全港最多T形街牌街道？即睇深水埗4個離奇消失街牌前後實況

香港舊有文化產物買少見少，除咗維城界碑、皇冠郵筒，T形街牌都係能夠代表昔日香港嘅歷史痕跡，鐵鑄街牌造型獨特，值得拍拖兩個人前認識及往打卡。不過，繼早兩年銅鑼灣棉花路街牌後，深水埗有兩個T形街牌被網民發現同一個星期內同時被消失！而編輯親身查證後，發現深水埗區內近期並唔只兩個T形街牌被消失，離奇消失的街牌合共有4個！

年輕朋友對於形街牌可能有啲陌生，但其實呢種舊街牌係舊香港嘅文化產物，係英國殖民時期留低嘅街牌。不過，現時香港剩餘嘅舊式街牌數目愈來愈少，大多唔係被拆除，就係離奇消失。街牌以T字形設計，除咗黑框白底之外，街名以上英下中方式呈現，而且係字粒式設計，將陶瓷字母鑲嵌鐵框內，並非現時電腦印刷嘅街牌，不單考功夫，而且組裝過程繁複，故T形街牌非常獨特。詳情可參考eatwo舊有關於T形街牌嘅文章。

目前全港僅存嘅T形街牌數目不足100個，而你又知唔知最多T形街牌嘅街道喺邊條街呢？事實上，以編輯尋找全港T形街牌嘅「香港舊街牌遊」經驗所得，幾乎可以肯定，現時全港最多T形街牌嘅街道正正係深水埗北河街！同一道街道內，原來有8塊T形街牌，近年仍然有4塊T形街牌，分佈於全條街道前中後位置！

不過，近日有網民在香港舊式街牌@史研社發現深水埗區同一星期內有兩個T形街牌被消失，位置為北河街同福華街交界！其中一個被消失嘅T形街牌正正係北河街街牌，只不過另外3個北河街T形街牌仍然尚存。有網民猜測一係被盜，一係被清拆，到底實情係點？編輯日前親身遊走深水埗區，發現區內被消失街牌並唔只2個，而係4個，情況唔似係因為裝修外牆而暫時拆除，而係疑似有人刻意拆走！

▼ 一星期內有兩個T形街牌被消失，位置為北河街同福華街交界

▼北河街同福華街交界未移走前的T形街牌

除咗北河街、福華街交界2個被偷走嘅T形街牌，同區內鴨寮街、基隆街2個T形街牌同樣已經被消失！鴨寮街同北河街、福華街一樣，只係剩低T形痕跡同鐵釘，而基隆街位置較低，探頭發現只係剩低T形狀嘅舊式紙皮，以紙皮內容及字體推斷，為舊時學校招生及川貝枇杷露廣告，疑為T形街牌墊底。

▼ 基隆街有T形街牌被移走

▼ 基隆街未移走前的T形街牌

▼ 鴨寮街的T形街牌同樣被移除

▼ 鴨寮街原本存在之T形街牌

如果係由於大廈外牆維修，的確有可能出現暫時拆走街牌嘅情況，以早幾個月編輯親身實證，福榮街近青山道T形街牌曾經因外牆翻新而拆除，故曾經出現被清空嘅情況，但當棚架拆除及翻新完畢，一星期後T形街牌又重新裝回原先位置。至於今次4個T形街牌悉數被拆走到底係咩原因，確實有待查證，暫時4個街牌嘅大廈似乎都未有裝修或翻新跡象。

繼銅鑼灣聖保祿修院外牆上棉花路及長沙灣昌華街T形街牌被偷走後，深水埗街頭近一星期內，又有至少4個T形疑似被盜，只遺留T形街牌印或鐵釘痕跡！據編輯遊走深水埗至長沙灣、荔枝角一帶，合共有4個T形街牌被消失，都係分佈於深水埗區，分別為北河街、福華街、鴨寮街及基隆街，至於其舊街牌如北河街、福華街另外一角，以及欽州街、九江街，以至保安道、永隆街、兼善里、荔枝角道嘅T形街牌依舊完好保存。

其實，香港街角有好多真正值得欣賞嘅地方，如果政府有關部門識得保育街頭文物，係可以更有效地推廣及宣揚香港之美。