【曼谷景點】曼谷四面佛嚮應環保不再燒香！即睇參拜次序、還願方法、禁忌｜附交通及開放時間

曼谷四面佛係好多人去泰國曼谷旅遊必去嘅景點，所謂入屋叫人、入廟拜神，去到四面佛門前，自然應該拍拖兩個人拜一拜四面佛。不過，拜四面佛前要先了解參拜次序，拜四面佛重有唔少禁忌，一旦靈驗又要如何還願呢？原來目前四面佛都嚮應環保，唔再燒香，即刻睇睇拜四面佛時有咩要注意﹕

近Siam嘅曼谷四面佛廣場，位於君悅酒店之下，距離BTS「Chit Lom」站不遠處，交通便捷。現時，曼谷四面佛都嚮應環保，所以原先香火鼎盛嘅廟宇，已經變成一個無煙空間，反正心誠則靈，所以將火爐移走，唔再燒香都係好事。

泰國曼谷四面侈向來都有唔少旅客慕名而至，唔少人更大讚四面佛好靈驗，想要願望成真，就要先了解四面佛，知道拜祭四面佛方法及順序規則。

事實上，曼谷四面佛並唔係一座佛，而係神，屬印度教三位一體神創造出嚟嘅大梵天王。四面佛固然係擁有四面，但雙腳方向只有一邊，雙腳面向嘅一方為正面，四面皆代表祝願唔同範疇。

參拜四面佛時，謹記要依次序拜祭，記得係順時針方式，唔好隨意跳過任何一面，因為拜四面佛有禁忌，有指若偏心任何一面，兼他會呷醋。另外，如果家中有喪事，100日內都唔好拜四面佛啦。拜祭時要講清楚咩願望，達成後嘅還願方式，以及還願時間，願望唔可以係傷害他人啊。

以四面佛第一面來說，即係手中拎住佛珠嘅一面，其實係象徵事業，可祈求工作、學業，或者升官、官司；依順時針方向轉動，第二面就係代表感情，可祈求同愛情、親情、婚姻，甚至係人際關係有關都得；而背面就係四面佛第三面，代表財富，同時包括正財、偏財等財源；最後第四面就代表住健康、平安，包含身邊人嘅健康，以及可以祈求家庭和諧、疾病好轉。

順時針拜祭時，需要購買少量祭品，廣場角落就有鮮花、蠟燭、香燭等，最平為25泰銖，已包括12支香、4支蠟燭、4個花環；亦有價格較高嘅選擇，祭品固然係比較大。拜祭前，最好先喺四面佛廣場一隅以聖水洗手，以示潔淨；拜祭時，每一面都放3支香、1支蠟燭、1串花環；拜祭後，以聖水稍稍灑向自己，代表除去厄運。

一旦願望成真，謹記兌現承諾再嚟還願。而曼谷四面佛還願方法有好多，最為人熟悉應該係請四面佛背後嘅舞團表演俾四面佛睇，可按自己預算請2、4、6、8人表演，不過價錢以人數計，每2位需260泰銖，4位需360泰銖，6位就要610泰銖，而8位則需要710泰銖。或者係購買七色花再供奉，甚至係購買雕刻大象再供奉四面佛。