【落羽松預告】皇后山邨起步走流水響水塘！鏡面湖水賞秋冬落羽松綠葉成蔭畫面逐漸轉紅

入秋之後，除咗賞紅噹噹嘅楓葉，亦係觀賞落羽松嘅季節，而流水響水塘就係拍拖兩個人能夠觀賞落羽松嘅人氣景點。以往去流水響水塘多數需要等候小巴路線，而目前皇后山邨已經入伙，交通較為方便，乘搭巴士路線就可以來往流水響一帶，今次編輯就帶大家從皇后山邨出發前往流水響水塘，同時預告一下水塘中嘅落羽松情況。

無論從九龍東抑或九龍西出發，甚至粉嶺市中心出發，一程巴士路線都可以直達皇后山邨，從皇后山邨步行約30分鐘，即可抵達流水響水塘，交通比以前更方便快捷。

由皇后山邨出發，經山麗苑沿龍馬路走到盡頭迴旋處，轉右下行就會到達皇后山印度廟秘密入口。繼續下行就會見到流水響布格仔公廁，轉出公廁前行至布格仔路，分岔路口可見鍾記士多，拐向左邊方向，直沿布格仔路走到盡頭，就能到達流水響道，步程約5至10分鐘。

一直依循流水響道前行，只有少量上行路段，可以直行至八仙嶺郊野公園迴旋處，步程約5至10分鐘。於迴旋處轉右行，一直沿鶴藪道走到盡頭，大概5至10分鐘可以抵達流水響水塘，一條路線簡單易行，回程時只再沿路走就可以折返皇后山邨，比前往鶴藪總站等候小巴更方便快捷！

流水響水塘向來有「港版輕井潭」、「天空之鏡」等美名，都係由於水塘湖面波平給鏡，倒影清晰；加上湖邊種滿林木，例如白千層、白花魚藤，清風送爽，本來環境清靜，先會於近年演變成郊遊勝地。至於所謂嘅「紅葉」，其實只係湖邊嘅落羽松，並唔係楓葉。編輯今年只想預告落羽松狀態，反而見到當日有多隊本地旅行團帶隊前往流水響水塘參觀，故即使落羽松未變色，人流亦眾多。

雖然流水響一詞可以追塑至清朝時期，名字源由都係因為當時流水發出噹噹聲，但水塘其實係建於二戰後，即60年代左右。水塘面積唔大，屬八仙嶺郊野公園一部份，可輸水至船灣淡水湖，同時作附近農地灌溉用途。

現時，流水響水塘雖然山水一色，但湖畔落羽松仍然未有完全變色，從對岸可見滿屏仍為青翠綠色；而步行至對岸時，近距離觀看，亦只見到有少量落羽松逐步轉為橙黃及橙紅，當完全轉紅時，相信又會變成攝影熱點。

落羽松其實只係一株株杉樹，又叫做落羽杉，踏入秋天之後，杉樹會逐步轉紅，所以唔少人會直接將「睇落羽松」叫做「睇紅葉」，而事實上呢種「紅葉」並唔係香港人好鍾意睇嘅楓葉。不過，落羽松嘅紅係另一番感覺，反而有幾分獨特斯文氣質。當落羽松配合樹林倒影，於平靜湖面構成「天空之鏡」，海天一色，山明水秀，情境會更優美。

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 小巴路線52B可以來往粉嶺市中心及流水響水塘。

❷ 現時比較建議步行往返皇后山邨至流水響水塘，腳程只係約30分鐘，於八仙嶺郊野公園起步，亦只係約15分鐘步程，比再前行至鶴藪總站等車更方便。

❸ 現時落羽松有少量轉紅，相信要等到11月下旬開始會多啲轉紅，12月至1月會較紅。

❹ 謹記自己垃圾自己帶走。

❺ 流水響水塘附近有洗手間、燒烤場、露營場。

❻ 帶備足夠糧水作補給。

❼ 巴士路線78A可以往返粉嶺市中心、皇后山邨，而78X、79X就可以來往九龍東及九龍西至皇后山邨一帶，車程約50分鐘，一程即達，比於粉嶺再轉車等車會較方便。

EATWO

Miss A

【區區有小店】葵芳美食大本營！葵涌廣場尚存22間本土小店匯聚平民小食隨時掃通街｜葵廣推薦2023