馬鞍山市區路線尋三杯酒兩杯茶一嚿飯景觀遼闊闖白石公眾高爾夫球場連貨櫃場一條路線走泥涌/海星灣/烏溪沙沙灘

如果你熟悉馬鞍山，應該會知道咩叫做「三杯酒、兩杯茶、一嚿飯」；而唔熟悉嘅人可能會以為係講緊指拖兩個人「醫吓肚」去邊食嘢，但事實上呢個係「影吓相」去邊玩嘅好地方。

馬鞍山西沙路有唔少靚景地，適合去打卡影相，前段有泥涌泥灘，後段可見水浪窩、企嶺下，而今次編輯就帶大家前往西沙路中段，走訪「三杯酒、兩杯茶、一嚿飯」，林蔭小徑中有一個又一個小沙灘，前方有小島，潮退時會出現連島沙堤，遠方亦可眺望榕樹澳漁排、深涌，甚至大埔大尾督、船灣方向。

於馬牯纜站落車，前行至井頭村方向，一直下行到海邊，步程約15分鐘。不過現時左右兩邊都係地盤，需要特別小心安全。井頭村盡頭就係海旁位置，同時可見一個唔開放嘅私人碼頭，旁邊為小泥灘。

一直向左邊前行，就可以通往井頭碼頭，盡頭既有釣魚郎，亦有115號白色燈塔。到達井頭碼頭之前，會見到一個又一個小沙灘，都可以作休憩地，原來由井頭村開始嘅海旁一小段林蔭小路，就係馬鞍山區內所謂嘅「三杯酒、兩杯茶、一嚿飯」！

點解會叫做「三杯酒、兩杯茶、一嚿飯」呢？首先，海旁小路對岸為一個小島嶼，位於企嶺下海，名為烏洲，外形似足一嚿飯，所以就被稱為「一嚿飯」。其次，鳥洲旁邊嘅地旁，島上有5個小山丘，其中3個比較細小，而且聚埋一齊，就似3個小酒杯，恍如三杯酒小島，故呢個地方就統稱為「三杯酒」。至於兩杯茶嘅意思，就係隔離兩邊嘅小山，就似2個無耳柄嘅茶杯，所以就叫「兩杯茶」。而「一嚿飯」加「三杯酒」再加「兩杯茶」，形容詞充滿美感，就係呢個馬鞍山海邊岬角。

鳥洲係一個潮退時可以海陸相連、步行而至嘅小島，皆因佢係一個連島沙洲，島上有小沙灘，潮退時自然會露出水面，否則如要環島漫步，可能需要依賴獨木舟。據悉，鳥洲有唔少生物，例如海星、海膽、鮑魚、生蠔等，但謹記唔好私自帶走任何海洋生物，眼看手勿動！

依循林蔭小徑走，會見到「三杯酒」內嘅一個又一個小沙灘，沿岸更可見紅樹林小徑，亦有椰子樹，水質良好，甚至清澈見底，整道小徑背山面海，山明水秀，似足岬角，人流不多，有如世外桃源。

走完「三杯酒、兩杯茶、一嚿飯」，繼續前行就會到達剛才提及嘅井頭村盡頭井頭碼頭及115號白色燈塔，碼頭可見有三兩個釣魚郎。井頭碼頭附近有一個公廁，貌似係盡頭位置，但事實上重有得行，沿小山路上行一小段路，經小路可以折返輋下村，毋須走回頭路。

不過，碼頭往輋下村一段路比較沉悶，亦會經過墳墓，但即使陽光猛烈，小徑依舊幽暗。路段都算明顯，沿路走約15分鐘，就可以走出輋下村，但末端有機會有野豬出沒，再前行5分鐘就可以走出西沙路。

前行約10分鐘，會經過西沙茶座，前方就係著名嘅影相位泥涌泥灘，但編輯已經寫過幾次，無打算深入再講。反而，再前行約15分鐘，由年華路轉入落禾沙里，穿過豪宅地帶後，可以下行至海星灣。此路段海岸資源極豐富，海星灣亦係一個優質沙灘，只不過唔係康文署正式泳灘。

海星灣位於泥涌至烏溪沙石灘之間，位於迎海·星灣御下方，名字等同南極洲嘅海灣，但沙灘面積唔算太大，但環境優美，亦係生態豐富之地，例如係海星、蜆殼、蠔殼、泥蟹，海洋生物眾多，被劃為自然保育區。

到達耀沙路迴旋處後，轉右就可以前往白石燒烤場方向，本來白石燒烤場重有藤原豆腐店，但現時望入去已經無咗。而燒烤場中段可見白石高爾夫球練習場、白石貨櫃場，其中高爾夫球場雖然貌似私人場地，但其實係公眾可以使用嘅高爾夫球場，更有超過60條高爾夫球道；而白石貨櫃場其實係白石儲存倉，係一個大型露天儲存倉，就恍如另一個版本嘅西環碼頭，都有連綿貨櫃矗立海旁。

馬鞍山白石高爾夫球練習場地方偌大，可眺馬鞍山市景，原來前身係白石難民營，白石（Whitehead）本身原係越南難民營嘅代名詞，80年代曾經有唔少越南船民問題。白石位置背靠馬鞍山，前臨吐露港，就似一個陸岬，又叫烏溪沙咀，97年後先變成高爾夫球場。

折返耀沙路，向渡頭灣村方向走，10分鐘步程可以前往烏溪沙沙灘。此位置並非「海洋之心」心形石嘅地方，但環境更好，可遙望八仙嶺，環膜吐露港，亦可以觀賞黃昏日落景色，連CNNGo都將烏溪沙沙灘選為「2010年欣賞浪漫夕陽的最佳海灘」，於此時此景為馬鞍山一日遊作結就最適合不過。穿過林蔭小徑，10分鐘步程就可以通往著名嘅烏溪沙石灘心形石位置，不過就無咗心形石啦，旁邊就係馬鞍山市中心嘅海濱長廊。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭巴士路線99,99R,299X，或者小巴路線807K，都可以於西沙路落車，馬牯纜站比較接近井頭村。

❷ 前往井頭村路段兩邊有地盤工程，要小心步行。

❸ 就算見到有可愛有趣嘅海洋生物，謹記都唔會私自帶走。

❹ 烏洲連島沙洲只有潮退時出現，潮漲時謹記切勿前往。

❺ 泥灘、石灘都會濕滑難行，同時要小心灘上硬物，例如蠔殼、貝殼等。

❻ 由井頭碼頭至輋下村路段有好多惡蚊，記得做足防蚊措施。

❼ 注意白石高爾夫球練習場需要自備高爾夫球棍。