【楓葉預告2022】松仔園起步！大埔滘自然護理區四色林徑矗立10株楓香秋季紅路變紅葉徑

大埔滘自然護理區係廣為人知嘅大埔山路之一，四色林徑路段可連接至鉛礦坳，但亦有晨運路線，今次適逢秋天，編輯帶大家拍拖兩個人走過最簡單嘅一道山徑路線，因為整道山路沿途可見楓葉，瞬間蛻變為紅葉經。

前往大埔滘自然護理區之前，可於松仔園站落車，靠迎大埔滘花園，位置為大埔公路大埔滘段，步行1分鐘即達大埔滘自然護理區山路入口。大埔滘自然護理區其實係本地首個特別地區，於20年代曾被港英政府推行植林計劃，廣植馬尾松，故呢一帶就叫做松仔園。後來，大埔滘一帶林地於1977年被劃為自然護理區，內有逾百種樹木品種，即現時嘅大埔滘自然護理區，入口有保安站崗。

大埔滘自然護理區嘅大帽山及鹿山以西，草山以北，鉛礦坳以東，荔枝山及大埔公路以南，整道山路以四種顏色聞名，分別係紅路、藍路、啡路、黃路，當中以只有約3公里長嘅紅路最短，其次為4公里嘅藍路，以及7.5公里嘅啡路，而最長嘅山路就係全長約有10公里嘅黃路，路段可以直通鉛礦坳營地，大概時間亦詳列路牌上。

4道山路嘅起點與終點一致，沿途既有樹木，中途亦有溪流，可以於同一個地方起步同結束。不過，今次我哋睇楓葉，故只需要帶大家遊走最短路程嘅紅路，大約過多一至兩個星期，紅路即會變成紅葉小徑。

由大埔松仔園起步，經大埔滘花園，轉入大埔滘自然護理區，即達山路入口。依循大埔滘林徑滘鉛段上行，一直為瀝青路，初段未有分四色林徑。前段四色山徑可以係同一路線，中段分岔路口啡路、黃路為同路，而紅路、藍路則為同路，後段先分為個別顏色路段，四色林徑皆為環迴路線。

上行不久，俯首不難發現地面有片片落下嘅楓葉，抬頭亦自然可仰望楓葉高掛楓香樹頂。暫時楓香多數仍然呈青綠色，只有少數轉為昏黃或橙紅色，故未有完全演變成紅葉徑，大概仍需要一至兩個星期時間。

一直上行至大埔滘自然護理區嘅盡頭四色山路起點及終點，已有約6至8株楓香矗立大埔滘林徑，從地面觀察，每株都恍如高聳入雲，只有少量楓葉徐徐落下。

先走左邊大埔滘林徑山路，路段為四色林徑共同起點，為泥路及石路，位置既可以見到涼亭、公廁，同時更有一株比較接近人群同貼地嘅楓香樹。楓葉從綠轉黃，然後由黃轉紅，逐步轉色，橙紅夾雜於翠綠之間，楓香預告畫面原來都幾有趣。呢株楓香為涼亭背後，外面有郊野公園枱櫈，楓葉較前段嘅楓香低，比較容易拍攝。

紅路沿途間中皆可見到楓香，亦有楓葉落下，若單單走過大埔滘林徑紅路睇楓葉，可以黃昏出發，雖然全程遍佈林蔭，無乜景觀可言，但紅路斜度唔高，路段輕鬆易行，亦係最佳快閃路線，當然最好避免入黑上山。折返原路返回松仔園站時，都算可眺望遠方吐露港海景。

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 巴士路線72,72A,73A,74A、小巴路線28K 皆可到達松仔園站。

❷ 愛護環境，自己垃圾請自己帶走。

❸ 護理區內雖然有郊野公園座椅，但不設燒烤爐，同時亦嚴禁生火。

❹ 雖然路段唔長，但都記得要準備足夠糧水。

❺ 紅路路程較短，1小時足以往返。

❻ 山路內遍佈林木，故林蔭眾多，但最好避免天黑走過。

❼ 林木眾多，最好做足防蚊措施。

❼ 走到大埔滘林道四色山徑分岔路口時，建議以左邊山路為起點，右邊瀝青路為終點，一旦太夜亦唔會太危險。

EATWO

Miss A