【東京玩樂】多摩市「Sanrio Puroland」室內樂園打卡攻略！必訪卡通明星Hello Kitty／玉桂狗／My Melody／布甸狗｜Sanrio彩虹樂園 / 三麗鷗彩虹樂園

Sanrio迷召喚！自問係Sanrio迷嘅朋友，到東京自由行時，不得不拍拖兩個人前往多摩市「Sanrio Puroland」。無論你鍾意Hello Kitty、My Melody、Little Twin Stars，抑或係酷企鵝、布甸狗、Snoppy、肉桂狗等卡通人物，都一定滿載而歸！

三麗鷗彩虹樂園 (Sanrio Puroland) 係東京多摩市一個主題樂園，以Sanrio卡通人物為主，不過同別府大分縣嘅「Harmonyland」有分別，並非處於室外，反而只係一個室內樂園。東京嘅Sanrio主題樂園遊客較少，當日見到大多數都係日本人，受到當地人歡迎，只不過樂園設施唔多，而售賣紀念品嘅地方佔咗一半。

除咗Hello Kitty，亦有My Melody、Little Twin Stars、蛋黃哥、XO、酷企鵝、布甸狗、Snoppy、肉桂狗等，通通都係世界各地受歡迎嘅Sanrio卡通角色，吸引大人及小朋友，據悉每年有超過150萬遊客前往參觀。

呢個Sanrio樂園外觀以夢幻城堡設計，有如童話風格，室內大多數以打卡點及大型歌舞劇等巡演為主，即使落雨都唔使怕，相對大分縣嘅Sanrio樂園就四季皆宜。至於遊樂設施就比較少見，而且需要另外付費，更重要係需要大排長龍。

室內樂園樓高4層，入口位置為第3層，包括有紀念品店，而下方有2層，包含有巡演地方、遊樂設施、打卡點，而入口處上層則為餐廳位置。卡通人物遊樂設施有﹕Hello Kitty at Lady Kitty House、Sanrio Character Boat Ride、My Melody & KUROMI Mymeroad Drive、Kiki & Lala Twinklingtour、Gudetama Land、KAWAII KABUKI。除咗係一個華麗城堡，下層中庭智慧樹舞台有如一個森林，當中更有歌舞表演及真人卡通巡遊，部份表演有如混合日本傳統藝能「歌舞伎」，卡通人物跟隨音樂載歌載舞，吸引眾多小朋友圍觀。

頂樓為Sanrio主題餐廳，當中有3間餐廳可以選擇，鹹甜皆有，菜式以卡通角色為原形，可愛精緻，絕對要相機食先！份量迷你嘅卡通便當盒就係其一，每份便當盒1400円，加上一包果汁，份量係一兒童餐，但就好可愛。另外有一款卡通人物主題甜品杯，每份780円，但更大驚喜嘅係蛋包飯，雖然無咩卡通人物圖案，但水準不俗，已經足夠完勝香港嘅蛋包飯。

喜愛Sanrio嘅朋友，前往紀念品店應該難以守得住銀包，走入樂園帶走心頭好是常識吧！各款卡通人物週邊精品非常可愛，既有公仔，亦有實用文具、衣物，更有手信系列，商品琳瑯滿目，豐儉由人。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 入園費用為成人3,300日圓、小童（3－17歳） 2,500日圓；假日門票為成人3,800日圓、兒童（3－17歳） 2,700日圓。

❷ 可預先到klook網上購票，價錢較低﹕https://www.klook.com/zh-HK/activity/2276-sanrio-puroland-tokyo/ 。

❸ 由東京新宿駅乘搭京王線至京王多摩中心駅（京王多摩センター駅），車程約30分鐘。

❹ 門口有樂園指南，雖然有唔同語言，但只有日本人版本先有巡遊表演時間。

❶ 地下後方有儲物櫃可供租借使用。