西環堅尼地城一角隱藏民族風小店罕見地道尼泊爾餃子合港人口味

平常拍拖兩個人唔係食日本菜、韓國菜，就係港式、中式、西式？雖然近一年結業潮湧現，食肆紛紛閂門，但其實仍有唔少有水準又值得拍拖兩個人支持嘅小店，甚至有罕見嘅少數民族食店。今次推介一間位於西環、本地超罕見嘅尼泊爾小食店，由嫁雞隨雞嘅港媽與尼泊爾藉另一半打骰。

小店位於西環堅尼地城，於2020年尾先開業，雖然位置正對地下鐵路站，亦鄰近巴士站、小巴站，交通便捷，但店舖地方細小，門面亦唔突出，行過亦未必一定會睇到。室內雖有4至6個座位，但有部份街坊亦唔介意站於門口用餐，望落同坐低一樣滋味。不過店內出品選擇唔多，基本上只有幾款，包括尼泊爾餃子、薯仔波波等，飲品同樣少，只有黃金牛奶等少數選擇。

室內雖然面積細小，但設計上充滿尼泊爾風格，採用編輯特別喜愛嘅民族風為主調，感覺親切。環境上其實係打卡風格，但地方上就欠缺空間，所以入去都係食嘢算啦。

Pani Puri 爆汁薯仔香脆波波$40、Dahi Puri 乳酪紅石榴薯仔波波$40，前者含香料薯蓉、酸辣凍湯、脆炸波波、尼泊爾地道街頭小食；後者含香料薯蓉、酸甜凍湯、乳酪紅石榴、脆皮波波，同樣係一種下午茶冷盤小食。

一份香脆波波有8隻，每隻圓咕碌狀，賣相精緻，精巧又可愛，單睇外表打卡一流！食法只需要拎起香脆波波，倒滿特調酸辣凍湯，然後一啖放入口，餡料於口腔中混合，酸甜醬汁、香脆波波同綿滑薯蓉合體層次分明，口感鹹脆，酸辣凍湯味道唔搶，口味獨特，感覺清爽。

尼泊爾菜同一般東南亞菜稍有分別，平常印度菜、泰國菜、越南菜等都係重視香料，但尼泊爾菜似乎不能同日而語。以尼泊爾菜主打嘅饃饃餃子，雖然已經係地道小食，但食落並非普遍東南亞菜嘅重香料感覺，初初以為係就遷就香港人，所以調校過口味，香料味無平常東南亞菜咁重，更容易入口。食嘅時候甚至思考，到底係迎合本地人口味好，定製作地道口味好，邊一個選擇會更吸引香港人？其實我哋都唔知道答案。

餃子即叫即煮，Steam Momo 招牌爆汁蒸饃饃餃子$35/5隻、$50/8隻，可揀雞肉、豬肉、純素薯仔燉菜，醬汁有蕃茄香辣汁、芝麻花生汁，另有香煎Pan Fried Momo選擇，蕃茄香辣汁帶上酸辣，好配合蒸餃，入口開胃，令餃子帶上狂野感覺，有如餃子靈魂，不過餃子本身唔蘸醬汁都夠滋味，唔蘸醬汁就帶有清純感。

餃子一般需要等待至少10分鐘，如果係堂食嘅話，會以手工製嘅尼泊爾特色餐盤盛載，上面只舖上牛油紙，竹藤之類製作嘅小籃，充滿民族風格，又靚又有特色！

而餃子外形其實有幾分似廣東餃子，但內餡就並唔一樣，餃子餡料豐富，包含尼泊爾香料、洋蔥等。餃子表皮有韌度，內裏肉汁飽滿，味道清淡中有微微香料味。無論雞肉定豬肉都好飽滿，餃子入口有洋蔥香，餡料肉質軟腍，有肉香，豬肉餡料特別多肉汁。餃子內僅有適量香料，唯獨無東南亞嘅重香料感覺。唔好問點解無牛肉餡料，因為牛喺尼泊爾當地係好神聖。