【曼谷手信】邊間比Big C Supermarket更平？曼谷6間超市掃貨推介 24小時營業／分店眾多／餐廳宵夜

對香港人來說，去泰國曼谷，少不免要拍拖兩個人逛Big C超市，掃貨及買手信一間搞掂晒！而事實上，曼谷超市豈止Big C一間連鎖店呢？想要逛更Local嘅超市，就要睇吓以下呢個掃貨清單，除咗Big C，其實另外重有5間當地人喜愛去嘅超級市場！

BIG C Supermarket

Big C Supermarket係香港人最熟悉嘅泰國超市，資金充裕到繼併購泰國家樂福，連香港阿布泰都可以吞併。Big C於1994年已經開業，由泰國Central集團創立，於全國有眾多分店，而且貨源充足，貨架比一般超市亦高，深受當地人及旅客歡迎，奠定其超市NO.1地位。

另外，Big C基本分成Big C、Big C Extra、Big C Jumbo、Big C Market 、Mini Big C，日常所需應有盡有，超市內類別極多。以Chit Lom分店為例，樓高幾層，一層係超市，另一層係家品及雜貨，所以要逛Big C嘅話，至少要預1至2小時。而想要冷門少少嘅貨，可以去Big C Extra。其中，Mini Big C 雖然係24小時營業，但有好多其實都唔係24小時營業，去之前最好睇清楚該分店營業時間。

▼ 2019年big c已推行環保政策。

Big C官網﹕http://www.bigc.co.th/

Tops Market

於1996年創立嘅Tops Market，比Big C遲2年，但其實同樣係當地人喜愛嘅超市品牌。而Tops Market分店亦不少，全國有超過200間分店，規模不小，有一定地位。想買靚啲嘅手信，可以到Tops Market，不過要留意唔係間間都係24小時營業。

Tops Market嘅定位與Big C稍有分別，由於對食物及商品有一定堅持，而且都係偏向健康選擇，故超市以中產人士為主打。Tops Market商品會比較有質素，但價格就會高少少，恍如外國Supermarket。所以，Tops Market係比較受中產階級、當地人同西方人士歡迎。

Tops Market官網﹕https://corporate.tops.co.th/

MaxValu

至於MaxValu，想信大家一望而知係來自邊個集團。事實上，MaxValu Tanjai係日本AEON集團旗下超市，只係MaxValu由2007年起，由日本開到泰國，現時有超過50間分店，有好幾間都會維持24小時營業。MaxValu商品價格雖然比Big C高少少，但以日本食材為主，能確實打入當地人市場，同樣不容小覷。

MaxValu整個超市裝潢設計同平常Aeon超市極為相似，只係全部變成泰文字。既然MaxValu係來自日本嘅超市，品質固然有一定標準，特別係新鮮食物，安全又可靠，間中更有限定食品。值得一提，要留意超市招牌有無寫「Tanjai」，如果有「Tanjai」，表示該分店多數係24小時營業，掃貨之餘亦可以食埋宵夜呢！

MaxValu官網﹕https://www.aeonthailand.co.th/

Villa Market

而Villa Market為泰國另一間連鎖超市，於1974年創立，歷史悠久，亦係當地人喜愛嘅超市之一。Villa Market相對其他超市嚟講，價錢係比較高，皆因專門售賣歐美食材，屬曼谷市內一個中高價超市。

Villa Market商品齊全，想要購買比較體面嘅手信，不妨前往呢間超市挑選，可能會搵到其他人未必搵到嘅手信呢！Villa Market主吸中產以上及外國客人，亦即係適合經濟能力較高嘅朋友。

Villa Market官網﹕https://shop.villamarket.com/

Tesco Lotus

與Big C一樣於1994年創立嘅Tesco Lotus，前身係來自泰國CP集團，4年後被世界知名超市Tesco吞併，全泰國屹今有超過1800間分店，地位超然。現時好多分店都係叫Lotus’s，但其實原名係Tesco Lotus。而Tesco Lotus分店類型眾多，包含有Extra、Value、Market 、Express等，但要留意只有Express係24小時營業。

相對泰國曼谷其他超市，Tesco Lotus係價格最相宜嘅一間，深受當地平民百姓喜愛。編輯亦眼見部份商品比Big C更低價，而超市亦不時貼有黃色標示，顯示該商品有折扣優惠。另外，唔少Tesco Lotus附近都有Food Counter，週邊不僅有藥房，亦設有連鎖餐廳，方便大家掃貨前後醫吓肚。

官網﹕https://www.lotuss.com/en

Foodland

想要搵100%係24小時營業嘅曼谷超市嗎？眾多超市中，Foodland係唯一一間連鎖超市係所有分店都係24小時營業，吸引唔少外國人。而Foodland於1972年開幕，亦係全泰國最早開始營業嘅超市，歷史最悠久，年期甚至比Villa Market更早，直頭創泰國超市先河！

Foodland曼谷分店離BTS亦唔算太遠，起碼係徒步可達距離。該超市一般規模未必如Big C分店咁大，僅屬中型超市。但基本商品齊備，價格亦唔算太高或太平，算係Fair Price。不過，超市有機會可以搵到其他超市未必有嘅商品，例如當日就見到與Black Pink聯乘嘅Oreo。Foodland超市另一端，亦可以見到設有餐廳Took Lae Dee，價格相宜，無論餐廳定超市，都適合夜貓一族掃貨兼歎宵夜。