西環低調Pho湯底濃郁越南人打骰菜式正宗

2022-11-21 2023-03-29 / 堅尼地城美食、堅尼地城黃店、外賣自取、外賣食乜好、良心食店、西營盤美食、西營盤黃店、越潮 / 作者: 撰文﹕Miss A ；攝影﹕Mr E, Miss A；設計﹕Mr E

西環又係一個隱藏版美食地帶，只不過係以咖啡店佔多，一道道小巷內有一間又一間Coffee Shop，想正經食個飯可能未必適合，若然想拍拖兩個人食飯，除咗Coffee Shop之外乜都食得，西環有一間甚為低調嘅越南餐廳，位於西營盤至堅尼地城之間，店舖開業多年，原來係越南人打骰，炮製嘅係正宗越南菜。

於西環街頭搵食，可能對呢間餐廳未必睇得上眼，外觀平庸，街坊到不得了，但原來係一間由越南人打骰嘅越南餐館，就似穿越越南芽庄。

講到越南菜，Pho越南河就必然係首選，牛肉湯河都係值得點選嘅餐點，例如係招牌火車頭，當中香茅牛肉湯粉$54 有別於招牌牛肉Pho，牛肉略碎，煎香過，含有香茅成份，比一般牛肉更香口。湯底則同越南牛河相似，以牛骨拼蘿蔔熬煮，牛骨湯清甜濃郁，混有香料、魚露，但又唔會太油膩，而河粉則偏幼同碎，只係蘿蔔有啲渣。

而蟹糕湯檬曉$65 就滿滿蕃茄香，以蕃茄為基底，蟹糕帶有鹹味，令湯底酸甜中帶有鹹味，清爽而開胃，而湯底又唔會太油膩。湯檬份量不少，配料更多，筷子一夾起嚟整一箸伴有多款配料，例如生菜絲、青瓜絲、洋蔥粒、炸蒜粒，伴有兩片札肉、豆卜，當中以香蔥尤其豐富，舖滿湯檬表面。不過，蟹糕肉丸份量唔多，而且比較碎，就似蟹肉碎，但味道香濃。

「兩隻嘢露吓營」是「E.A.Two 兩個人醫吓肚」的一個活動，以步行及搭車方式走勻全港41個官方露營地，記錄所有露營地資訊。

小食嚟講必食嘅係越南蒸粉卷$64，同中式粉皮係有幾分相似，但味道各異，粉卷超薄，一塊又一塊粉皮疊起，黏有粒粒配料，比如蔥花、炸蒜、木耳絲、乾蔥碎、豬肉碎，毫不單調。粉卷質感滑溜，蒸起唔會變得黏身，比港式腸粉或中式粉皮更滑。粉卷配搭越南酸甜汁，味道提升，更加唔會太寡。一碟份量十足，無論價錢定粉卷量，都隨時可以飽肚。