元朗小食店登米芝蓮必比登推介2022！台式刈包大玩Crossover 倆口小吃成名後瞬間變人龍店

身處香港，要從素人受到歡迎並唔容易，往往要先有人氣先會獲得大量支持者，因為大多數人都唔係重視質素╴只睇表面。以食店為例，想受到歡迎，就需要先有頭銜，元朗有一間小店於今年初入選《香港澳門米芝蓮指南 2022》必比登推介，瞬間成為人龍店，唔少人都會拍拖兩個人前往試食。呢間一夜成名嘅小店以台式刈包大玩Crossover，包裹唔同餡料，刈包塞滿餡料後脹卜卜，賣相吸引之餘，口味亦有新鮮感。

今年初，《香港澳門米芝蓮指南 2022》又宣佈必比登推介，而所謂米芝蓮必比登推介，即係任何餐廳以港幣400蚊或以下享用美食，通常以三道菜式價錢計算，但價錢不包括飲品。元朗嘅倆口小吃就係其中一間新上榜小食店，雖然初期亦曾排長龍，但米芝蓮指南宣佈後隨即再次爆紅，到底喺登上米芝蓮必比登推介之前，有幾多人有支持小店或知道其存在呢？

兩個人醫吓肚今次找尋倆口小吃，小店隱藏於元朗小型露天商場當中，店內嘅台式刈包係一款手搓刈包，玻璃窗透視刈包一部份炮製過程。刈包每日限量發售，當中包括有內含古早味五花腩嘅傳統刈包加柚子醬、麻醬酒香台灣腸刈包、黑蒜菇菇炸刈包等，另外芝士壓餅、芋泥壓餅等亦係受歡迎嘅小食。

刈包係傳統台式地道小食，刈包鬆軟中帶有煙韌口感，麵粉亦有濕潤感，並非乾身，香軟可口。而菠蘿炸辣雞刈包$46 包含炸雞、燒菠蘿、羽衣甘藍撈蒜味醋、秘製辣醬、酸果醬，上手熱焫焫，刈包脹卜卜。台式刈包內有脆炸辣雞，炸雞表皮沾有醬汁，但仍舊香脆可口，而內裏仍舊軟嫩，包含肉汁。刈包中間有一塊燒菠蘿，酸甜味十足，酸爽醒胃，加上配搭蒜味醋嘅羽衣甘藍，能夠平衡味蕾，亦可以減膩。醬汁中酸中帶辣，入口辛辣感重，辣醬都落得幾多。

蝦餅刈包$49，包含蒜蓉蝦餅、豆角、油炸鬼脆脆、飯素、檸檬葉咸蛋黃醬，內含花生。以蝦肉打成蝦餅後，質感結實，狀似泰式蝦餅。刈包內有蛋黃醬、豆角粒粒、西洋菜，蝦餅有膩感，豆角則較清新，中和返炸蝦餅帶出嘅油膩感。而當中，油炸鬼切成小塊，再炸至脆卜卜，似泰式小零食。刈包雖為台式小食，但內餡Crossover泰式小食，充滿新鮮感，而且香口惹味，刈包無乜辣度，相對比較溫和。