基維爾營地起步！一條路線連走7個山頭窺戰時遺跡穿梭麥理浩徑五六段從九龍行到新界

麥理浩徑已經係愈來愈少人會跟隨嘅遠足郊遊路線，但正因為如此，路段會較少人走過，若然你係酷愛行山之人，應該會更喜愛鮮見人群嘅山路，今次就帶大家拍拖兩個人一次過走麥理浩徑第五、六段，一條路線可以翻過連綿山頭，穿過大老山、飛鵝山、獅子山、雞胸山、筆架山、鷹巢山、金山，沿途一道戰時遺跡徑更可一窺往日歷史，而郊遊徑路段又唔算複雜，能輕鬆從彩虹走到葵涌。

由麥理浩徑（MacLehose Trail）第4段結尾嘅基維爾營地起步，轉右經大老山古道步向第5段起點，穿過林蔭小徑，之後會有一段坡路，初段其實有幾分沉悶，但樹蔭充足，適合初夏郊遊。第5段至第6段毋須曝曬，但又有翻山越野之感，最特別之處就係沿途小徑不時會見到戰時遺跡，可一窺二戰歷史中軍事殘餘之物。

大老山

而麥理浩徑由港督麥理浩爵士（Sir Murray MacLehose）推動下於1979年起產生，被封為全球20條最佳行山徑之一，全程有100公里，每500米一支標距柱，共有200支，多數經郊野公園，唔少會連上馬路或村路。而第5段及第6段合計有15.2公里，前者約有10.6公里，而後者則有約4.6公里，路段一樣依山而建，故景色多變，郊遊徑可以一次過穿梭連綿山頭。

飛鵝山

先走過大老山，第5段沿途抬頭可眺望香港天文台大老山氣象站，造型恍如白色波波。從入口到一個戰壕，步程約20分鐘，再走5分鐘就會見到風景同白色波波，前行會見到廢屋、地洞。始後下行會經過扎山道停車場觀景台，步程約30分鐘，而由入口到飛鵝山觀景台，腳程約需1小時。觀景台位置可180度觀飛鵝山景色，由斧山、九龍灣至慈雲山皆一覽無遺，亦可眺港島海景，觀景台有車進入，所以唔少人都會專程揸車上山瞰九龍市景。

獅子山

依循與麥理浩徑重疊嘅衛奕信徑第4段緩緩下行至獅子亭，會有補給點，步程約30分鐘，近慈觀古道、慈沙古道，再前行1分鐘就會到達獅子山郊野公園沙田坳道入口。第5段多戰時遺跡，由獅子山步行至筆架山，會經過戰壕、座標、機槍堡，1小時左右會到風雨亭。

雞胸山

繼續沿山路上行，會經過海拔約437米嘅雞胸山，雞胸山有如獅子山餘脈，靠近獅子山頭，不過走出雞胸山山頂就唔係麥理浩徑路段。麥理浩徑走獅子山，需於山頭後方繞道，由獅子亭步行約45分鐘就可抵達風雨亭，位置可俯視黃大仙、天馬苑、橫頭磡方向，甚至可眺望格仔山。不過，麥理浩徑其實係唔經獅子山頭，只係直接前往筆架山方向。

筆架山

由獅子山上行約15分鐘，攀上筆架山石級，然後會抵達筆架山觀景台。從筆架山高點俯視，不單可回望獅子山頭，高山、海灣，以致九龍半島風景通通盡收眼底，包含九龍仔至嘉頓山。再攀登約10分鐘步程，即可以上升至筆架山山頂白色波波位置，有指筆架山最高點海拔約有457米高。

鷹巢山

離開筆架山，一直下行至鷹巢山自然教育徑，連接鷹巢山山腰，路段多為落樓梯，沿途似森林一樣，腳程約20至30分鐘，沿路可抵達大埔公路，即係第5段與第6段嘅交接位，只需橫過馬路就能夠到達第6點起點，位置係大埔公路與金山路交界，走過水壩就能上行金山路。

金山

經過九龍水塘就能走過第6段，簡單啲講，金山路就係麥理浩徑第6段，多為瀝青路，係麥理浩徑最短嘅一段路。而金山長命斜出名多獼猴群聚集，金山路沿途好大機會會見到山界猴群孫悟空，而且係接連一群又一群，往上走會發現路上恍如擁有無止境嘅馬騮群，切勿挑釁對方，以免出現意外，只需安靜步行就可以，盡量多人一齊行。

九龍水塘至城門水塘

一直沿金山路走到涼亭，可以轉上山坡，繼續走第6段，走約20分鐘會到達城門碉堡，沿途可下瞰葵涌至荃灣一帶市景，亦可回望剛才走過嘅獅子山、筆架山，加上位置朝西面，亦可觀黃昏日落景色。

基本上1小時能夠走完第6段，而由九龍水塘走到城門水塘，會途經唔少戰時遺跡，包括城門碉堡、砲兵觀察所、機鎗堡、隧道、軍用座標石，都係二戰時期英軍抵禦日軍入侵香港而興建，戰時遺跡仍可透視位置係醉酒灣防線當中一個軍事據點，當中城門碉堡就係二級歷史建築物，可連接隧道、機鎗堡、觀測台，係當時嘅重要軍事設施，而幾道隧道都係以英國倫敦街道命名，包括有查寧坊（Charing Cross）、麗晶街（Regent Street）、舒佛畢利巷（Shaftesbury Avenue）等，如同一道戰地遺跡徑。

而第6段於城門郊野公園終結，經過孖指徑戰壕古蹟就會到達城門碉堡，再走約10分鐘就會到達路口燒烤場，同時接駁麥理浩徑第7段，前行則會到達上城門水塘。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 由第4段基維爾營地起步，轉右就可以到第5段起點。

❷ 從入口到一個戰壕，步程約20分鐘，再走5分鐘就會見到風景同白色波波，前行會見到廢屋、地洞，由入口到飛鵝山觀景台，腳程去1小時。

❸ 由飛鵝山觀景台走到獅子亭，步程約30分鐘，沿沙田坳道走，前行半分鐘毫會到獅子山郊野公園入口。

❹ 第5段需要3起3落，但上落斜幅唔大，第6段更加少有上落，而且多為瀝青路。

❺ 第5段多戰時遺跡，由獅子山步行至筆架山，會經過座標、機槍堡，1小時左右會到風雨亭。

❻ 由風雨亭步行至筆架山觀景台，腳程只係約10分鐘，再走約10分鐘就會到達山頂白色波波訊號站。

❼ 落返鷹巢山自然教育徑，步程約20至30分鐘，山路會再走約30分鐘，然後到達大埔公路琵琶山段。

❽ 第6段會由九龍水塘、城門水塘，亦會經戰時遺跡，包括城門碉堡、砲兵觀察所、隧道、座標，1小時會走完，接駁第7段。

❾ 經過金山路時，切切餵食或挑釁猴群。

❿ 各個戰事遺跡已有一段歷史，未知結構如何，謹記唔好胡亂進入。