【野餐隨行】尖沙嘴外賣自取二人下午茶套餐啱草地野餐婆婆珈琲屋富士和洋主題Tea Set人均$219

如果想食Afternoon Tea，但又因為某啲原因無得堂食，其實一樣可以選擇戶外野餐，目前仍舊有唔少小店都有提供外賣版嘅Afternoon Tea，即使外賣自取方式，仍然可以拍拖兩個人或同閏蜜開開心心去草地野餐。唔好問點解編輯夜晚先開餐，純粹想食又就唔啱時間，唯有6點前取貨，6點後再食，以佢食物款式嚟講，除咗一般嘅鹹點、甜點，其實都有飽肚富士山造型日式飯糰，故都係可以當晚餐。

於尖沙嘴及觀塘皆有分店嘅婆婆珈琲屋，向來以和風設計打造，據悉係昭和年代風格，室內裝潢本身就以木系及日本風為主調，恍如日本京都茶室，食物亦以日式家庭料理為主打。近月，小店推出一款名為「GRANDMAMA 富士和洋下午茶二人套餐」嘅戶外野餐套裝，尊重外賣人士，令需要食外賣嘅同路人都可以將Afternoon Tea嘅下午茶套餐帶走，就算外賣自取都可以享受下午茶美食。

GRANDMAMA 富士和洋下午茶二人套餐既然以野餐為主題，小店亦有租借野餐籃套裝，包含野餐籃、野餐墊、餐具，放低按金就得，不過編輯放蛇發現店舖根本未能供應，所以只好自備簡單架生。

下午茶套餐內有十三品料，包括有鹹點、甜點，而套餐以富士山、和洋為主題，故食物選材同外觀設計上都係以日式為主，貌似和風輕食。三層架改以日本富士山造型設計，都算有心思，如果加錢重有和風小立牌、富士祭典團扇，其實只係一堆日式圖案小貼紙同兩把扇。

三層架下午茶並非只有基本鹹點同甜點，亦有可以略有飽肚感嘅飯糰。二人套餐內嘅兩件飯糰同樣以富士山設計，小巧精緻。飯糰飯粒都算飽滿，狀似珍珠米，店舖曾稱特別選用福井縣產越光米。飯糰分別係三文魚碎、芝士松露作餡，三文魚係最穩陣嘅做法，而另一件就以芝士松露為餡，相對比較有創意，但就比較奇怪，感覺同飯糰係兩條平行線，未能融為一體。

二人套餐內有十三品料理，分為日式點心、基本鹹點、甜點，另外亦配有冷泡茶。日式點心除咗有春日富士芝士松露飯糰、三文魚富士山飯糰，亦有紅豆鯛魚燒、抹茶紅豆白玉丸子。紅豆鯛魚燒，以鯛魚為造型，內餡放滿紅豆蓉，相對其他甜點，紅豆鯛魚燒甜度較低。而抹茶紅豆白玉丸子亦算不俗，口感煙煙韌韌，甜度適中。

基本三層架下午茶鹹點就有三角油揚菠菜包、法式一口三文治、迷你小卷、香酥洛林批，不過法式一口三文治未能供應，結果換咗2件伏到喊嘅法式可麗露，包括有蕃茄羅勒、茄子芝士2種口味。三角油揚菠菜包即係腐皮卷，內含黑木耳絲、菠菜絲仍餡，不過不失；迷你小卷有4款口味，包含芥末、牛肉、山羊芝士、椒絲雞肉及三文魚，係比較似普通下午茶點心嘅一款麵包類小食；而香酥洛林批就似一款有蛋味嘅撻。

至於甜點則有馬卡龍、手指泡芙、瑪德蓮貝殼蛋糕、伯爵茶焦糖燉蛋蛋糕，除咗伏字，編輯諗唔到另一個形容詞。手指泡芙有2款口味，包括莓味、雲呢嗱味，其實唔多似泡芺；瑪德蓮貝殼蛋糕係一款貝殼狀嘅法式小蛋糕，質感似膏狀，同平常嘅蛋糕唔一樣；馬卡龍就有無糖海鹽、伯爵茶2款口味可擇，算係比較正常嘅甜點；而伯爵茶焦糖燉蛋蛋糕係最難以欣賞嘅甜點，一來極速溶化成漿，二來朱古力比伯爵茶重味，茶味、焦糖味都食唔出，Not to mention有燉蛋感覺。

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

冷泡茶為冷泡玄米綠茶，由於甜點實在甜膩到爆燈，故冷泡茶就變成最有用嘅一樣嘢，茶味唔算太濃，但就可以解膩。

E.A.Tips :

❶ 取貨地點為婆婆珈琲屋或婆婆食物研究所，地址分別為尖沙嘴彌敦道176號The Nate 1樓全層、觀塘興業街14號永興工業大廈6樓C4室。

❷ 注意婆婆珈琲屋取貨時間為14:00-18:00，而婆婆食物研究所取貨時間則為13:00-17:00。

❸ 需要最少3日前WhatsApp 6689 6473預約取貨時間，並提供訂單編號。

❹ 攞貨時要出示QR code兌換。

❶ 需要按照預訂日期及時間內兌換，逾期失效。

❶ 訂單唔可以更改及取消，如取消訂單不予退款。

❶ 如取貨當日遇上惡劣天氣情況(如紅色/黑色暴雨/三號強風訊號或以上),可免費更改取貨日子一次 (須於原定取貨日起計14天內取貨)。

❶ 領取野餐籃套裝需付港幣$300按金，按金會於歸還指定項目後全數退回。

❶ 領取野餐籃套裝後翌日15:00前歸還完整以下指定項目，否則按金將全數不獲退回。須歸還的指定項目: 野餐籃、野餐墊、器皿、瓦器及餐具。

❶ 使用後的餐具需存放在專用的清潔袋內，請勿放回野餐籃內。交還用具時請確保用具(野餐籃、野餐墊等)沒有污跡、損毀及遺失，如發現以上情況，將視此為購買指定項目，而全數按金亦不設退還。

❶ 富士和洋下午茶二人套餐有4個Set可擇，分別只係在於會唔會加購租用野餐籃套裝、婆婆手工日晨啤酒。

❶ 尖沙嘴分店為$438，而觀塘分店則為$388，其實只係相差$50，視乎自己邊個位方便。

EATWO

Miss A

【區區有小店】菜式篇！港九新界尚存台灣菜 29間本土推介台灣菜餐廳｜台灣菜推薦2023

E.A.Tips :

婆婆珈琲屋

西九海濱長廊