【東京購物】露營人必到！新宿／原宿6間人氣露營用品專門店風格各異平貴任擇

自問喜愛露營之人，去國外當然係找尋戶外露營用品專門店。東京新宿及原宿一帶有多間受歡迎嘅露營用品店，部份樓高幾層，地方偌大，包含各式各樣日本露營用品。今次編輯為大家推介5間人氣露營用品店，風格不一，平貴皆有，適宜拍拖兩個人去尋寶！

東京露營用品店﹕Aplen Tokyo

距離新宿駅極接近嘅「Aplen Tokyo」，從東口步出，徒步只有約1分鐘步程，交通便捷，亦鄰近歌舞伎町。「Aplen Tokyo」於2022年初才開幕，亦係一間著名日本戶外露營用品及體育用品店。新宿駅「Aplen Tokyo」地面樓高8層，加上地下2層，為該集團最大一間旗艦店，店內同時分成唔用類別，喜愛戶外活動嘅朋友，掃貨必到！當中，若只係想針對露營用品，可集中前往4樓及5樓嘅「Alpen Outdoors」，各式露營用品遍佈2層樓，無論想你想搵燈具、廚具，抑或寢具，甚至露營裝飾嘅道具，超過200個品牌及70000種露營用品應有盡有。「Aplen Tokyo」價格上有平有貴，都係實用之選，除咗「Alpen Outdoors」自家品牌，當中更有其他品牌，例如係車Camp專用嘅品牌「Coleman」、人氣露營用品品牌「DOD」，以及「LOGOS」、「Nordisk」、「THE NORTH FACE」等，當中更有唔少日本限定露營用品。

東京露營用品店﹕L- Breath

同樣位於新宿區嘅「L- Breath」，係日本另一間知名露營用品店，不單有多個大眾品牌，風格多元，價格平民化，而且可以退稅，吸引唔少遊客前往採購心頭好。「L- Breath」位置近JR新宿駅南出口，算係相對偏后綜合型嘅露營用品店。店舖樓高9層，加上地下1層，Outdoor商品眾多，包含有背囊、服飾、運動鞋、露營用品、滑雪用品等，各類品牌皆有，多為日本潮流風格。

東京露營用品店﹕Snow Peak LUMINE／Snow Peak Land Station Harajuku

「Snow Peak」係一個著名嘅露營用品牌子，由1958年起開業，於新宿、大久保、中野地區有分店，以露營用品及戶外活動服飾為主打，為日本人喜愛嘅露營用品專賣店。「Snow Peak」不僅人氣十足，而且產品充滿時尚感，尺寸及色號都好齊，但價格就屬中上水平。店內既有帳蓬、焚火台、煮食爐、燈具等，亦有服飾、餐具、保溫水杯等，東京店更有限定產品，而且可以退稅。「Snow Peak LUMINE」本身產品風格偏向年輕女士們，年齡大概係廿幾歲，當然男士服飾亦唔少。另外，「Snow Peak Land Station」更有「Snow Peak Cafe」，逛到攰都可以坐低休息一下。

東京露營用品店﹕A & F Country Main Store

而「A & F Country Main Store」亦係一間東京戶外露營用品店，位置近新宿駅至東新宿駅。店內以登山裝備、露營用品為主，種類不少，各種配件都有，但風格上就比較偏用時尚潮流嘅男士，而且帶有美式風格。

東京露營用品店﹕UNBY STORE

位於原宿嘅「UNBY GENERAL GOODS STORE HARAJUKU」，距離原宿駅約有10分鐘步程，屬小型露營店，店內有唔少露營專用嘅背囊、食物、燈具、餐具水樽等。「UNBY STORE」價格與品質掛鉤，未算最貴，亦唔算最平。

東京露營用品店﹕Chums

至於位於原宿一帶嘅「Chums」，係來自美國嘅品牌，商品揉合日本風格設計，品牌有超過30年歷史。「Chums」由眼鏡帶起家，於全日本僅有一間專門店，只需要於表參道找尋一下，不過就唔算難搵。店內各式戶外露營用品價格均偏高，但風格就更時尚，追上潮流，由於來自美國，所以露營用品設計上既有木系風格，亦都帶有幾分美式悠閒風格。