【最難麥徑】攀登彎曲山懸崖峭壁挑戰麥理浩徑第四段經水浪窩昂平草原直搗打瀉油坳基維爾營地

麥理浩徑係傳統行山路線，不過近年基本上已經無人再理會，唔少人經過打卡點都唔會特別留意，根據潮流隨時會走返轉頭嘅定律嚟講，編輯就試吓跟隨麥理浩徑而走，而麥徑當中有指最難嘅係第四段，全段足足有12.5公里，需要由水浪窩步行至基維爾營地，拍拖兩個人要款麥徑，少啲體力都唔得呀！

全長約100公里嘅麥理浩徑，曾經於2016年被國家地理頻道封為「全球20條最佳行山路線」之一，而麥理浩徑第四段（MacLehose Trail Stage 4）一直以來都被喻為難度最高嘅麥理浩徑，路段冗長，上落幅度大，極需要體力去完成整段行程，不過就係一段非常有挑戰嘅山徑。麥理浩徑第四段山路雖然崎嶇、陡峭，當中以攀登馬鞍山昂平一段最為艱辛，但第四段沿途都能夠俯瞰西貢海峽風景，絕對令人嘆為觀止。

水浪窩

由西貢乘搭巴士前往水浪窩，落車點近企嶺下老圍，前行經過水浪窩觀星台入口後，即可繼續前行至麥理浩徑第四段山徑起點，位置為麥理浩徑第三段與第四段之間，而西沙路燒烤場對面就係第四段起步之處。

第四段頭段基本都係瀝青路為主，經過直昇機停機坪、水浪窩營地，然後會到達黃竹洋分岔路口，只需繼續轉右上行，仰頭一望會見到始後會經過嘅山頂。途經竹洋路之後，會見到山路分岔口有一個舊式麥理浩徑第四段石柱，比現代化路牌古色古香，此後就能夠轉入山路，由入口至竹洋路入口有約200米，需時約30分鐘。

竹林隧道

山路前行不久，會發現一處竹林隧道，竹林比茅坪北港古道更密集，恍如置身一個翠竹森林仙境。從竹林沿第四段走平路約10分鐘，就需要開始登山路段，依馬鞍山南脊山路上行，需要約1小時腳程，沿途可眺望昂平觀景台，連綿山頭高峻巍峨，山勢非凡，此路段山路急升而凹凸不平，前段有樹蔭，而後段則需要曝曬，係第四段中最艱辛嘅一段，恍如走唔完嘅山路梯級，最終可攀登馬鞍山東南面山坡。

馬鞍坳

到達馬鞍坳山頭小平台，已經到達馬鞍山郊野公園範圍，係馬鞍山西南面，離開第四段則可以轉右上行至馬鞍頭方向。小平台可觀賞西頁海峽壯麗景色，而馬鞍頭則屹立眼前，位置海拔高約556米，比西沙路起步點高約480米。

離開馬鞍山小平台後轉左邊方向，山路右邊可以前往一個小山頭，而前行則可以到達近月甚受歡迎嘅彎曲山。離遠觀望，蜿蜒山路彎彎曲曲，彎曲山山頂狀似懸崖峭壁，滿佈浮沙碎石，山路曲折，但算係和緩平坦，而且景觀開揚，可享360度風景。

彎曲山

彎曲山一端可望馬鞍山、沙田、大埔，以至大美督方向，另一端180度西貢海峽、西貢市景都能夠一覽無遺，包括萬宜水庫、企嶺下海，小島翠綠，海面湛藍，各個島嶼如橋咀島、滘西洲、鹽田仔、吊鐘洲、大網仔，甚至赤門海峽、牛尾洲、清水灣都清晰可見。

大金鐘

從彎曲山繼續前行，可以選擇離開第四段、繞道攀登因為外形似金字塔而被稱為大金鐘嘅山頭，但其實彎曲山、大金鐘係比剛才嘅馬鞍山山頭小平台矮少少，而大金鐘同馬鞍頭一樣山路崎嶇不平，山脊狹窄，比較陡峭。至於繼續沿第四段繼續前行，路段相對經大金鐘略有曲折，但路況明顯而較安全。

昂平大草原

經過大水井、馬鞍山恆安邨分岔路口後，依大水井方向走就可以輕鬆抵達昂平大草原，由彎曲山步行至昂平觀景台，步程約20至30分鐘。昂平大草原海拔高約550米，綠草如茵，遍佈牛隻之餘，亦不時可見滑翔傘飛翔，現場所見有3至4隻牛群聚集，牛群應該好慶幸自己唔會收到限聚令告票。由於編輯之前已經提及過昂平，所以唔再詳談啦。

打瀉油坳

從昂平大草原轉向大水井方向，可以接續麥理浩徑第四段，始後路段上落幅度已經不大，走約3、4分鐘就可以到達大水井分岔口，一直前行經茅坪古道至黃牛山山腰打瀉油坳，大概需要45分鐘至1小時，離開第四段則可於打瀉油坳攀登水牛山、黃牛山。至於繼續循石磴古道步行約20分鐘就會下降至花心坑分岔路口，可以選擇退出至沙田黃泥頭方向。

飛鵝山

而繼續依循麥理浩徑第四段徐徐下行，畫面轉為九龍區風景，大老山到飛鵝山、慈雲山亦盡收眼底，由打瀉油坳前往第四段與第五段會合點，路段仍有約2.7公里要走，需時約30至45分鐘。由山路轉出瀝青路，步行約3至5分鐘就可以到達近大老山、仍然唔開放嘅基維爾營地。轉出麥理浩徑第四段之後，可以回望剛才走過嘅起伏山巒，然後步行約10分鐘，即可以經衛奕信徑第四段轉出大老坳飛鵝山道，而飛鵝山道轉出清水灣道仍有45分鐘至1小時腳程，不容忽視。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 麥理浩徑第四段全程有12.5公里，路況清晰，但必須要有非常充足嘅體力完成。

❷ 乘搭巴士路線299X於沙田市中心巴士總站上車，然後於水浪窩落車，前行就會到達麥理浩徑第三段與第四段中間位置，入口位置於西沙路對面。

❸ 麥理浩徑第四段沿途並無補給點，但起點對面有郊野公園燒烤場，內有公廁、汽水機、重有免費自助加水機，可以先補充足夠水份先起步，但必須自備水樽。

❹ 路段遮蔭地方只係一半半，謹記做足防曬揩施。

❺ 其實麥理浩徑第四段係有退出位嘅，因為會經過唔少山徑，退出點有茅坪古道、北港、馬鞍山、梅花古道、濠涌、石門，而飛鵝山道基維爾營地為連接第五段之處。

❻ 走半小時瀝青路之後，就會到達竹林隧道。

❼ 由竹林隧道至山頂，大概需時1小時，再走10分鐘就會到彎曲山。

❽ 麥理浩徑第四段毋須要經大金鐘。

❾ 由彎曲山到昂坪觀景台大草原，步程約需20至30分鐘。

❿ 於昂坪前往打瀉油坳，腳程為45分鐘至1小時，20分鐘會到達花心坑分岔路口，位置可以退出往黃泥頭方向。

❿ 由花心坑分岔路口走到麥理浩徑第四段與第五段會合點，大概半小時步程。

❿ 由終點前往基維爾營地只係約5分鐘步程，不過營地已經暫停開放。

❿ 從基維爾營地折返飛鵝山山腳，都需要約45分鐘腳程。

❿ 愛護環境，謹記自己垃圾自己帶走。

❿ 路段有唔少影相位，但懸崖位置切勿接近，小心安全！

❿ 彎曲山路段比較窄同危險，大風時更要小心，千祈唔好為咗打卡唔要性命。

❿ 麥理浩徑第四段最需要體力嘅係攀上馬鞍坳嘅一段路，約需上行海拔300米高。