡潔，甚至有幾分現代化，但又滲出歷史痕跡。醫局由九龍城街坊福利會提議，最後以李基命名，係因為本身由一對商人夫婦及政府集資興建，李基就係商人嘅爸爸名字，都係由於當時政府於區內興建各項公共設施嚟應付區內內突然湧入嘅難民，故當時政府接連興建包括碼頭、醫局、街坊會等，其中醫局就作為區內醫療用途。

而九龍城街道內嘅一幢幢建築物，每一處都隱藏戰後至今嘅基層華人生活變遷，包括街道上嘅舊式街牌，而一個個舊式招牌仍然高高懸掛於空中，獨特字型清晰可見。由19世紀示20世紀初，九龍城一帶亦曾經成為英國殖民地區，英國政府將九龍城規劃為城市，即使區內始後不斷發展，每幢樓宇仍舊屹立不搖，相信就只有今次拆卸重建計劃，先至被一拳打倒。

戰後時期，大批內地難民及商人擁入香港，令人口急劇增加，結果住宅數量求過於供，九龍城區附近都變成住宅用地，導致人口稠密，當中近九龍塘一帶為有錢人聚居之地，而近土瓜灣及九龍城一帶唐樓則變成基層華人居住地方。故此，目前大家可以目睹九龍城區內各幢唐樓、舊式商舖，每一幢皆為戰後建築物，暫時仍然可以察看戰後基層嘅生活空間。

遊覽舊區時，有機會覺得口渴，不妨找尋茶飲店解解渴，當中九龍城廣場對出就有一間新式茶飲店，與舊區風格迥然不同。其實，手作鮮芋站於上年底開業，正正係從人氣茶飲店茶理史易名，現時則以綿滑芋泥、粒粒芋圓為主打，例如係芋泥吐司，芋泥鮮奶、仙草芋圓，甚至加上芋圓嘅楊枝甘露。但編輯通常鍾意飲乜就飲乜，話之佢出名乜嘢，口渴嘅時候就只會比較想挑選茶類飲品，比如係簡單一杯蜂蜜苿莉綠茶$20 都係比較平嘅茶飲，苿莉味較蜂蜜香甜味重，能夠解渴，又或者係特別少少有冬瓜鐵觀音$28，即係冬瓜茶混上鐵觀音，茶味相對冬瓜味重，但又無鐵觀音嘅甘苦味，甜度唔高，的確係解渴，只係略嫌冰度太高。

台式茶飲店對面既係九龍城廣場，亦係賈炳達道公園，而賈炳達道公園於1995年起又連接九龍寨城公園，全部位於賈炳達道。而賈炳達道公園本身於1987年興建，2年後正式開放，原址其實係九龍城西頭村，只不過西頭村於1984至1985年已經清拆。公園地方偌大，連電視節目《城市論壇》亦一度選址賈炳達道公園舉行。公園內不單有特意設計成初學者專用嘅單車路，內有斜坡設計，場內多數為小朋友。

至於連接賈炳達道公園嘅九龍寨城公園，係區內1995年至今最為人熟悉嘅一個歷史公園，皆因公園前身正正係二戰之後嘅「三不管」地帶九龍寨城，只係於1987年至1992年分階段清拆。由於公園位置當時離1998年已經停用嘅舊啟德機場跑道太接近，所以當時政府未有興建成住宅，最後以中式江南園林設計成休憩用地，更設有約9個景區幫助大家認識九龍寨城歷史，當時更有香港總督彭定康主持開幕儀式。

其中，包括有南門懷古、衙府緬昔、八徑異趣、歸璧半亭、棋壇比弈遊弈園、四季同馨－廣蔭庭、獅子窺園－邀山樓、生肖倩影－童樂苑，現時更有千面小城展覽，內含戶外展區、六個衙門展覽館，更有各種文物保存，例如寨城官府衙門、清代古炮、石樑、對聯等。昔日九龍寨城雖然龍蛇混集，但現時公園內有水榭、小瀑布，加上亭台樓閣，環境清幽寧靜，古色古香，充滿詩情畫面，小橋流水吸引唔少攝影發燒友前往公園拍攝人像或風景，編輯當日亦見到有人Cosplay成古裝扮相。

不過，表面風光難以掩蓋往日歷史。九龍寨城本來於1847年起隸屬清政府，之所以變成「三不管」嘅無政府地帶，係由於後來變成軍事駐地。清政府經歷鴉片戰爭後，於1898年將界限街以北租借予英國99年，當年英國佔領香港之後，曾頒下《九龍城樞密院令（Kowloon City Order In Council）》，於1899年將清軍撤出九龍寨城，驅逐清代官員及官兵。翌年，清政府與英方一度就關於九龍城主權、治權進行交涉，後來英軍雖然撤出九龍城，仍然堅持土地屬於「女皇陛下殖民地香港的重要組成部份」，只係未有直接統治；而清政府即使堅持有合法管轄權，但當時已經無足夠國力，而且正逐漸步向衰亡，結果出現一個無政府狀態，導致寨城幾乎無人居住，遍佈不法之事，例如係黃賭毒、無牌牙醫等，變成罪犯匿藏、罪惡溫床嘅地方。

若然更細心留意吓，會發現九龍城寨門口有東南兩門，而南門為城寨正門，連接賈炳達道公園，門口就有塊花崗岩石，兩邊刻有南門同九龍城寨字樣，而北門亦同樣刻有北門同九龍城寨字樣，正對美東邨。

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 手作鮮芋站有獨家芋芋送服務，凡係區內買滿$120、又或者區外買滿$300，即享免費送貨服務。

❷ 巴士路線1,2D,10,11K,85C,113 或小巴路線25M,33皆可到達賈炳達道公園。

❸ 賈炳達道公園單車場可租借單車，每駕$20/小時起。

❹ 手作鮮芋站可以揀少甜少冰，加黑糖珍珠、椰果、仙草凍、寒天晶球、蜜漬紅豆、小芋圓、芝士奶蓋。

EATWO

Miss A

E.A.Tips :

手作鮮芋站 Taro Station

賈炳達道公園

九龍寨城公園