【曼谷景點】新MRT線直達！曼谷人最愛席娜卡琳火車鐵道夜市復古味濃惹味燒物下放眼千個攤檔！｜Train Night Market Srinakarin

席娜卡琳火車鐵道夜市（Train Night Market Srinakarin）以「火車夜市」聞名曼谷，亦係一個受到當地人歡迎嘅夜市。不過，該夜市以往交通不便，想要拍拖兩個人去逛一逛都唔容易，只可以搭的士或Grab。現時，MRT黃線已經開通，該夜市出站即達，瞬間交通便捷。即睇「火車夜市」威力，美食、購物點逾千個攤檔應有盡有，夜市遍佈古董藝術，復古味濃！

乘搭MRT黃線至「‎Suan Luang Rama 9 站」，出站並踏出天橋後，馬上抵達「席娜卡琳火車鐵道夜市」入口。而夜市入口位置為Zone A，穿過少量店舖，會見到左邊係一個偌大停車場，故目前無論自駕定搭車都好方便。呢個夜市遊客較少，香港人亦少聽見，大多數都係泰國人，所以更可以感受當地文化。

首先穿過室內通道，就可以前往露天攤檔，「席娜卡琳火車鐵道夜市」以「火車夜市」聞名，而舊火車站位置則位於後方。整個夜市合共有逾千個攤檔，大多數都係售賣復古精品或二手物品，古董、藝術更滿佈地攤。編輯覺得前面一堆室內店舖驚喜不大，反而後面露天攤檔嘅精品就較為意外及喜愛，價錢上亦較低廉。

夜市內，有唔少古董擺設可以打卡，當中有幾架古董汽車、古董飛機，甚至大型裝置藝術。現場亦有古董火車站，頗為懷舊，散發濃濃復古味，打卡必到！而最後方地攤較多，亦有較大空間可以放鬆及散步。

「火車夜市」傳統與新穎兼備，地方偌大，於室內商店與露天攤位之間，聚集不少小吃攤販，以及美食廣場，多間攤檔皆售賣泰國傳統小食，琳琅滿目，多數聚集於幾道幾百米小巷內。今次編輯走入一間只有泰文名字嘅燒烤食肆，該店樓高2層，即叫即烤，上層更可以放眼「火車夜市」千個攤檔風景！

入座後，店員會遞上餐牌及紙筆，原來餐牌上都有英文、中文，只要將餐點寫低就得，不愔泰文亦無問題。登上燒烤店，當然係食地道燒物，簡單挑選Grilled Chicken 70泰銖、Grilled Catfish 60泰銖、Grilled Pork Neck 100泰銖、Fried Chicken Wings with Fish Sauce 90泰銖，以及Chang Beer 95泰銖、Coke 20泰銖。

坐於夜市頂品嘗美食，感覺得別chill，各款燒烤都好香口惹味，燒雞、燒豬頸肉、燒雞翼等都出色，其中燒貓魚特別有驚喜，菜式地道有水準。價錢上亦唔貴，兩個人埋單無需450泰銖，折合港幣僅100餘元，比其他夜市價錢低得多！

繼續走「席娜卡琳火車鐵道夜市」，露天攤檔店舖眾多，並無所謂名店。夜市有好多特色精品、復古裝飾，以及二手物品，鍾意復古服飾等就會好適合。

最後方由貨櫃屋、鐵皮屋組成，亦係由舊火車站演變而成，為全夜市復古味最濃厚嘅一區。「席娜卡琳火車鐵道夜市」場內款式眾多，物價平實，攤檔有如數之不盡，唔需要俾錢大地產商。呢個夜市尋寶不難，只要款式合心意，眯埋眼直接買就得！

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭MRT黃線至「‎Suan Luang Rama 9 站」，出站後徒步約5至10分鐘即達，入口可見MRT站。

❷ 如果要最安全地折返酒店，建議唔好玩太夜，因為MRT尾班車時間只到午夜。

❸ 夜市附近有九世皇御苑「Suan Luang Rama 9 Park」、西康廣場「 Seacon Square」，有時間可以順道一次過逛一逛。

❹ 夜市有分唔同zone，食肆同購物亦大致上分開，而舊火車站位置喺比較後。

EATWO

Miss A

Train Night Market Srinakarin ／席娜卡琳火車鐵道夜市／ตลาดนัดรถไฟศรีนครินทร์

Srinagarindra Rd, Nong Bon, Prawet, Bangkok 10250（近Seacon Square）（泰文地址﹕ตลาดนัดรถไฟ ศรีนครินทร์ ซ.ศรีนครินทร์ 51 ถ.ศรีนครินทร์ แขวงหนองบอน เขตประเวศ）
17:00-01:00；星期一、二、三休息
+66 81 827 5885
https://www.ทําเลขายของ.com/