九龍城澳式放空Cafe Gladys’ Estate Coffee 專心沖咖啡用心小店

香港Cafe有好多，雖然有好多係混水摸魚、質素平平，但仍然有好多有誠意又用心嘅小店，今次前往區內滿泰國菜嘅九龍城區，當中有一間澳洲模式嘅咖啡店，除咗缺點係價錢稍高而份量偏少之外，質素不俗，拍拖兩個人去飲杯咖啡放空吓，不失為一個週末節目。

位處九龍城嘅Gladys’ Estate Coffee，除咗咖啡，就以西式All Day Breakfast及意粉等類別為主，廚房為開放式設計，店內基本呈長形，水泥風格設計簡約，屬朋友聚會或飲杯咖啡放空嘅好地方，吧枱位置更有兩三個座位可觀摩咖啡師沖泡咖啡。

咖啡店固然應該以咖啡為主，店內似乎係重視咖啡選擇，Black & White Coffee都有別於一般普通咖啡店。有一種係Signature TWO Wishes HKD$70，即係檸檬茶加咖啡，簡單嚟講即係檸啡，將酸甜檸檬茶同咖啡混合而成。而Latte都有唔同類別，其中編輯想試嘅係3-Quarter Latte $43，特製咖啡有啖啖奶香味，入口仍然滑溜，無烘焙咖啡嘅苦澀味。3-Quarter意思就係同一般Latte有同樣份量嘅濃縮咖啡，但就會少啲牛奶，咖啡只加到四份三，令咖啡原味更突出。

細心留意會發現，店內咖啡係無砂糖提供，而咖啡亦無糖，口味原始。若然唔想飲咖啡類別，亦可以選擇非咖啡飲品，例如Home Juice (freshly-squeezed) $38，以鮮榨果汁為主，當日為鳳梨、提子、橙汁，果味濃郁，鳳梨味唔算太重，提子只係帶上甜味，主要為橙汁味，橙汁滲出少少鳳梨味。

據悉，店內以健康及外國原材料炮製，難怪每項菜式價錢都係偏高。沙律中有Crab Meat & Salmon Salad $145，包含蟹鉗肉、牛油果、香煎茴香、挪威煙三文魚、酸種多士、雜菜沙律配自家油醋，多士烘烤得偏硬，油醋則酸得令人開胃。而Chicken Pesto Fusilli $138，包含雞肉、車厘茄、日曬蕃茄乾、粗蘆筍、螺絲粉配自家羅勒香蒜醬、巴馬臣芝士，最出色嘅羅勒香蒜醬，螺絲粉香口而不膩，口味調校得恰到好處。

Prawn Tomyum Linguine $148，包含黑虎蝦、扁麵條配自家冬蔭功湯，就似冬蔭功醬撈意粉，無期望過Cafe嘅蝦有鮮味，所以並無失望，但冬蔭功醬撈麵味道係唔差，茄汁味重，辛辣味稍輕，只係香料唔重，由於前一碟羅勒醬螺絲粉較出色，所以難免有比較。至於甜品選擇有窩夫或鬆餅，其中Secret-Filling Hotcake $128，包含夾心鬆餅、水果、意式雪糕、配自家製雲呢嗱醬，份量細小，但鬆餅內有乾坤，中間暗藏暖笠笠朱古力醬，與鬆餅外嘅冷冰冰雪糕球正好構成對比。