【台北展覽2024】率先實地參觀 Hello Kitty 50週年特展！巨型Kitty／互動遊戲／限定商品即睇台北5大週邊打卡點＋紀念品店｜附最優惠入場方法

台灣展覽選擇眾多，大多適合拍拖兩個人逛逛。適逢Hello Kitty誕生50週年，最近台北又有特別展覽，現場有一隻好特別嘅巨型Kitty，亦有互動遊戲及50週年限定商品。每位入場重有神秘禮物，Hello Kitty迷絕對不能錯過，即睇最優惠入場方法！

今年週邊活動不少，E.A.Two編輯今次除咗實地參觀台北Hello Kitty 50週年特展，重特別前往5個週邊打卡點及紀念品店，即刻睇睇有邊5個值得留意嘅地方啦！

HELLO KITTY 50週年特展：與未來做朋友吧

今次「Hello Kitty 50週年特展」於台北「華山1914文化創意產業園區」舉行，展期由2023年12月30日至2024年4月7日，為期超過3個月，想要朝聖就謹記要抓緊時間。

踏入2024年，Hello Kitty已經誕生50年，今次「HELLO KITTY 50週年特展」主題係「與未來做朋友吧」，帶嚟6大互動展區。展覽地方其實唔大，但既有簡單展板介紹、經典設計稿，亦有打卡位，幫各位粉絲們回顧Hello Kitty多年來嘅變化，由1974年至2023年均鉅細無遺地呈現，現場更有多個互動遊戲展區。

於現場實地探索後，發現最特別之處係有一隻超巨型Hello Kitty立體頭雕貫穿多個展區，即1至2樓。每個展區都只有Hello Kitty嘅其中一面，簡單嚟講係將Hello Kitty分成4份，一區係左邊面，另一區係右邊面；一區係左邊身體，而重有一區就係右邊身體，既有創意，亦非常吸睛。

大門口有一幕粉紅色Hello Kitty牆，右邊係入口，左邊係出口。入場時，工作人員會給予「疊色手作收藏小卡」一張、「絢彩珍藏卡套」一張，後者為每日限量100張，贈完即止。如有購買「50週年限定公仔」，入場時都會以random方式獲得一隻。甫踏入展覽區域，映入眼簾嘅係一段概念短片，一方面回到過去，另一方面探索未來，有如展覽導讀。

展覽首個區域係「誕生故事區」，以展板為主，包含基本Hello Kitty資料，粉絲們當然要於「I am Hello Kitty」前打卡啦！另外，亦有從1974年至2023年嘅歷年經典Hello Kitty造型設計，粉絲們必須搵吓邊個造型係代表自己！

第二個區域係「知識探索區」，從呢區開始，粉絲們必然要留意有一隻超巨型Hello Kitty將貫穿多個遊戲及打卡區！互動遊戲中，有故事問答，亦有與首個區域有關連嘅問答遊戲，包括你可能未必知道嘅Hello Kitty小知識，答案會於互動投影中展示。

而第三個區域就係一個特別嘅「50週年紀念區」，包括有大大個充氣「50」字樣及Hello Kitty充氣公仔。其後亦有打卡專區，粉絲可以將自己變成Hello Kitty！該區亦有展示多款Hello Kitty歷年精品，繼續前行，會發現其後會見到巨型Hello Kitty嘅招牌蝴蝶結，背景主題顏色為紅色，打卡必到！

第四個區域係進一步「百變互動區」，首先會見到Hello Kitty嘅另一邊臉孔，進入該區時，會見到Hello Kitty正於睡眠狀態，但只要於指定蝴蝶結形狀話筒中發出聲音，就自然會喚醒沉睡中嘅Hello Kitty，其眼睛馬上變blink blink，立體頭雕有唔同表情變化，非常可愛！

另一個小遊戲需要兩個人同時進行，而兩個人係對決模式，參加者需要鬥快拍下畫面跌落嚟嘅小物，拍得多嗰邊就會勝出。勝出者一方會顯示「恭喜你喔」，而落敗一方則會顯示「好可惜喔」。

然後係第五個區域「未來互動區」，你一方面會見到一隻絢彩未來感嘅主題Hello Kitty，另一方面亦可以拎返入場時嘅Hello Kitty小卡出嚟，以疊色手作收藏小卡方式，於小卡上印出顏色，為Hello Kitty添上色彩。

至於第六個區域就係「百變互動區」，既有少量展板打卡位，除咗Hello Kitty，亦有My Melody、玉桂狗、XO、布甸狗、大口仔、Kuromi等。你亦可以掃瞄一端牆上嘅QR Code，連結網址。以Line連結後，進入專區，可以於虛疑畫面中戴上Hello Kitty可愛表情頭套，寫上祝福話語，然後自拍合照。

穿梭6個展區後，最後會到達Hello Kitty紀念品區，既有歷年週邊商品，亦有50週年限定商品。當中滿台幣800元即送角色收藏卡一張；滿台幣1800元，即送收藏卡兩張或Hello Kitty刺繡燙貼一張；滿台幣5000元則贈送收藏卡全套及刺繡燙貼一張。不過，唔少50週年限定商品都係無貨，需要預購，但實際上留低contact後，其實至截稿前都未再有回音。

Hello Kitty 限定捷運親子車廂

踏入50週年，固然有多項精彩活動，早前台北捷運就有限定彩繪列車，本來有一架指定列車於紅色線（淡水信義線）運行，但編輯於1月初前往則已經無咗Hello Kitty 彩繪列車。

乘搭捷運時，卻又發現另有Hello Kitty 限定親子車廂，童趣味十足。當中，以小物中文及英文為主題，例如鏡子、雨傘、電話、睡衣等，包含各款Sanrio Characters公仔圖案。

捷運車廂親子友善區運行期間比彩繪列車長，基本上由即日起會運行至2024年12月，而且無論紅線、藍線、綠線、橘線，都有機會見到Sanrio Characters蹤影。不過，該限定列車其實只有兩卡列車有「親子友善區」，而且其實每卡車廂都只有一半座位及車門有卡通圖案。能夠打卡嘅地方，的確係比整列彩繪列車遜色。

SOGO 忠孝館 Sanrio Gift Gate 50週年主題店

位於台北SOGO忠孝館係台北台灣33間Sanrio Gift Gate嘅其中一間，亦係日本Sanrio官方專門店。今次SOGO 10樓嘅分店亦特別成為Hello Kitty 50週年主題店，地方尚算寬廣，包含各式Hello Kitty裝飾及紀念品。

捷運南京復興站打卡專區

今年既係Hello Kitty 50週年，台北捷運一方面推出限定家族聯名系列悠遊卡，另一方面亦於捷運南京復興站設有打卡專區及期間限定商店，包含不少Sanrio Characters紀念品。

由Sanrio及台北捷運聯乘嘅悠遊卡不僅有Hello Kitty，亦有My Melody、玉桂狗、布甸狗、蛋黃哥等Sanrio Characters為主題，悠遊卡係一張小型吊飾模樣嘅平板小卡，上面有可愛卡通公仔。每張限定悠遊卡賣台幣100元，由上年11月已經開賣，合共有7款卡通造型。

而當中除咗單購悠遊卡，亦有「紀念驚喜包」，7款造型卡random抽出，每包賣台賣150元，但就要睇自己運氣如何，會唔會抽中喜愛角色，有啲風險。

限定商店內除咗有一隻Hello Kitty雕塑像可以打卡，斜對面一隅亦有捷運車長造型嘅打卡專區，悠遊卡上嘅7款造型角色均可任打卡，眾人更張開雙臂歡迎大家！如果以角色造型嚟講，Hello Kitty係站長或車長，而布甸狗係Security，My Melody就係司機，玉桂狗為維修員，至於XO及蛋黃哥就係客戶服務人員。

清心福全 x Hello Kitty 限定商品

台灣Hello Kitty 50週年驚喜停不了！連茶飲店清心福全都直接同Sanrio聯乘合作，同時推出多款可愛商品。只要購買任何一款茶飲，加錢就可以換購聯乘商品，唔似香港嗰啲咁cheap，一定要人買滿指定金額先可以換購。

今次Sanrio與清心福全有6款商品聯乘，包括有立體浮雕水樽、公仔變身飲料提袋、抱枕頸枕二合一、環保袋與小型銀包、以及金蔥貼紙。

由於當日有唔少商品或售馨、或過咗推廣期，所以只有Sanrio Characters大頭公仔變身飲料提袋。該商品平常係一個卡通公仔吊飾，與普通大頭Hello Kitty公仔無異，但大頭背後有一條拉鏈。拉開拉鏈後，可以取出飲料提袋，包裹剛買嘅飲品，直接抽起飲品，逛街都唔使咁狼狽。

台北101 x Hello Kitty AR濾鏡

另外，重有一個50週年活動係需要下載app，因為該活動係一個互動程式。只要下車AR應用程式「Hello Kitty AR」，到達台北101附近位置，開啟手機應用程式及照相功能，就可以有機會睇Hello Kitty跳舞及慶祝生日！

今次AR互動遊戲係全球城市通用，因為於倫敦、東京、台北、紐約、巴黎都可以使用，有如同Hello Kitty環遊世界，望落甚為有趣。（下載連結﹕iOS、 Android）

點解會講係「有機會」？因為該AR app其實係隱藏另一個條件，單純下載該AR app係唔能夠睇到Hello Kitty跳舞。打開應用程式後，方才發現係必須要配合抖音app，先至可以睇到該AR互動濾鏡。由於編輯係唔會用抖音，所以決定放棄睇心愛嘅卡通人物。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 進入「HELLO KITTY 50週年特展：與未來做朋友吧」時，只需出示購票時嘅QR Code，每日首100名入場人士都可以得到限定入場證。離開時，可以選擇蓋上官方小印章，憑該印章可以於同一日再次入場。

❷ 購票時，記得留意自己購買嘅入場證有無限定紀念品。kkday及klook基本上人均都係台幣420元，折合港幣約104元，而連限定公仔就需港幣199元。

❸ 部份商品需要預購，香港人如需要可以留contact，有貨就會用順豐寄出，不過最大問題係，到時就需要用支付寶付款，買唔買就由讀者自行決定啦，無account嘅編輯就只能放棄購買。

❹ 入場後，記得留意當中有隻巨型kitty公仔躲藏於每一個區域。