【曼谷景點】大量火山排骨店強勢進駐！JODD FAIRS 逾千檔攤琳瑯滿目夜市原來分兩個地方？

「火山排骨」係泰國曼谷名物之一，最為人熟悉係來自「拉差達火車夜市」。不過疫情之後，曼谷於上年有一個全新夜市「JODD FAIRS」開幕，連「火山排骨」都強勢進駐，搬到新夜市內，拍拖兩個人要搵食就唔好摸錯地方啦！另外，「JODD FAIRS」其實有兩個地方，即刻睇吓一分為二嘅全新夜市地址及交通方法！

據悉，「JODD FAIRS」旗下有2個市集，同樣名為「JODD FAIRS」，只不過一個係「Jodd Fairs Rama 9」，而另一個就叫「JODD FAIRS: DanNeramit」，中文名分別稱為「喬德夜市拉瑪」及「喬德夜市：神奇之地」。

無論你去任何一個「JODD FAIRS」新夜市，都一樣有驚喜。夜市人氣十足，更有超過1200個攤檔，美食、購物點多蘿蘿，逛一個圈必然能夠滿足，不過就算唔係假日，環境都較其他夜市擠逼。

「Jodd Fairs Rama 9」夜市位於「Unilever House」商場對面，於商場上層可以俯視夜市風景。該夜市面積不少，但「JODD FAIRS: DanNeramit」地方更偌大，據悉有逾13萬平方米，為全曼谷最大夜市！

第一個夜市「Jodd Fairs Rama 9」係「JODD FAIRS」系列元祖夜市，比較上係集中於美食及購物，一邊係聚集小吃攤，另一邊則為乾貨攤檔。其中，原先來自「拉差達火車夜市」嘅「火山排骨」就進駐夜市，而且係海量式侵入，幾乎每個角落都可以見到「火山排骨」蹤影。即使「火山排骨店」遍地開花，但每間都依然入座率極高，坐滿客人。

第二個夜市「JODD FAIRS: DanNeramit」原址為一個荒廢遊樂場，搖身一變成為一個歐陸風復古夜市，滿滿華麗感。夜市分成市集及懷舊區，亦有多個座位區，最特別之處，係夜市內有一座予以保留嘅大型歐洲城堡、熱汽球及老爺車，絕對係打卡地標！

據了解，「JODD FAIRS」嘅夜市搞手正正係「泰國夜市之父」Pairoj Roiyakew，其負責嘅夜市往往係大受歡迎嘅夜市，除咗「JODD FAIRS」2個新夜市，連「席娜卡琳火車夜市（Train Night Market Srinakarin）」亦係由佢打造。

除咗「火山排骨」，夜市有唔少小吃攤，比如係椰汁刨冰、西瓜刨冰，椰子煎餅等。夜市內有眾多古董店、手工藝店，以至二手物品店等，款式眾多，當中重有Live Band表演，地方偌大，絕對可以拍拖兩個人逛足一晚！

「JODD FAIRS」2個新夜市重點名物都係「火山排骨」，精華在於酸湯、排骨、辣椒。一整排排骨上檯，並且堆疊成一座山，有如「排骨山」，霸氣十足！「火山排骨」有大、中、小可以選擇，價錢分120、250、350泰銖，另外重有一種特大size，每份999泰銖，折合即係港幣約250元！

排骨與肉質煮得軟腍，入口即融化。所謂「火山」，即係排骨表面嘅青辣椒，為排骨帶上辛辣口感，若然食埋辣椒，人都「火山爆發」。「火山排骨」雖然有一定辣度，但又唔算太辣，配搭泰國啤酒或原個椰青特別適合。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭MRT至「Central Rama 9 站」，徒步約5分鐘即達「JODD FAIRS DanNeramit」。

❷ 「JODD FAIRS DanNeramit」只限night market。位置近「Central Rama 9」商場。

❸ 乘搭MRT至「Phahon Yothin 站」，於3號出口出站，徒步約10分鐘即達「JODD FAIRS: DanNeramit」；或者乘搭BTS至「Ha Yaek Lat Phrao 站」，於4號出口出站，徒步約6分鐘即達「JODD FAIRS: DanNeramit」。

❹ 「JODD FAIRS: DanNeramit」有超過1200個攤檔。